អន្តរជាតិ
ចិនទទូចឲ្យសមាជិកទាំងអស់បំពេញកាតព្វកិច្ចហិរញ្ញវត្ថុ ខណៈ UN ជួបបញ្ហាខ្វះលុយ អ្នកនាំពាក្យក្រសួងការបរទេសចិន Geng Shuang ។ រូបភាពវេបសាយក្រសួងការបរទេសចិន
× រដ្ឋាភិបាលក្រុងប៉េកាំង បានទទួលដឹងលឺពីស្ថានភាពថវិកា និងហិរញ្ញវត្ថុប្រចាំឆ្នាំសម្រាប់ទ្រទ្រង់ការប្រព្រឹត្តទៅរបស់អង្គការសហប្រជាជាតិ (UN) ដែលកំពុងតែជួបផលលំបាក។ ក្រុងប៉េកាំង ដែលជាសមាជិកមានឥទ្ធិពលមួយរបស់អង្គការសហប្រជាជាតិផងនោះ បានទទូចឲ្យរដ្ឋសមាជិកទាំងអស់មានទំនួលខុសត្រូវ និងជួយស្រោចស្រង់អង្គការកំពូលរបស់ពិភពលោកមួយនេះ ឲ្យរួចផុតពីស្ថានភាពលំបាក។
នៅដើមសប្តាហ៍នេះ អគ្គលេខាធិការអង្គការសហប្រជាជាតិ លោក Antonio Guterres បានចេញលិខិតផ្លូវការមួយជូនដំណឹងសមាជិកទាំងអស់ឲ្យបានដឹងពីបញ្ហាប្រឈមផ្នែកហិរញ្ញវត្ថុធ្ងន់ធ្ងរ ដោយសារតែសមាជិកមួយចំនួន មិនបានបំពេញកាតព្វបង់វិភាគទាន ដែលបានកំណត់ក្នុងធម្មនុញ្ញអង្គការសហប្រជាជាតិ។ លោកអគ្គលេខាធិការ អះអាងថា មានត្រឹមតែតួលេខថវិកា អង្គការសហប្រជាជាតិ មិនអាចអនុវត្តសកម្មភាពបានឡើយ។
តាមការអះអាងរបស់អ្នកនាំពាក្យរបស់អគ្គលេខាធិការដ្ឋានអង្គការសហប្រជាជាតិ លោក Dujarric នៅត្រឹមខែកញ្ញាកន្លងទៅ មានតែថវិកាត្រឹមតែ៧០ភាគរយ នៃថវិកាសរុបប៉ុណ្ណោះ ដែលរដ្ឋសមាជិកបានបង់ ដែលតួលេខនេះ មិនអាចធ្វើឲ្យអង្គការសហប្រជាជាតិដំណើការផែនការតាមការគ្រោងទុកបានឡើយ។ នេះបើយោងតាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិ។
បន្ទាប់ពីការជូនដំណឹងនេះ រដ្ឋាភិបាលចិន ក៏មិនព្រងើយកន្តើយឡើយ។ តាមរយៈអ្នកនាំពាក្យក្រសួងការបរទេស ចិនបានបង្ហាញការព្រួយបារម្ភខ្លាំងពីស្ថានភាពលំបាករបស់អង្គការសហប្រជាជាតិ និងចង់ឃើញរដ្ឋសមាជិកទាំងអស់ មានស្មារតីទទួលខុសត្រូវ ដូចបានកំណត់ក្នុងធម្មនុញ្ញអង្គការសហប្រជាជាតិ។
លោក Geng Shuang អ្នកនាំពាក្យក្រសួងការបរទេសចិននៅថ្ងៃ១១ តុលា បានលើកឡើងថា ក្នុងនាមជាអ្នកទ្រទ្រង់ធំបំផុតទីពីរក្នុងការបង់ថវិកាជាប្រចាំរបស់អង្គការសហប្រជាជាតិ និងជាប្រទេសដែលមានការទទួលខុសត្រូវខ្ពស់ ចិន បានបំពេញកាតព្វកិច្ចហិរញ្ញវត្ថុសម្រាប់ឆ្នាំ២០១៩រួចរាល់ហើយ។
អ្វីដែលគួរឲ្យកត់សម្គាល់នោះ ខណៈទទូចឲ្យរដ្ឋសមាជិកបំពេញកាតព្វកិច្ចតាមការកំណត់ លោកអ្នកនាំពាក្យ ក៏បានឆ្លៀតរិះគន់អាមេរិក ដែលជារដ្ឋសមាជិកត្រូវបង់ថវិកាច្រើនបំផុតរបស់អង្គការសហប្រជាជាតិ បង់ថវិកាឲ្យបានគ្រប់ និងមិនត្រូវពន្យាពេលទៀតឡើយ៕
© រក្សាសិទ្ធិដោយ thmeythmey.com