COVID-19
អន្តរជាតិ
ចិន ធ្វើតេស្តលើប្រជាជនទាំងជាង៩លាននាក់ក្រុងឈីងតាវ ក្រោយមានករណីឆ្លង COVID-19 អាជ្ញាធរចិន ដើរបាញ់ថ្នាំសម្លាប់មេរោគនៅក្នុងទីក្រុងQingdao។ រូបភាព៖ Reuters
× ទីក្រុងឈីងតាវ នៅថ្ងៃទី១២ ខែតុលា បានបញ្ជាក់ថា ខ្លួននឹងធ្វើតេស្ត COVID-19 លើប្រជាជននៅទូទាំងទីក្រុង បន្ទាប់ពីមានករណីឆ្លងពាក់ព័ន្ធនឹងមន្ទីរពេទ្យមួយកន្លែងព្យាបាលអ្នកជំងឺ COVID-19 មកពីក្រៅប្រទេស។
ទីក្រុងឈីងតាវ ជាក្រុងកំពង់ផែរបស់ខេត្តសានតុង ដែលស្ថិតនៅភាគខាងកើតរបស់ចិន។ អាជ្ញាធរទីក្រុងកំពង់ផែនេះ នៅថ្ងៃទី១១ ខែតុលា បានរាយការណ៍ថា មានករណីឆ្លងថ្មីចំនួន៦ករណី និង៦ករណីទៀតមិនមានរោគសញ្ញា។ តាមការបញ្ជាក់របស់អាជ្ញាធរសុខាភិបាលក្រុង Qingdao ភាគច្រើននៃករណីឆ្លងថ្មី មានពាក់ព័ន្ធនឹងមន្ទីរពេទ្យ Qingdao Chest ដែលជាកន្លែងព្យាបាលអ្នកជំងឺ COVID-19 នាំចូលពីបរទេស។
ទាក់ទិននឹងបញ្ហានេះ រដ្ឋាភិបាលខេត្តសានតុង បានបើកកិច្ចប្រជុំមួយ និងជំរុញឲ្យអាជ្ញាធរទីក្រុងឈីងតាវ ធ្វើតេស្តលើប្រជាជន ដែលមានជាង៩លាននាក់ ដើម្បីស្រាវជ្រាវរក និងទប់ស្កាត់COVID-19 ឲ្យបានឆាប់បំផុត។ ទីភ្នាក់ងារព័ត៌មាន Reuters ផ្សាយថា បើសិនបើគ្មានការប្រែប្រួលទេ ការធ្វើតេស្តនេះ នឹងមានរយៈពេល៥ថ្ងៃ។
បន្ទាប់ពីមានករណីបែបនេះ អាជ្ញាធរក្រុងដ៏ធំមួយនេះ បានបញ្ជាឲ្យបិទមន្ទីរពេទ្យQingdao Chest, នផ្នែកសង្គ្រោះបន្ទាន់របស់មន្ទីរពេទ្យ និងអាគារព្យាបាលអ្នកជំងឺ COVID-19 ដែលនាំចូលមកពីបរទេស ដើម្បីទប់ស្កាត់ការរាតត្បាត។
ចិនត្រូវបានមើលឃើញថា បានទប់ស្កាត់COVID-19 យ៉ាងប្រសើរ ហើយករណីឆ្លងនៅក្នុងស្រុក ក៏ធ្លាក់ចុះជាលំដាប់ បើធៀបនឹងអាមេរិក និងបណ្តាប្រទេសអឺរ៉ុប។ ប៉ុន្តែការប្រុងប្រយ័ត្ននៅតែមានដដែល ខណៈទីក្រុងបារម្ភថា បើមានការរាលដាលជាថ្មី វិធានការតឹងរ៉ឹងនឹងត្រូវអនុវត្តឡើងវិញដែលនឹងធ្វើឲ្យខូចខាតសេដ្ឋកិច្ចមិនខាន។
គិតមកត្រឹមថ្ងៃទី១២ ខែតុលា ចិនមានករណីឆ្លងCOVID-19 សរុបចំនួន ៨៥៥៧៨ករណី អ្នកស្លាប់មានចំនួន ៤៦៣៤នាក់ និងអ្នកជាសះស្បើយមានចំនួន ៨០៧១៤នាក់៕
© រក្សាសិទ្ធិដោយ thmeythmey.com