ដំណាំកសិកម្ម ជាង២៤ម៉ឺនហិកតា បានរងផលប៉ះពាល់ដោយសារទឹកជំនន់ ក្នុងនោះមានស្រូវ ១៦៩,០៨១ហិកតា និងដំណាំរួមផ្សំ ៧៣,២៩១ ហិកតា។ ក្នុងចំណោមដំណាំដែលជន់លិច មានស្រូវជាង៣ម៉ឺនហិកតា និងដំណាំរួមផ្សំជិត៤ម៉ឺនហិកតា បានខូចខាតទាំងស្រុង។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ។ 
 

ក្រៅពីដំណាំ ក៏មានពលរដ្ឋជាង ២៤ម៉ឺននាក់ដែរ ដែលរស់នៅក្នុង១៩រាជធានី-ខេត្ត បានរងផលប៉ះពាល់ពីទឹកជំនន់ ក្នុងនោះមានពលរដ្ឋជាង២.៦ម៉ឺននាក់ ត្រូវបានជម្លៀសទៅកាន់ទីទួលសុវត្ថិភាព។ សាលារៀនចំនួន ៤៥៩កន្លែង ក៏ត្រូវបានជន់លិច ដោយទឹកជំនន់ផងដែរ។ នេះបើយោងតាមរបាយការណ៍ដដែល។
 

សូមជម្រាបថា គិតត្រឹមថ្ងៃទី១៧ ខែតុលា ទឹកជំនន់បានសម្លាប់មនុស្សយ៉ាងហោចណាស់ ២០នាក់  ក្នុងនោះក្មេងចំនួន៨នាក់។ ខេត្តបន្ទាយមានជ័យ មានអ្នកស្លាប់ច្រើនជាងគេ គឺដល់ទៅ១២នាក់ បន្ទាប់មក​ពោធិ៍សាត់មាន៣នាក់, កំពង់ធំ២នាក់ ,ព្រះសីហនុ២នាក់ និងខេត្តប៉ៃលិនមាន១នាក់៕