ជាតិ
សេដ្ឋកិច្ច
លោក ហ៊ុន សែន ស្នើឲ្យស្ថាប័នឯករាជ្យដែលប្រើថវិការដ្ឋកុំកំណត់ថវិកាតាមខ្លួនឯងចង់បាន
× លោកនាយករដ្ឋមន្ត្រី ហ៊ុន សែន បានអំពាវនាវឲ្យស្ថាប័នឯករាជ្យ ចូលរួមពិភាក្សាជាមួយក្រសួងសេដ្ឋកិច្ច និង ហិរញ្ញវត្ថុ ដើម្បីកំណត់ការចំណាយនៅក្នុងស្ថាប័នឯករាជ្យទាំងនោះ ឲ្យបានត្រឹមត្រូវច្បាស់លាស់ ។ លោក ហ៊ុន សែនស្នើឲ្យស្ថាប័នឯករាជ្យទាំងអស់ដែលចាយលុយរដ្ឋ កុំកំណត់ថវិកាដែលខ្លួនចង់បានដោយខ្លួនឯង នៅពេលដែលស្នើសុំទៅរដ្ឋាភិបាល។លោកថា ស្ថាប័នឯករាជ្យ ដូចជា គណៈកម្មាធិការជាតិរៀបចំការបោះឆ្នោត និងក្រុមប្រឹក្សាធម្មនុញ្ញជាដើមឯករាជ្យតែមុខងារប៉ុណ្ណោះ តែថវិកាចាយវាយមិនឯករាជ្យឡើយ។
លោក ហ៊ុន សែន កំពុងតែឲ្យរដ្ឋមន្ត្រីក្រសួងសេដ្ឋកិច្ច ត្រួតពិនិត្យមើលសំណើសុំកញ្ចប់ថវិការបស់ស្ថាប័នឯករាជ្យនៅកម្ពុជា ដែលបានដាក់មុខរដ្ឋាភិបាល។ ថ្លែងនៅក្នុងកិច្ចប្រជុំត្រួតពិនិត្យប្រចាំឆ្នាំនៃកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈ នៅថ្ងៃទី២០ ឧសភានេះ ប្រមុខរដ្ឋាភិបាលកម្ពុជាបានអត្ថាធិប្បាយដូច្នេះថា៖«ព្រឹទ្ធសភា រដ្ឋសភា ក្រុមប្រឹក្សាធម្មនុញ្ញ និងគណៈកម្មាការជាតិរៀបចំការបោះឆ្នោត ទើបនឹងបញ្ជូនសេចក្ដីសម្រេចពីរមកឲ្យ ខ្ញុំកំពុងឲ្យរដ្ឋមន្ត្រីក្រសួងសេដ្ឋកិច្ចហិរញ្ញវត្ថុត្រួតពិនិត្យមើល។ កំណត់ប្រាក់ខែចំនួនប៉ុណ្ណេះ ដល់ពេលប្រតិបត្តិការប៉ុណ្ណេះ លុយប៉ុណ្ណេះ ហើយមិនដឹងបុគ្គលិកប៉ុន្មាន តើយើងប៉ាន់ស្មានបានឬទេ ទៅលើការចំណាយអស់ទាំងនេះ?
លោកនាយករដ្ឋមន្ត្រី ហ៊ុន សែន បន្ថែមថា៖«ខ្ញុំអំពាវនាវចំពោះស្ថាប័នឯករាជ្យទាំងអស់ កុំផ្អែកទៅលើបញ្ហាដែលថាឯករាជ្យ បើសិនជាថាឯករាជ្យ វាឯករាជ្យទាំងអស់ កុំពាក់ព័ន្ធជាមួយលុយរដ្ឋាភិបាល ខ្ញុំអត់ខ្វល់ទេ។ ប៉ុន្ដែគាត់មានលុយឯណា គាត់ឯករាជ្យតែក្នុងមុខងារ ក៏ប៉ុន្ដែលុយមកបើកពីខាងរដ្ឋាភិបាលទេ។បើតាមខ្ញុំដឹងគាត់ចាយលុយអត់អស់ ហើយប្រគល់ឲ្យទៅគាត់ចាយលុយមិនអស់ ដល់ចាយលុយមិនអស់ គាត់អត់ប្រគល់ឲ្យមកវិញ។ ហើយគាត់ជាស្ថាប័នឯករាជ្យ គាត់ថាគាត់ចាយស្រេចតែគាត់ វាទៅជាដូច្នេះទៅទៀត»។
ជាមួយគ្នានេះលោក ហ៊ុន សែន ក៏អំពាវនាវឲ្យក្រសួង និងស្ថាប័នឯករាជ្យទាំងអស់ ត្រូវមានការកំណត់ឲ្យបានត្រឹមត្រូវ ក្នុងការជ្រើសរើសបុគ្គលិកចូលបម្រើការងារនៅក្នុងស្ថាប័នរបស់ខ្លួន ដោយធ្វើទៅតាមទំហំការងារ ចៀសវាងការជ្រើសរើសបុគ្គលិក ដើម្បីបំប៉ោងការចំណាយនៅក្នុងស្ថាប័ន ដែលជាការដាក់បន្ទុកការចំណាយមកលើរដ្ឋាភិបាល៕
© រក្សាសិទ្ធិដោយ thmeythmey.com