អន្តរជាតិ
រូបភាពក្មេងស៊ីរីបងប្អូនលង់ទឹកពេលភៀសខ្លួនធ្វើឲ្យពិភពលោកស្លុតចិត្ត ក្មេងប្រុស Aylan Kurdi ដេកស្លាប់នៅលើឆ្នេរក្រោយលង់ទឹក (រូបភាព៖ The Guardian)
× ក្មេងប្រុស Aylan Kurdi ជាមួយបងប្រុស (រូបភាព៖ The Guardian)
× រូបភាពក្មេងប្រុសតូចម្នាក់ដែលដេកផ្កាប់មុខក្រោយអណ្តែតមកទើរលើឆ្នេរនោះបានធ្វើឲ្យពិភពលោកទាំងមូលស្លុតចិត្តនិងសោកសង្រេងជាខ្លាំង។ ក្មេងតូចនោះមានវ័យ៣ឆ្នាំប៉ុណ្ណោះហើយគេភៀសខ្លួនចេញពីប្រទេសស៊ីរីជាមួយឳពុកម្តាយនិងជនភៀសខ្លួនរាប់ពាន់នាក់ទៀតដោយផ្សងព្រេងតាមទួករកកន្លែងកសាងជីវិតថ្មីនៅអឺរ៉ុប។ តែអកុសលក្មេងប្រុសនេះបានស្លាប់ព្រោះលង់ទឹកជាមួយបងប្រុសគេវ័យ៥ឆ្នាំ។
រូបភាពក្មេងប្រុសដេកស្តូកស្តឹងផ្កាប់មុខនៅលើឆ្នេរដែលស្គាល់ថាជាឆ្នេរនៅប្រទេសតួកគីនោះបានធ្វើឲ្យពិភពលោកភ្ញាក់ផ្អើលនិងស្លុតអារម្មណ៍ជាខ្លាំង។ក្មេងប្រុសម្នាក់នោះពាក់អាវយឺតពណ៌ក្រហមហើយ យោងតាមប្រព័ន្ធផ្សព្វផ្សាយពិភពលោកជាច្រើន ក្មេងនោះមានឈ្មោះថា Alyan Kurdi មានវ័យត្រឹម៣ឆ្នាំប៉ុណ្ណោះ។
ក្មេងតូចគួរឲ្យអាណិតម្នាក់នេះបានផ្សងព្រេងប្រថុយជីវិតជាមួយបណ្តាជនភៀសខ្លួនឯងមកពីប្រទេសស៊ីរីដោយជិះទូកឆ្លងកាត់មហាសមុទ្រ និងគ្រោះថ្នាក់រាប់រយជំពួកផង។ គួរឲ្យអនិច្ចា ក្មេងតូចម្នាក់នេះក្លាយជាជនរងគ្រោះម្នាក់ក្នុងចំណោមជនភៀសខ្លួនប្រទេសស៊ីរី៧នាក់ដែលបានលង់ទឹកស្លាប់ក្នុងពេលធ្វើដំណើរទៅកាន់ប្រទេសក្រិក។
ចំណែកបងប្រុសក្មេងតូចនេះមានវ័យ៥ឆ្នាំនោះ ត្រូវបានគេប្រទះឃើញអណ្តែតក្រោយលង់ទឹកស្លាប់នៅមិនឆ្ងាយប៉ុន្មានពីឆ្នេរដែលប្អូនប្រុសគេឡើយ។ បើតាមការឲ្យដឹងពីឆ្នាំសមុទ្រតួកគី ទូកពីរគ្រឿងបានលិចនៅពេលធ្វើដំណើរឆ្ពោះទៅប្រទេសក្រិក ហើយវាក៏បណ្តាលឲ្យមនុស្សស្លាប់ មានក្មេង៥នាក់ និងស្ត្រីម្នាក់ផង។ ជន១៥នាក់ផ្សេងទៀតត្រូវគេជួយសង្គ្រោះទាន់ពេល។
គេរំពឹងថារូបភាពច្រើនសន្លឹកដែលធ្វើឲ្យពិភពលោកតក់ស្លុត ឈឹចាប់ និងសោកសង្រេងខ្លោចផ្សាយ៉ាងខ្លាំងនេះក៏នឹងអាចធ្វើឲ្យអឺរ៉ុបផ្លាស់ប្តូរឥរិយាបទ និងព្រមដាក់វិធានការដោះស្រាយគ្រោះមហន្តរាយមនុស្សជាតិដែលកំពុងកើតឡើនពេលបច្ចុប្បន្ននេះផង។
ទោះជាយ៉ាងណាក៏ក្តី នៅថ្ងៃព្រហស្បតិ៍ម្សិលមិញ នាយករដ្ឋមន្ត្រីអង់គ្លេស ដេវីដ កាមេរ៉ូន បានប្រកាសព្រមទទួលយកជនភៀសខ្លួនស៊ីរីបន្ថែមទៀតឲ្យមកស្នាក់នៅ។ ការសម្រេចបែបនេះក៏ដោយសារប្រទេសធំៗនៅអឺរ៉ុបជាពិសេសអង់គ្លេស បារាំង អាល្លឺម់ង៉រងសម្ពាធខ្លាំងពីសហគមន៍អន្តរជាតិកន្លងមកដោយសារតែភាពយឺរយ៉ាវក្នុងការដាក់ចេះដំណោះស្រាយបញ្ចប់វិបត្តិនេះដែរ។
បច្ចុប្បន្ននេះទាំងជនភៀសខ្លួននិងអន្តោប្រវេសន៍បានបន្តផ្សងព្រេងដោយទូកចេញពីប្រទេសជាច្រើនមានទាំងលីប៊ី ស៊ីរី អាហ្វហ្កានីស្ថាន អេរីទ្រា សូម៉ាលី អ៊ីរ៉ាក់ និងបណ្តាប្រទេសជាច្រើនផ្សេងទៀតនៅមជ្ឈិមបូព៌ានិងអាហ្វ្រិក។ ពួកគេមិនរាថយនឹងបញ្ហាគ្រោះថ្នាក់ ដោយត្រូវប្រថុយជីវិតលើសមុទ្រឡើយ។ ពួកគេត្រឹមចង់គេចឲ្យផុតពីភ្លើងសង្គ្រាម ការធ្វើទុក្ខបុកម្នេញពីសំណាក់រដ្ឋាភិបាល ភាពក្រីក្រ និងអាចដោយសារបញ្ហាច្រើនផ្សេងទៀតផង៕
© រក្សាសិទ្ធិដោយ thmeythmey.com