កម្ពុជាប្រារព្ធពិធីបង្ហើរខ្លែងខ្មែរលើកទី១៩

ជាតិ

កម្ពុជាប្រារព្ធពិធីបង្ហើរខ្លែងខ្មែរលើកទី១៩

12, Nov 2015 , 7:59 pm

រូបភាព

ដោយ: ថ្មីៗ

នៅថ្ងៃទី១២ ខែវិច្ឆិកានេះ ជាទិវានៃការប្រារព្ធពិធីមហោស្រពបង្ហើរខ្លែងខ្លែរ លើកទី១៩ ដែលរៀបចំឡើងដោយក្រសួងវប្បធម៌ និងវិចិត្រសិល្បៈ។

ជារៀងរាល់ឆ្នាំក្រសួងវប្បធម៌ និងវិចិត្រសិល្បៈតែងតែប្រារព្ធពិធីបើកមហោស្រពបង្ហើរខ្លែងខ្មែរនៅទូទាំងប្រទេស ដើម្បីជ្រើសរើសយកអ្នកដែលមានទេពកោសល្យក្នុងការធ្វើខ្លែង និងបង្ហើរខ្លែង។ ការប្រារព្ធពិធីបង្ហើខ្លែងខ្មែរប្រចាំឆ្នាំនេះ គឺដើម្បីពង្រីកនិងផ្សព្វផ្សាយវប្បធម៌ លើវិស័យខ្លែងខ្មែរឲ្យកាន់តែផុសផុល ព្រមទាំងប្រើប្រាស់សក្តានុពលវប្បធម៌ខ្មែរជាគ្រឹះជំរុញកំណើនវិស័យទេសចរណ៍ ដែលជាចំណែកមួយនៃការចូលរួមអភិវឌ្ឍសេដ្ឋកិច្ចជាតិ។

លោក សំរាំង កំសាន្ត អនុរដ្ឋលេខាធិការនៃក្រសួងវប្បធម៌និងវិចិត្រសិល្បៈ បានលើកឡើងថា ការរៀបចំប្រារព្ធកម្មវិធីនេះ គឺជាការអប់រំយុវជនខ្មែរជំនាន់ក្រោយឲ្យទទួលយក និងថែរក្សានូវទំនៀមទម្លាក់ប្រពៃណីនៃការបង្ហើរខ្លែងខ្មែរទៅថ្ងៃអនាគត។ លោកបន្ថែមថា រហូតមកដល់ពេលនេះ វប្បធម៌នៃការបង្ហើរខ្លែងខ្មែរ កំពុងជះឥទ្ធិពលយ៉ាងខ្លាំងក្លាដល់គ្រប់មជ្ឍដ្ឋានជាតិនិងអន្តរជាតិ។

អនុរដ្ឋលេខាធិការរូបនេះ បានបញ្ជាក់យ៉ាងនេះថា៖ «នេះជាឱកាសដ៏ល្អបំផុតក្នុងការផ្សព្វផ្សាយ និងលាតត្រដាងការរីកចម្រើនផ្នែកវប្បធម៌ប្រពៃណីខ្មែរ ដល់ពិភពលោកឲ្យស្គាល់ និងចាប់អារម្មណ៍ ព្រមទាំងអាចអូសទាញអ្នកវិនិយោគទុន និងភ្លៀវទេសចរអន្តរជាតិឲ្យមកប្រទេសកម្ពុជាកាន់តែច្រើនបន្ថែមទៀត»។