ជាតិ
សិស្ស AIS ៥០០នាក់ ចុះកម្មសិក្សាសិប្បកម្ម ចម្លាក់ សិប្បករខ្មែរ និងទស្សនាភ្នំព្រះរាជទ្រព្យ
×
កាលពីថ្ងៃទី២៨ ខែឧសភា ឆ្នាំ២០១៦ កន្លងទៅថ្មីៗនេះ សាលារៀន អន្តរទ្វីប អាមេរិកាំង បានដឹកនាំសិស្សថ្នាក់ទី១២ យ៉ាងច្រើនកុះករចំនួន៥០០នាក់ ចុះកម្មសិក្សាសិប្បកម្មចម្លាក់ស្ពាន់ និងប្រាក់របស់សិប្បករខ្មែរ ស្ថិតនៅភូមិពោធិតូច ឃុំកំពង់ហ្លួង និងរមណីយដ្ឋានទេសចរណ៍ភ្នំព្រះរាជទ្រព្យ ក្នុងឃុំផ្សារដែក ស្រុកពញាឮ ខេត្តកណ្តាល។
លោក ជា សម្បត្តិ ប្រធានចាងហ្វាងសាលាសាខាចាក់អង្រែ បានឱ្យអ្នកយកព័ត៌មានដឹងពីគោលបំណងការចុះកម្មសិក្សានេះថាដើម្បីឱ្យសិស្សានុសិស្សបានសិក្សាស្វែងយល់ពីភាពប៉ិនប្រសប់ក្នុងរបរសិប្បកម្មចម្លាក់ស្ពាន់ និងប្រាក់របស់សិប្បករខ្មែរយើង ដែលបានឆ្លាក់ចេញជាគ្រឿងអលង្ការ វត្ថុអនុស្សាវរីយ ចម្លាក់រូបសត្វគ្រប់ប្រភេទ គ្រឿងលម្អផ្ទះ និងរបស់របរប្រើប្រាស់ផ្សេងៗ ដែលជំនាញនេះសិប្បករខ្មែរយើងបានចេះតៗគ្នាតាំងពីដូនតារៀងមក។
ទន្ទឹមនឹងនេះ សិស្សានុសិស្សបានលំហែកម្សាន្ត និងបានស្វែងយល់ផ្សារភ្ជាប់មេរៀនសិក្សាដោយផ្ទាល់ទៅនឹងភ្នំព្រះរាជទ្រព្យ ដែលជាតំបន់ប្រវត្តិសាស្ត្រ ជាអតីតរាជធានីខ្មែរនាសម័យឧដុង្គ ឆ្នាំ១៦១៨-១៨៦៦ ហើយបច្ចុប្បន្នជារមណីយដ្ឋានទេសចរណ៍ដ៏មានប្រជាប្រិយភាព និងជាទីតម្កល់នូវចេតិយអតីតព្រះមហាក្សត្រខ្មែរ និងព្រះបរមសារីរិកធាតុព្រះសម្មាសម្ពុទ្ធ ដែលប្រជាជនកម្ពុជាប្រហែលជា៩០ភាគរយបានកំពុងគោរពប្រណិប័តន៍។
ត្រឡប់ពីចុះកម្មសិក្សានេះវិញ យុវសិស្ស កាវ ស៊ុនលី បានឱ្យដឹងថា ពួកគេមានការចាប់អារម្មណ៍យ៉ាងខ្លាំងពីភាពអំណត់ព្យាយាមក្នុងការកែខៃឆ្លាក់លោហធាតុប្រាក់ និងស្ពាន់ដ៏រឹងស្វិតដោយដៃបានយ៉ាងល្អម៉ត់ហ្មងទាក់ទាញខ្សែចក្ខុអ្នកសិក្សា ហើយពួកគេបានរួមចំណែកទិញនូវចម្លាក់អនុស្សាវរីយ និងគ្រឿងលម្អពីសិប្បករដើម្បីចូលរួមលើកកម្ពស់ស្នាដៃកេរដំណែលដូនតាភូមិកំពង់ហ្លួងដ៏ល្បីល្បាញរៀងមក ហើយសិស្សានុសិស្សកាន់តែមានភាពស្រស់ស្រាយសប្បាយចិត្តដោយបានកម្សាន្ត និងសិក្សាស្វែងយល់ពីរមណីយដ្ឋានប្រវត្តិសាស្ត្រ និងទេសចរណ៍ភ្នំព្រះរាជទ្រព្យ ដែលបង្កប់នូវវប្បធម៌ដ៏មានអត្ថន័យជ្រាលជ្រៅសម្រាប់អ្នកសិក្សាស្រាវជ្រាវ និងអ្នកមកទស្សនាកម្សាន្តនៅកន្លែងព្រៃភ្នំបរពតដ៏ស្រស់ថ្លាគួរជាទីមនោរម្យមួយនេះ៕
(អត្ថបទសាលា)
© រក្សាសិទ្ធិដោយ thmeythmey.com