បទយកការណ៍ / បទសម្ភាសន៍
យុវជនជំនាន់ក្រោយត្រឡប់មកចាប់អារម្មណ៍ និងបោះពុម្ពកំណាព្យ
× ភ្នំពេញ៖ សាស្ត្រាចារ្យជំនាញនិពន្ធកំណាព្យ លោក វ៉ែន សុន ដែលមានពិសោធន៍ច្រើនសម័យកាលបានអត្ថាធិប្បាយថា វិស័យកំណាព្យបានស្គាល់ការរីកចម្រើនក្នុងទម្រង់ផ្សេងៗគ្នាទៅតាមសម័យកាល។ លោកបន្តថា ចាប់ពីទសវត្សរ៍៤០មក កំណាព្យបានរីកចម្រើនតាមរយៈសាស្ត្រាស្លឹករឹត ប៉ុន្តែក្នុងសម័យបច្ចុប្បន្ន កូនខ្មែរជំនាន់ក្រោយបានព្យាយាមសរសេរបោះពុម្ពដាក់ក្នុងសៀវភៅបានច្រើនដែរ។ រីឯយុវជនទៀតសោត ក៏បានចាប់អារម្មណ៍សិក្សាកំណាព្យដែរ។ ប៉ុន្តែ វាក៏នៅមានបញ្ហាខ្លះដែរ ត្រង់ថាការនិពន្ធ និងបោះពុម្ពផ្សាយខ្លះ បានបង្ហាញអំពីកំហុសផ្នែកទ្រឹស្តីដែរ។
សូមអញ្ជើញស្តាប់បទសម្ភាសន៍រវាងលោក ស៊ុំ សុជាតិ អ្នកយកព័ត៌មានរបស់សារព័ត៌មានថ្មីៗ និងលោកគ្រូ វ៉ែន សុន សាស្ត្រាចារ្យខាងនិពន្ធទំនុកច្រៀង និពន្ធកំណាព្យ ជាសិល្បករផ្នែកតន្ត្រី និងជាអ្នកនិពន្ធរឿងខ្លីអប់រំកុមារ ដូចតទៅ ៖
លោក វ៉ែន សុន កវីជើងចាស់តាំងពីទសវត្សន៍ ឆ្នាំ១៩៦០ បានបានអះអាងថា ចាប់តាំងពីកំឡុងឆ្នាំ១៩៨០ រហូតមកដល់បច្ចុប្បន្ននេះ កំណាព្យខ្មែរ បានរីកចម្រើន ក៏ប៉ុន្តែគឺមួយផ្លូវម្នាក់រវាងការរីកចម្រើនវិស័យកំណាព្យ ក្នុងកំឡុងឆ្នាំ១៩៥០ ទៅ១៩៦០ ដែលសម័យនោះកវីខ្មែរលោកនិយម ចារលើសាស្ត្រាស្លឹករឹត ដែលមានដូចជា កវី ព្រះអង្គព្រះរាជសំភា, ព្រះបាទអង្គឌួង, លោកតា ក្រម ង៉ុយ, កវី នូ កន, កវី ឃ្លាំង នង ជាដើម។ល។
ប៉ុន្តែសម្រាប់សម័យបច្ចុប្បន្ន កំណាព្យខ្មែរ មានការរីកចម្រើន មួយបែបគឺរីកចម្រើនតាមបែបទំនើប។ មូលហេតុ គឺបច្ចុប្បន្ន កវីនីមួយៗបានព្យាយាមបង្កើតស្នាដៃរបស់ខ្លួន ហើយបោះពុម្ពផ្សាយជាសៀវភៅ ដែលសម័យមុនគ្រប់ស្នាដៃមិនបានបោះពុម្ពជាសៀវភៅ ប៉ុន្តែភាគច្រើនគឺចារលើសាស្ត្រាស្លឹករឹត តែប៉ុណ្ណោះ។
ទោះជាយ៉ាងណាកវី វ៉ែន សុន មើលឃើញពីចំណុចអវិជ្ជមានមួយចំនួនដែលនាំឲ្យយុវជនខ្មែរសម័យក្រោយមានការច្រឡំបល់ ចំពោះកំណាព្យខ្មែរទាក់ទងទៅនឹងការប្រើប្រាស់បទកំណាព្យទៅតាមពិធីផ្សេងៗដែលចាស់បុរាណលោកបានកំណត់។
បច្ចុប្បន្ននេះ យុវជនខ្មែរ បានងាកមកចាប់អារម្មណ៍រៀនសូត្រ ពីរបៀបនិពន្ធកំណាព្យ និងការសរសេរកំណាព្យតាមវគ្គបណ្ដុះបណ្ដាលនានា ព្រមទាំងតាមបណ្ដាញសង្គមហ្វេសប៊ុក និងចងក្រងជាសៀវភៅ។ ចំណុចនេះ លោក វ៉ែន សុន មានការសប្បាយចិត្ត ព្រោះកូនខ្មែរ បានចាប់ផ្ដើមគិតគូរស្វែងយល់ឡើងវិញ ពីស្នាដៃរបស់បុព្វបុរស និងបន្តថែរក្សាសម្បត្តិវប្បធម៌មួយនេះ។
តែទោះជាយ៉ាងណា កវីរូបនេះសំណូមពរថា បើបំណាច់ថាកូនខ្មែរមួយចំនួនចង់និពន្ធកំណាព្យ ចម្រៀង ឬចង់ក្លាយជាអ្នកនិពន្ធអាជីព គឺត្រូវតែរកគ្រូរៀនឲ្យបានពិតប្រាកដ ហើយកុំរៀនតាមគេ ឬគ្រាន់តែអានហើយ រៀនសរសេរតាមហើយចាត់ទុកថាខ្លួនឯងចេះនិពន្ធនោះទេ។
លោក វ៉ែន សុន មានការសោកស្ដាយចំពោះកវីមួយចំនួន ដែលសរសេរកំណាព្យមិនបានត្រឹមត្រូវតាមក្បួនខ្នាត ការតែងនិពន្ធ។ ដោយឡែក អ្នកចង់ក្រងសៀវភៅ ក្បួនតែងនិពន្ធមួយចំនួន ក៏បានធ្វើឲ្យមានកំហុសឆ្គង ក្នុងក្បួនតែងរបស់ខ្លួន ដែលនាំឲ្យកុលបុត្រកុលធីតាខ្មែរលោកមានការមិនច្បាស់៕
Tag:
វប្បធម៌
កំណាព្យ
អប់រំ
© រក្សាសិទ្ធិដោយ thmeythmey.com