ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
បទយកការណ៍ / បទសម្ភាសន៍
ច័ន្ទណាំ ជម្នះធ្វើការងារស្ម័គ្រចិត្ត កុំឲ្យគេបន្ទោសថា«និស្សិតខ្មែរ ចេះតែទ្រឹស្តី»
02, Oct 2016 ,
3:00 pm
រូបភាព
×
ដោយ:
ភ្នំពេញ៖ កញ្ញា កុប ច័ន្ទណាំ បានផ្តើមធ្វើការងារស្ម័គ្រចិត្តតាំងពីឆ្នាំ២០១៣មក ទាំងមិនសូវទទួលបានការគាំទ្រពីក្រុមគ្រួសារ ដែលមិនចង់ឲ្យខ្លួនធ្វើការងារដែលមិនបានប្រាក់កម្រៃ។ ច័ន្ទណាំ បានឲ្យតម្លៃយ៉ាងខ្លាំងលើការងារមិនផ្តល់ប្រាក់កម្រៃនេះ និងបានជម្នះជាមួយនឹងគ្រួសារ បន្តធ្វើការងារស្ម័គ្រចិត្តរហូតមកដល់បច្ចុប្បន្ន ដើម្បីកុំឲ្យគេបន្ទោសថា«និស្សិតខ្មែរ ចេះតែទ្រឹស្តី»។ ទន្ទឹមនឹងនេះ យុវតីវ័យ២៥ឆ្នាំរូបនេះ ក៏បានស្នើឲ្យ មជ្ឈដ្ឋានទូទៅ លើកទឹកចិត្តឲ្យយុវជន ឬនិស្សិតខ្មែរ ធ្វើការងារស្ម័គ្រចិត្តឲ្យបានច្រើនផងដែរ។
មិនមានយុវជនច្រើនឡើយ ដែលតែងតែចូលរួមធ្វើការងារស្ម័គ្រចិត្តនោះ ពីព្រោះ ការងារនេះ មិនទទួលបានប្រាក់ខែ ប៉ុន្តែយុវតី កុប ច័ន្ទណាំ បានស្វះស្វែងធ្វើការងារនេះ តាំងពីឆ្នាំ២០១៣មកម្លេះ បើទោះបីជាមិនសូវទទួលបានការលើកទឹកចិត្តក៏ដោយ។
បើតាមកញ្ញា កុប ច័ន្ទណាំ រូបនាងបានជម្នះនឹងក្រុមគ្រួសារ ដែលមិនចង់ឲ្យខ្លួនធ្វើការងារ ដែលគ្មានប្រាក់កម្រៃនេះ។ ពេលខ្លះទៀត យុវតីវ័យ២៥ឆ្នាំរូបនេះ ក៏ពើបប្រទះបញ្ហាជាមួយសាស្ត្រាចារ្យនៅសាលា ដែលមិនសូវគាំទ្រ ហើយរឹតបន្តឹងវត្តមានរបស់នាងទៀតផង។ ច័ន្ទណាំ បានពន្យល់យ៉ាងដូច្នេះ៖ពេលខ្លះលោកគ្រូ គាត់បន្ទោស ព្រោះខ្ញុំខកខានមិនបានមករៀន ដោយសារការងារខ្លះតម្រូវឲ្យខ្ញុំចុះទៅតាមខេត្ត ដែលធ្វើឲ្យប៉ះពាល់ដល់ម៉ោងសិក្សាមួយចំនួន។ ដូច្នេះទើបគ្រូគាត់បន្តឹងវត្តមានរបស់ខ្ញុំ»។
ប៉ុន្តែបញ្ហាទាំងនោះ មិនមែនជាឧបសគ្គ បង្អាក់ទឹកចិត្តស្រឡាញ់ការងារស្ម័គ្រចិត្ត របស់យុវតីមកពីខេត្តកំពង់ស្ពឺ រូបនេះឡើយ ផ្ទុយទៅវិញ រូបនាង នៅតែបន្តធ្វើការងារនេះ ដើម្បីកសាងសមត្ថភាព ទាំងចំណេះដឹងទ្រឹស្តីនៅក្នុងសាលា និងការអនុវត្តន៍ជាក់ស្តែងនៅក្នុងសង្គម។
យុវតីដែលមានភាពក្លាហាន មិនសូវខ្លាចអ្នកណារូបនេះ បន្តបញ្ជាក់យ៉ាងដូច្នេះថា៖«ខ្ញុំធុញទ្រាន់នឹងពាក្យដែលគេតែងនិយាយថា «និស្សិតខ្មែរចេះតែទ្រឹស្តី» តែមិននាំគ្នាជំរុញ និងលើកទឹកចិត្ត ព្រមទាំងផ្តល់ឱកាសដល់និស្សិតឲ្យចូលរួមការងារនេះទេ»។ មានសម្បុរស្រអែម ច័ន្ទណាំ បានបន្តបញ្ជាក់យ៉ាងម៉ឺងម៉ាត់ និងស្វាហាប់ថា៖ «ការងារស្ម័គ្រចិត្ត មិនមែនត្រឹមតែផ្តល់អត្ថប្រយោជន៍ដល់ខ្ញុំនោះទេ ប៉ុន្តែតាមរយៈការងារមិនយកកម្រៃនេះ ខ្ញុំអាចជួយប្រជាជន និងសង្គមរបស់ខ្ញុំបានខ្លះផងដែរ»។
កញ្ញា កុប ច័ន្ទណាំ បានផ្តើមការងារជាស្ម័គ្រចិត្ត នៅអង្គការសភាយុវជនខ្មែរ(KYC) គ្រាដែលនាងកំពុងសិក្សាជំនាញទស្សនវិជ្ជាឆ្នាំទី២ នៅសកលវិទ្យាភូមិន្ទភ្នំពេញ។ បន្តបន្ទាប់មក យុវតី រូបនេះ បានចូលរួមសកម្មភាពស្ម័គ្រចិត្តនានាជាមួយអង្គការសង្គមស៊ីវិលផ្សេងទៀតជាមួយអង្គការខុមហ្វ្រែល និងអង្គការអភិវឌ្ឍន៍ធនធានយុវជនជាដើម។ រយៈពេលជិត៤ឆ្នាំមក នេះ ច័ន្ទណាំ បានធ្វើការងារផ្នែករដ្ឋបាល គ្រូបង្រៀនកុំព្យូទ័រ អ្នកបណ្តុះបណ្តាលស្តីពីសិទ្ធិ និងច្បាប់នៅតាមសហគមន៍ដាច់ស្រយាល និងរៀបចំកម្មវិធីវេទិកាយុវជនមួយចំនួនផង។
បច្ចុប្បន្ន ច័ន្ទណាំ កំពុងបន្តការសិក្សាថ្នាក់អនុបណ្ឌិត ផ្នែករដ្ឋបាលសាធារណៈ ប៉ុន្តែនាងនៅតែស្រឡាញ់ និងបន្តធ្វើការងារស្ម័គ្រចិត្តនេះដដែល។ ការងារស្ម័គ្រចិត្ត គឺមានតម្លៃខ្លាំងណាស់។ នេះជាការបញ្ជាក់របស់ យុវតីតូចច្រឡឹងរូបនេះ មុននឹងនាងបន្តបញ្ជាក់ពីប្រយោជន៍នៃការងារនេះយ៉ាងដូច្នេះ៖« តាមរយៈការស្ម័គ្រចិត្តនេះ បានធ្វើឲ្យខ្ញុំយល់ដឹងពីរបៀបធ្វើការងារយ៉ាងច្រើន ទទួលបានចំណេះដឹងថ្មីៗ និងបំណិនប្រសប់ផ្សេងៗ។ ខ្ញុំក៏បានយល់ច្បាស់ ពីស្ថានភាពនៃការរស់នៅរបស់ពលរដ្ឋខ្មែរ និងបរិយាកាសនយោបាយនៅកម្ពុជា»។
ព្រោះតែទទួលបានបទពិសោធន៍ ចំណេះដឹង និងបានស្វែងយល់ច្រើនពីការធ្វើការងារមិនយកកម្រៃ បេក្ខជនអនុបណ្ឌិតរដ្ឋបាលសាធារណៈរូបនេះ ក៏ស្នើឲ្យ យុវជនខ្មែរ ពិសេសនិស្សិតដែលកំពុងសិក្សានៅមហាវិទ្យាល័យ គួរចូលរួមការងារស្ម័គ្រចិត្តនៅតាមក្រសួងនានា និងអង្គការសង្គមស៊ីវិល ដើម្បីពង្រឹងសមត្ថភាពការងារ និងបង្កើតទំនាក់ទំនងនៅក្នុងសង្គមខាងក្រៅ។
កំពុងអង្គុយក្នុងទីស្នាក់ការអង្គការសភាយុវជនខ្មែរក្នុងខ័ណ្ឌទួលគោក ច័ន្ទណាំពន្យល់យ៉ាងដូច្នេះ៖«ខ្ញុំសំណូមពរ ដល់«និស្សិតគួរតែសង្វាតធ្វើការងារស្ម័គ្រចិត្តឲ្យបានច្រើន ព្រោះវាប្រទីបបំភ្លឺផ្លូវ ដើម្បីឆ្ពោះទៅរកការងារល្អនៅពេលខាងមុខ»។ ជាមួយគ្នានោះ កញ្ញា កុប ច័ន្ទណាំ ក៏សំណូមពរដល់សាស្ត្រាចារ្យនៅតាមសាលា គួរផ្តល់ឱកាសឲ្យនិស្សិតចេញមកក្រៅ ធ្វើការងារសង្គមជាក់ស្តែងផងដែរ មិនគួរឲ្យពួកគេរៀនតែទ្រឹស្តីនៅសាលានោះទេ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
កុប ច័ន្ទណាំ
យុវជន
ការងារស្ម័គ្រចិត្ត
© រក្សាសិទ្ធិដោយ thmeythmey.com
អត្ថបទពេញនិយម
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
6 ថ្ងៃ
«មជ្ឈការ»មានន័យខុសពី«វិមជ្ឈការ»ដូចម្តេច?
5 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
7 ថ្ងៃ
«ប្រេសិត»មានន័យដូចម្តេច?
6 ថ្ងៃ
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
2 ថ្ងៃ
អត្ថបទពេញនិយមបន្ថែម