អន្តរជាតិ
ប៉ូលិសឥណ្ឌូណេស៊ីកម្ទេចកញ្ឆា ៩ហិកតានៅខេត្តអាឆេ
× ប៉ូលិស ឥណ្ឌូនេស៊ីបានសម្រេចកម្ទេចដំណាំកញ្ឆាចំនួន ៩ហិកតា ដែលនឹងត្រៀមនឹងត្រូវប្រមូលផលនៅភូមិ Polo នាខេត្ត អាឆេ (Aceh) ។ ប៉ុន្តែ ប៉ូលិសមិនបានបញ្ចេញព័ត៌មានពាក់ព័ន្ធ ម្ចាស់ចម្ការនិងអ្នកដាំដំណាំកញ្ឆានេះឡើយ។
ដំណាំកញ្ឆាប្រហែល ៩ ហិកតាត្រូវបានប៉ូលិស ឥណ្ឌូនេស៊ី រកឃើញ និងដុតបំផ្លាញចោលនៅក្នុងភូមិ Polo នៃខេត្ត អាឆេ នាថ្ងៃ ២៩ ខែសីហានេះ។ តាមពិតទៅ ដំណាំកញ្ឆាដែលគេបំផ្លាញចោលនេះ វាចាស់ល្មមអាចប្រមូលផលបានហើយ។
អ្នកនាំពាក្យនគរបាលខេត្តអាឆេ លោក Goenawan បានអះអាងថា មានមន្ត្រីប៉ូលិសជាច្រើននាក់ដែលបានចូលរួមក្នុងប្រតិបត្តិការបង្ក្រាបទីតាំងដាំដំណាំកញ្ឆានេះ ហើយប្រតិបត្តិការនេះត្រូវចំណាយពេល ២ម៉ោង និងធ្វើឡើងនៅពីរកន្លែងផ្សេងគ្នា។ ដំបូងឡើយគេប្រទះឃើញចម្ការកញ្ឆាដែលមានទំហំត្រឹម ២ ហិកតាប៉ុណ្ណោះ ហើយក្រោយមកគេរកឃើញទីតាំងដាំកញ្ឆា មួយទៀតដែលមានទំហំ ៧ ហិកតា។
លោកបានបន្តថា៖ «នៅទីតាំងដំបូង វាមានចម្ការកញ្ឆា ២ហិកតា ដែលវាមានអាយុប្រហែល ៣ខែហើយមានកម្ពស់ប្រហែល ១,៥ម៉ែត្រឯណោះ។ ហើយទីតាំងទីពីរ ចម្ការកញ្ឆានោះមានទំហំ ៧ហិកតា ហើយវាមានអាយុប្រហែល ៦ខែ និងមានកម្ពស់ប្រហែល ៣ម៉ែត្រឯណោះ»។
ដំណាំកញ្ឆាមួយចំនួនត្រូវបានប៉ូលិសដកហូតទុកជាភ័ស្តុតាង ហើយនៅដំណាំនៅសេសសល់ត្រូវបានប៉ូលិសកម្ទេចចោលទាំងអស់។ ប៉ុន្តែទោះជាមានការកម្ទេចចោលដំណាំកញ្ឆារាប់ហិកតាក៏ដោយ គេមិនបានដឹងនៅឡើយទេថា អ្នកណាជាម្ចាស់ និងជាអ្នកដំណាំដំណាំនេះ៕
Tag:
ឥណ្ឌូនេស៊ី
អាឆេ
កញ្ឆា
© រក្សាសិទ្ធិដោយ thmeythmey.com