ឥណ្ឌូនេស៊ីសុំចិត្តមជ្ឈដ្ឋានខាងក្រៅឲ្យមើលចំណាត់ការខ្លួន ជាជាងរិះគន់ឥតប្រយោជន៍រឿងបញ្ហាឆេះព្រៃ

អន្តរជាតិ

ឥណ្ឌូនេស៊ីសុំចិត្តមជ្ឈដ្ឋានខាងក្រៅឲ្យមើលចំណាត់ការខ្លួន ជាជាងរិះគន់ឥតប្រយោជន៍រឿងបញ្ហាឆេះព្រៃ

29, Aug 2016 , 9:39 pm

រូបភាព

ឥណ្ឌូនេស៊ី កំពុងតទល់ជាមួយនឹងភ្លើងឆេះដី និងព្រៃ។ រូបថត Xinhua

ដោយ:

មិនខុសពីឆ្នាំមុនៗ ចាប់ផ្តើមពីអំឡុងខែសីហាដល់ខែតុលា ការបំពុលអព្ទ័ ដែលបណ្តាលមកពីផ្សែងនៃភ្លើងឆេះព្រៃរបស់ឥណ្ឌូនេស៊ី បាននិងកំពុងតែវាយប្រហារទាំងទៅលើលំហអាកាសនៃប្រទេសខ្លួនផ្ទាល់ និងប្រទេសជិតខាងទៀតផង។ ការណ៍បែបនេះ បានកើតឡើងស្ទើរតែក្លាយជាហេតុការណ៍បែបប្រពៃណីមួយទៅហើយសម្រាប់បងធំអាស៊ានមួយនេះ ដ្បិត មិនមែនវិធានការត្រូវបានធ្វើឡើងដើម្បីបញ្ចប់បញ្ហានេះប្រកបដោយប្រសិទ្ធភាពសោះ។ ខណៈខេត្តមួយចំនួនត្រូវបានប្រកាសដាក់ក្នុងភាពអាសន្នដោយការបំពុលអព្ទ័ រដ្ឋាភិបាលក្រុងហ្សាការតា ក៏បានសុំចិត្តមជ្ឈដ្ឋានខាងក្រៅឲ្យដាក់ភ្នែកមើលពីការប្រឹងប្រែងរបស់ខ្លួន ជាជាងចាំតែបន្ទោស និងរិះគន់ឥណ្ឌូនេស៊ីជាអ្នកបង្កបញ្ហានោះ។

រដ្ឋមន្ត្រីក្រសួងបរិស្ថាន និងព្រៃឈើឥណ្ឌូនេស៊ី លោកស្រី Siti Nurbaya នៅថ្ងៃទី២៨ ខែសីហាម្សិលមិញ បានចេញមុខបញ្ជាក់ថា រដ្ឋាភិបាលឥណ្ឌូនេស៊ី កំពុងតែដុតដៃដុតជើងដោយមិនបាននៅស្ងៀមឡើយដើម្បីតទល់ជាមួយនឹងភ្លើងឆេះដី និងព្រៃដែលកំពុងតែបង្កជាអព្ទ័និងផ្សែងក្នុងលំហអាកាសឥណ្ឌូនេស៊ី និងសិង្ហបុរី។ ទន្ទឹមគ្នានោះ លោកស្រីរដ្ឋមន្ត្រី បានទទូចឲ្យ«មជ្ឈដ្ឋានខាងក្រៅផ្តោតលើចំណាត់ការរបស់ឥណ្ឌូនេស៊ី ជំនួសដោយការរិះគន់វិញ។

ឥណ្ឌូនេស៊ី មិនខ្វល់ពីការប៉ះពាល់ដល់អ្នកជិតខាង?
យោងតាមសារព័ត៌មាន The Jakarta Post ចាប់ពីថ្ងៃទី២៦ខែសីហាមក យ៉ាងហោចណាស់មានខេត្តចំនួនប្រាំមួយនៃឥណ្ឌូនេស៊ី ត្រូវបានប្រកាសក្រោមភាពអាសន្នដោយសារតែកម្រាស់នៃផ្សែង និងអព្ទ័ក្រាស់ពេក ហើយអាជ្ញាធរបាននិងកំពុងតែពន្លត់ផងដែរនោះ។ ជាមួយគ្នានោះ លោកស្រីរដ្ឋមន្ត្រីបរិស្ថានឥណ្ឌូនេស៊ី ក៏បានអះអាងដែរថា ឥណ្ឌូនេស៊ី បន្តគោរពបណ្តឹងដែលប្តឹងដោយបណ្តាប្រទេសជិតខាង ប៉ុន្តែ ឥណ្ឌូនេស៊ី មិនមែនដោះស្រាយបញ្ហាដោយសារតែសម្ពាធពីប្រទេសជិតខាងនោះទេ។ រដ្ឋមន្ត្រីរូបនោះ សង្កត់ធ្ងន់ថា «រដ្ឋាភិបាលបានធ្វើការដោះស្រាយដើម្បីបំពេញកាតព្វកិច្ចសម្រាប់ប្រជាជនឥណ្ឌូនេស៊ីប៉ុណ្ណោះ។ លោកស្រីរដ្ឋមន្ត្រី ក៏សុំចិត្តមិត្តជិតខាងដោយ លើកឡើងថា « មជ្ឈដ្ឋានខាងក្រៅទាំងអស់ គួរតែចៀសវាងការផ្តល់អនុសាសន៍ដែលគ្មានប្រយោជន៍ ប៉ុន្តែ មើលពីការប្រឹងប្រែងឥណ្ឌូនេស៊ីដែលធ្វើឡើងជាលក្ខណៈប្រព័ន្ធ និងយ៉ាងយកចិត្តទុក»។

តាមពិតទៅ ភ្លើងឆេះព្រៃ និង អព្ទ័ មិនមែនទើបតែកើតឡើងនោះទេ ពោលគឺបញ្ហានេះ បានចាប់ផ្តើមតាំងពីឆ្នាំ១៩៩៧មកម្ល៉េះ។ បញ្ហានេះ មិនត្រឹមតែបានប៉ះពាល់ដល់សុខភាពប្រជាជនរបស់ឥណ្ឌូនេស៊ីប៉ុណ្ណោះទេ តែវាថែមទាំងប៉ះពាល់ដល់ការរស់នៅ និងសេដ្ឋកិច្ចរដ្ឋអាស៊ានមួយចំនួនដែលជារដ្ឋជិតខាងដូចជាម៉ាឡេស៊ី និងសិង្ហបុរីផងដែរ។ ហើយនោះ ក៏ព្រោះតែ ក្រុមហ៊ុន សាលារៀន និង កិច្ចការពាណិជ្ជកម្មផ្សេងៗមិនអាចដំណើរការបានដោយសារមានកម្រិតអព្ទ័ក្រាស់ពេក។ កាលពីឆ្នាំមុន ភ្លើងឆេះព្រៃ និងអព្ទ័នេះ ត្រូវបានមើលឃើញថាអាក្រក់បំផុត ដោយវា បានអូសបន្លាយអស់រយៈជាងមួយខែឯណោះ ដែលវាបានធ្វើឲ្យអ័ព្ទនៃការឆេះនោះអណ្តែតពាសពេញលំហនៅក្នុងប្រទេសឥណ្ឌូនេស៊ី ម៉ាឡេស៊ី និងសិង្ហបុរី។ អ្វីគួរកត់សម្គាល់នោះ ការដុតព្រៃខុសច្បាប់ ដែលបង្កឲ្យមានអព្ទ័ ភាគច្រើនផ្តើមចេញពីខេត្តពីរដែលរដ្ឋាភិបាលឥណ្ឌូនេស៊ី បានធ្វើសម្បទានទៅឲ្យក្រុមហ៊ុនរួមមានខេត្តស៊ូម៉ាត្រា និង កាលីម៉ាន់តាន់។

ក្រៅពីការសុំទោសអ្នកជិតខាង ឥណ្ឌូនេស៊ីបានធ្វើអ្វីខ្លះ?
គិតចាប់ពីបញ្ហាអព្ទ័ផ្ទុះឡើងមក ប្រធានាធិបតីឥណ្ឌូនេស៊ីស្ទើរតែគ្រប់រូប បានសុំការអភ័យទោសចំពោះការជះឥទ្ធិពលនោះ តែរដ្ឋាភិបាឥណ្ឌូនេស៊ី ក៏មិនដែលនៅស្ងៀមដែរ។ យោងតាមសេចក្តីថ្លែងការណ៍របស់ក្រសួងបរិស្ថាន និងព្រៃឈើឥណ្ឌូនេស៊ីដែលដកស្រង់ដោយសារព័ត៌មាន Channel News Asia ឥណ្ឌូនេស៊ី បានប្រើប្រាស់មធ្យោបាយចំរុះដើម្បីប្រឆាំងនឹងភ្លើងឆេះព្រៃនេះ រាប់បញ្ចូលទាំងទណ្ឌកម្មរដ្ឋបាល និងបណ្តឹងស៊ីវិល។ ហើយគិតចាប់ពីឆ្នាំមុន មានក្រុមហ៊ុនប្រមាណ៣០ កំពុងស្ថិតក្រោមទណ្ឌកម្មរដ្ឋបាល ដែលរាប់បញ្ចូលទាំងការដកអាជ្ញាបណ្ណទៀតផង។

ជុំវិញបញ្ហានេះដែរ រដ្ឋមន្ត្រីទទួលបន្ទុកការិយាល័យនាយករដ្ឋមន្ត្រីម៉ាឡេស៊ី លោក Shahidan Kassim នៅថ្ងៃទី២៦ ខែសីហាកន្លងទៅ បានអះអាងថាម៉ាឡេស៊ីបានត្រៀម យន្តហោះសង្គ្រោះប្រភេទ CL415 ដែលអាចផ្ទុកទឹកបានរហូតដល់៦០០០លីតរួចរាល់ហើយដើម្បីសហការ និងជួយឥណ្ឌូនេស៊ី នៅពេលមានសំណើសុំពីជំនួយនោះ។

ដោយឡែកសម្រាប់ស្ថាប័នអាស៊ានវិញ ហាក់ដូចជានៅស្ងៀមនៅឡើយនោះទេ បើទោះបីជា អាស៊ាន មានកិច្ចព្រមព្រៀងដែលជាយន្តការពាក់ព័ន្ធនឹងបញ្ហាអព្ទ័ក៏ដោយ។ កិច្ចព្រមព្រៀងនោះ មានឈ្មោះថាកិច្ចព្រមព្រៀងស្តីការបំពុលអព្ទ័ឆ្លងដែន ដែលទទួលបានការផ្តល់ពីឥណ្ឌូនេស៊ីនៅឆ្នាំ២០១៤ ដែលជារដ្ឋអាស៊ានចុងក្រោយគេដែលបានផ្តល់សច្ចាប័ននេះ។ តែកិច្ចព្រមព្រៀងដែលបានចូលជាធរមានពីរឆ្នាំហើយនោះ ហាក់ដូចជាមិនមានប្រសិទ្ធភាពអ្វីសោះលើបញ្ហានេះ៕