ដូណាល់ត្រាំ និងហ៊ីឡារី សន្យាទទួលស្គាល់លទ្ធផលបោះឆ្នោតទោះជាចាញ់ក្តី

អន្តរជាតិ

នយោបាយអន្តរជាតិ

ដូណាល់ត្រាំ និងហ៊ីឡារី សន្យាទទួលស្គាល់លទ្ធផលបោះឆ្នោតទោះជាចាញ់ក្តី

27, Sep 2016 , 11:18 am

រូបភាព

ដោយ: សៅ ផលនិស្ស័យ (Sao Phal Niseiy)

ក្នុងពេលបិទបញ្ចប់ការជជែកដេញដោលគ្នាលើកដំបូង លោក ដូណាល់ ត្រាំ និងលោកស្រី ហ៊ីឡារី គ្លីនតុន បានប្រកាសថា ខ្លួននឹងទទួលស្គាល់លទ្ធផលបោះឆ្នោតទោះជាលទ្ធផលបែបណាក៏ដោយ។ លោក ដូណាល់ ត្រាំ ដែលធ្លាប់ចោទថា ប្រព័ន្ធបោះឆ្នោតអាមេរិកមិនល្អនិងសុក្រឹតនោះហាក់ព្រមទទួលស្គាល់ថា លទ្ធផលបោះឆ្នោតផ្លូវការជាលទ្ធផលចុងក្រោយមិនអាចប្រកែកបាន ។

ការជជែកដេញដោលរវាងបេក្ខជនប្រធានាធីបតីបានបញ្ចប់ទៅដោយរលូន ប៉ុន្តែគេរង់ចាំមើលការវិភាគជាហូរហែរដែលថាអ្នកណាធ្វើល្អ ឬមិនល្អនោះ។ ប៉ុន្តែអ្វីដែលគួរឲ្យកត់សម្គាល់បិទបញ្ចប់ការជជែកដេញដោលលើកដំបូងនេះ អ្នកសម្របសម្រួល Lester Holt សួរថានៅថ្ងៃបោះឆ្នោតខែវិច្ឆិកា តើអ្នកទាំងពីរនឹងទទួលស្គាល់លទ្ធផលឬអត់ពេលចាញ់ឆ្នោត?

បេក្ខជនទាំងពីរទទួលស្គាល់ថា វាជាការប្រកួតប្រជែងដែលមានចាញ់មានឈ្នះ ។ ហើយបើបេក្ខជនណាមួយចាញ់ក៏ត្រូវទទួលស្គាល់ថា«ចាញ់» ហើយគាំទ្រអ្នកដែល«ឈ្នះ»ទៅ។

លោកស្រី ហ៊ីឡារី គ្លីនតុន បានប្រកាសពេញៗមាត់ថា លោកស្រី គាំទ្រប្រជាធិបតេយ្យ ដែលពេលខ្លះបេក្ខជនអាចឈ្នះ ហើយពេលខ្លះគេអាចចាញ់ដូចគ្នា។ ហើយលោកស្រីសន្យាថា នឹងទទួលស្គាល់លទ្ធផលបោះឆ្នោតនៅខែវិច្ឆិកាខាងមុខទោះជាបែបណាក៏ដោយ។

លោកស្រីថ្លែងថា៖«ខ្ញុំគាំទ្រប្រព័ន្ធប្រជាធិបតេយ្យរបស់យើង។ ហើយពេលខ្លះអ្នកឈ្នះ ហើយពេលខ្លះអ្នកក៏ចាញ់ដែរ។ ប៉ុន្តែខ្ញុំប្រាកដចិត្តណាស់ថា ខ្ញុំនឹងទទួលស្គាល់លទ្ធផលនៃការបោះឆ្នោត»។ ប៉ុន្តែលោកស្រី មានជំនឿលើប្រជាជនអាមេរិក ដែលនឹងសម្រេចចិត្តបោះឆ្នោត ព្រោះវាមិនមែនជាការបោះឆ្នោតដើម្បីក្រុមឬអ្នកណាមួយទេ តែដើម្បីអាមេរិកទាំងមូល។

ចំណែកលោក ដូណាល់ ត្រាំ ឯណោះវិញ ក៏មិនខុសពីលោកស្រី ហ៊ីឡារី គ្លីនតុនដែរ។ លោកថា លោកចង់ក្លាយជាប្រធានាធិបតីអាមេរិកដើម្បីដឹកនាំនិងធ្វើឲ្យអាមេរិកកាន់តែខ្លាំងនិងអស្ចារ្យឡើង។ ប៉ុន្តែលោកមិនឡាំប៉ាក្រោយការបោះឆ្នោតដោយទាត់ចោលលទ្ធផលផ្លូវការឡើយ។ «ខ្ញុំចង់ធ្វើឲ្យអាមេរិកអស្ចារ្យជាថ្មីទៀត។ ប៉ុន្តែបើសិនជាលោកស្រី ហ៊ីឡារី ឈ្នះឆ្នោតវិញនោះ ខ្ញុំពិតជាទទួលស្គាល់លទ្ធផលពេញទំហឹងតែម្តង»។ នេះជាការលើកឡើងរបស់លោក ដូណាល់ ត្រាំ។ វាក្លាយជាចម្ងល់មួយដែរ នៅពេលដែលលោក ដូណាល់ ត្រាំ សន្យាថានឹងទទួលស្គាល់លទ្ធផលបោះឆ្នោត ព្រោះតាំងពីដើមលោក តែងចោទប្រកាន់ប្រព័ន្ធបោះឆ្នោតអាមេរិកនិងអះអាងថាមានការកេងបន្លំពេលបោះឆ្នោតទៀត។

សូមបញ្ជាក់ថា លោក ដូណាល់ ត្រាំ និងលោកស្រី ហ៊ីឡារី គ្លីនតុន នឹងជួបគ្នាក្នុងការជជែកដេញដោលបន្ទាប់នៅថ្ងៃ អាទិត្យ ទី ៩ តុលា ខាងមុខទៀត។ កម្មវិធីពិសេសនេះនឹងត្រូវរៀបចំឡើងនៅសាកលវិទ្យាល័យ Washington នៅក្រុង St. Louis នារដ្ឋ Missouri។វេទិកាជជែកដេញដោលលើកទី ២នេះ នឹងផ្តល់ឱកាសឲ្យអ្នកចូលរួមសួរសំណួរ បេក្ខជនបានពាក់កណ្តាល ហើយសំណួរពាក់កណ្តាលទៀតនឹងត្រូវសួរដោយអ្នកសម្របសម្រួល៕