បន្ទាប់ពីចិន ប្រធានាធិបតីហ្វីលីពីន នឹងបំពេញទស្សកិច្ចនៅជប៉ុននាសប្តាហ៍ក្រោយ

អន្តរជាតិ

បន្ទាប់ពីចិន ប្រធានាធិបតីហ្វីលីពីន នឹងបំពេញទស្សកិច្ចនៅជប៉ុននាសប្តាហ៍ក្រោយ

23, Oct 2016 , 9:39 pm

រូបភាព

លោកប្រធានាធិបតីហ្វីលីពីន នាពេលបំពេញទស្សនកិច្ចទៅកាន់ចិន (រូបភាពដោយ៖ វិមានប្រធានាធិបតីហ្វីលីពីន)

ដោយ:

លោកប្រធានាធិបតីហ្វីលីពីន រ៉ូឌ្រីហ្គូ ឌើទើតេ នឹងបំពេញទស្សនកិច្ចផ្លូវរដ្ឋទៅកាន់ជប៉ុនចាប់ពីថ្ងៃទី២៥ដល់ថ្ងៃទី២៧ ខែតុលាខាងមុខនេះ។ ក្នុងអំឡុងពេលបីថ្ងៃនៃដំណើរទស្សនកិច្ចនេះដែរ លោកប្រធានាធិបតី នឹងចូលសម្តែងការគួរសមជាមួយនឹងអធិរាជជប៉ុន និងជួបពិភាក្សាជាមួយនឹងនាយករដ្ឋមន្ត្រីជប៉ុនលោក ស៊ិនហ្សូ អាបេ ដើម្បីពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ។

រដ្ឋមន្ត្រីទទួលបន្ទុកកិច្ចការនយោបាយជប៉ុន Atsushi Ueno បានអះអាងថា លោក អាបេ និងលោក ឌើទើតេ អាចនឹងជជែកលើបញ្ហាទ្វេភាគី និងបញ្ហាក្នុងតំបន់ ជាពិសេសនោះ មេដឹកនាំទាំងពីរ ក៏អាចនឹងនិយាយពីបញ្ហាសមុទ្រចិនខាងត្បូងរវាងហ្វីលីពីន និងចិនផងដែរ។ នេះបើយោងតាមការចុះផ្សាយរបស់សារព័ត៌មានហ្វីលីពីន Rappler។

ការអះអាងរបស់មន្ត្រីជាន់ខ្ពស់ជប៉ុននេះ ក៏ស្របជាមួយនឹងការបង្ហាញពីចេតនារបស់ប្រធានាធិបតីហ្វីលីពីនក្នុងការចង់ឲ្យជប៉ុនចូលរួមចំណែកដើម្បីដោះស្រាយជម្លោះជាមួយចិនផងដែរ។ ក្នុងសន្និសីទសារព័ត៌មាននៅថ្ងៃទី២១ ខែតុលា បន្ទាប់ពីបញ្ចប់ទស្សនកិច្ចនៅចិន លោក រ៉ូឌ្រីហ្គូ ឌើទើតេ បានអះអាងថា លោក មិនប្រាកដថា នឹងជជែកពីបញ្ហាសមុទ្រចិនខាងត្បូងជាមួយនឹងលោកនាយករដ្ឋមន្ត្រីជប៉ុននោះ ដ្បិត វាអាស្រ័យលើស្ថានភាព។

លោក បានសង្កត់ធ្ងន់យ៉ាងដូច្នេះថា « វា (ការជជែកពីបញ្ហាសមុទ្រចិនខាងត្បូង) អាចជាតាមលក្ខណៈទ្វេភាគី ដោយអាស្រ័យលើការអភិវឌ្ឍ។ ហើយវា ក៏អាចជាលក្ខណៈពហុភាគី ដែលរួមបញ្ចូលទាំងជប៉ុនផងដែរនោះ។ ទាំងនេះហើយ ដែលជាអ្វីដែលខ្ញុំ អាចនឹងធ្វើនាពេលខាងមុខ»។

តាមពិតទៅ លោកប្រធានាធិបតី រ៉ូឌ្រីហ្គូ ឌើទើតេ ក៏ធា្លប់ជួបជជែកជាមួយនឹងលោកនាយករដ្ឋមន្ត្រីស៊ិនហ្សូ អាបេ នៅក្រៅកិច្ចប្រជុំពាក់ព័ន្ធអាស៊ាននៅឡាវដែលជាកន្លែងលោកអាបេ អញ្ជើញលោក ឌើទើតេ ទៅទស្សនកិច្ចនៅជប៉ុន ម្តងរួចហើយ។ នៅពេលនោះ ភាគីទាំងពីរ ក៏បានជជែកពីទំនាក់ទំនងទ្វេភាគី ជាពិសេសនោះ ជប៉ុន ក៏បានផ្តល់ប្រឹក្សាយោបល់ដល់ហ្វីលីពីនលើបញ្ហាសមុទ្រចិនខាងត្បូង ដោយ លោក អាបេ ក៏ឆ្លៀតលើកឡើងពីផែនការរបស់ជប៉ុនក្នុងការផ្តល់នាវាចម្បាំងពីរគ្រឿងដល់ហ្វីលីពីន និងឲ្យហ្វីលីពីនជួលយន្តហោះស៊ើបការណ៍ប្រាំគ្រឿងដើម្បីពង្រឹងសមត្ថភាពសន្តិសុខទៀតផង។

សូមជម្រាបផងដែរថា ក្រៅពីអាមេរិក ជប៉ុន ក៏ជាសម្ព័ន្ធមិត្តរបស់ហ្វីលីពីនយ៉ាងជិតស្និទ្ធផងដែរ។ ក្នុងរដ្ឋបាលរបស់អតីតប្រធានាធីបតីហ្វីលីពីន លោកប៊ែរនីណូ អាហ្គីណូ ជប៉ុន ក៏បានចូលរួមជ្រោមជ្រែងហ្វីលីពីនយ៉ាងសកម្មដើម្បីតទល់ជាមួយនឹងចិនលើជម្លោះសមុទ្រចិនខាងត្បូងក្នុងឆាកអន្តរជាតិផងដែរ។ ក្នុងនោះ ជប៉ុន ក៏បានកៀងគោសហគមន៍អន្តរជាតិដើម្បីគាំទ្រសាលក្រមសមុទ្រចិនខាងត្បូងដែលតុលាការកាត់ឲ្យហ្វីលីពីនឈ្នះក្តីចិន តាមបណ្តឹងរបស់រដ្ឋាភិបាលលោក លោកប៊ែរនីណូ អាហ្គីណូ។

បើទោះបីជារដ្ឋបាលថ្មីរបស់លោកប្រធានាធិបតី រ៉ូឌ្រីហ្គូ ឌើទើតេ បានបង្ហាញរបត់គោលនយោបាយការបរទេសខ្លាំងទៅរកចិន ដែលជាគូបដិបក្ខរបស់ជប៉ុនទាំងឥទ្ធិពលនៅក្នុងតំបន់ និងជម្លោះក្នុងតំបន់នោះ ហ្វីលីពីន នៅតែត្រូវជាមួយជប៉ុនដដែល។ ជាក់ស្តែងនោះ រដ្ឋាភិបាលថ្មីហ្វីលីពីន ក៏ធ្លាប់និយាយដោយផ្ទាល់ថា ប្រសិនបើអាមេរិក ចង់ដកខ្លួនពីហ្វីលីពីនដោយសារតែការប្រើពាក្យសម្តីវាយប្រហារខ្លាំងរបស់ហ្វីលីពីននោះ ហ្វីលីពីន អាចពឹងសម្ព័ន្ធមិត្តផ្សេងទៀតរបស់ខ្លួន ដែលរាប់បញ្ចូលទាំងជប៉ុនផងដែរនោះ៕