ជាតិ
តុលាការ កោះហៅប្រធានសមាគមអាដហុក ទៅសួររឿងស្រីមុំ
× ភ្នំពេញ៖ តាមការកំណត់នៅក្នុងដីកា លោក ធន សារ៉ាយ ត្រូវចូលទៅបំភ្លឺ នៅសាលាដំបូងរាជធានីភ្នំពេញ នៅថ្ងៃទី២៤ ខែតុលា ឆ្នាំ២០១៦ នេះ ជុំវិញដំណើររឿងដែលទាក់ទងនឹងស្រីមុំ។ ប៉ុន្តែ លោក ធន សារ៉ាយ មិនបានចូលទៅកាន់តុលាការនោះទេ ដោយសារតែកំពុងបំពេញបេសកកម្មនៅប្រទេសក្រៅ។
ចៅក្រមស៊ើបសួរនៃសាលាដំបូងរាជធានីភ្នំពេញ បានចេញដីកាកោះហៅលោក ធន សារ៉ាយ ប្រធានសមាគមអាដហុក ដើម្បីឲ្យបង្ហាញខ្លួននៅក្នុងតុលាការ ក្នុងនាមជាសាក្សី។ ការកោះហៅលោក ធន សារ៉ាយ គឺដើម្បីសួរដេញដោល ពីដំណើររឿង «សូកប៉ាន់សាក្សី» ដែលទាក់នឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ កន្លងមក។
លោក សឺន សែនករុណា មន្ត្រីជាន់ខ្ពស់ផ្នែកស៊ើបអង្កេតនៃសមាគមអាដហុក បានប្រាប់ សារព័ត៌មានថ្មីៗនៅព្រឹកថ្ងៃចន្ទនេះថា លោក ធន សារ៉ាយ កំពុងតែបំពេញបេសកម្មនៅឯបរទេស ដូច្នេះមិនអាចចូលទៅកាន់តុលាការនោះទេ។ លោក សឺន សែនករុណា បន្តទៀតថា មេធាវីរបស់លោក ធន សារ៉ាយ ទំនងជាដាក់លិខិតសុំពន្យារពេល ទៅកាន់តុលាការរួចហើយ។
យ៉ាងណាក៏ដោយ មន្ត្រីជាន់ខ្ពស់សមាគមអាដហុករូបនេះ មិនបានដឹងថា លោក ធន សារ៉ាយ នឹងវិលមកកម្ពុជាវិញនៅពេលណានោះទេ ហើយក៏មិនបានបញ្ជាក់ថា លោក ធន សារ៉ាយ ទៅបំពេញបេសកកម្មនៅប្រទេសណាដែរ។
ជុំវិញបញ្ហានេះ សារព័ត៌មានថ្មីៗ មិនអាចទាក់ទងមេធាវីរបស់លោក ធន សារ៉ាយ ដើម្បីសុំអត្ថាធិប្បាយបានទេ។
សូមបញ្ជាក់ថា ដោយសារតែរឿងរ៉ាវរបស់ស្រីមុំ មន្ត្រីជាន់ខ្ពស់នៃសមាគមអាដហុកចំនួន ៤ រូប រួមមាន លោក នី សុខា, លោក ណៃ វង់ដា, លោក យី សុខសាន្ត និងលោកស្រី លឹម មុន្នី បានជាប់ពន្ធនាគារ។ តុលាការ បានចោទអ្នកទាំង៤ខាងលើ ពីបទ «សូកប៉ាន់សាក្សី»។ មិនមែនមានតែមន្ត្រីសិទ្ធិមនុស្សទាំង៤រូបនោះទេ ដែលមានក្តីក្តាំនៅតុលាការ ព្រោះតែរឿងរបស់ស្រីមុំ លោក នី ចរិយា អគ្គលេខាធិការរងរបស់គណៈកម្មាធិការជាតិរៀបចំការបោះឆ្នោត (គជប) ក៏ជាប់ពន្ធនាគារ ជុំវិញរឿងនេះដែរ។ តុលាការ ចោទ លោក នី ចរិយា ពីបទ «សមគំនិតក្នុងរឿងសូកប៉ាន់សាក្សី»។
អ្នកទាំង៥រូបនេះ ត្រូវបានតុលាការបញ្ជូនទៅឃុំខ្លួនបណ្តោះអាសន្ន កាលពីថ្ងៃទី២ ខែឧសភា ឆ្នាំ២០១៦ ៕
Tag:
ស្រីមុំ
អាដហុក
ធន សារ៉ាយ
តុលាការ
កោះហៅ
© រក្សាសិទ្ធិដោយ thmeythmey.com