ជាតិ
សេដ្ឋកិច្ច
ចិនបោះទុន ២ពាន់លានដុល្លារបង្កើតសួនកសិ-ឧស្សាហកម្មនៅកម្ពុជា ដើម្បីឲ្យការនាំចេញកសិផលត្រូវតាមស្ដង់ដារ
× ភ្នំពេញ៖ គម្រោងវិនិយោគដ៏ធំថ្មីមួយទៀតរបស់វិនិយោគិនចិន គឺការបង្កើតសួនកសិ-ឧស្សាហកម្មនៅក្នុងខេត្តកំពង់ស្ពឺ ដែលត្រូវបានប៉ាន់ស្មានថានឹងចំណាយទឹកប្រាក់ ២ពាន់លានដុល្លារ។ បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ សួនដែលមានទំហំដីជាង ៣០០ហិកតានេះ នឹងមានកសាងហេដ្ឋារចនាសម្ព័ន្ធចង្វាក់ផលិតកម្មកសិ-ឧស្សាហកម្ម ដូចជាឃ្លាំង ឧស្សាហកម្មវេចខ្ចប់ទំនិញ និងវិទ្យាស្ថានត្រួតពិនិត្យភូតគាមអនាម័យ។
ថ្លែងប្រាប់អ្នកសារព័ត៌មានក្រោយកិច្ចប្រជុំលើបញ្ហាស្រូវអង្កររវាងក្រសួងកសិកម្ម និងសហព័ន្ធស្រូវអង្ករកម្ពុជា នៅថ្ងៃទី៣០ខែវិច្ឆិកានេះ លោក វេង សាខុន ឲ្យដឹងថា សួននេះ ជាជំហានដំបូង នឹងក្លាយជាកន្លែងត្រួតពិនិត្យស្ដង់ដារអនាម័យ និងការវេចខ្ចប់ផលិតផលកសិកម្ម ដែលគ្រោងនាំចេញទៅប្រទេសចិន។ «ជាបឋមគឺនាំទៅចិន ដែលធ្វើឲ្យចិនបានល្អហើយយើងអាចនាំទៅប្រទេសផ្សេងទៀត»។ នេះជាការបញ្ជាក់របស់ លោក វេង សាខុន មុននឹងលោកបន្ថែមថា ផលិតផលដែលឆ្លងកាត់ការត្រួតពិនិត្យពីទីកន្លែងនោះ នឹងទទួលបានវិញ្ញាបនបត្រតាមអេឡិចត្រូនិក (E-Certification) ដែលគេទទួលស្គាល់ជាទូទៅ។
សូមស្ដាប់ប្រសាសន៍ លោក វេង សាខុន ខាងក្រោមនេះ៖
បើតាមលោក វេង សាខុន សួនកសិ-ឧស្សាហកម្មនេះ នឹងមានការបំពាក់ប្រព័ន្ធសូឡាផងដែរ។ ពាក់ព័ន្ធនឹងការវេចខ្ចប់ទំនិញសម្រាប់នាំចេញ និងភូតគាមអនាម័យ លោក វេង សាខុន បានថ្លែងក្នុងកិច្ចប្រជុំខាងលើនេះយ៉ាងដូច្នេះថា៖ «យើងត្រូវគិតវែងឆ្ងាយលើបញ្ហានេះ ដើម្បីបង្កើនទំនុកចិត្តរបស់អ្នកទិញរបស់យើង»។
បន្ថែមពីលើនេះលោក វេង សាខុន បានបន្ថែមថា ប្រទេសចិនបានអនុញ្ញាតឲ្យនាំចូលកសិផលពីកម្ពុជាជាង២០០មុខ ដោយមិនយកពន្ធ ប៉ុន្តែកម្ពុជាអាចចាប់យកការអនុគ្រោះពន្ធនោះតែ ៤មុខទំនិញប៉ុណ្ណោះ ដែលក្នុងនោះមានមុខទំនិញអង្ករផងដែរ៕
Tag:
សួនកសិ-ឧស្សាហកម្ម
វេង សាខុន
© រក្សាសិទ្ធិដោយ thmeythmey.com