រដ្ឋមន្ត្រីកសិកម្ម បារម្ភពីចំណូលរបស់កសិករ មិនឆ្លើយតបនឹងកំណើនសេដ្ឋកិច្ចជាតិបច្ចុប្បន្ន

បទយកការណ៍ / បទសម្ភាសន៍

សេដ្ឋកិច្ច

រដ្ឋមន្ត្រីកសិកម្ម បារម្ភពីចំណូលរបស់កសិករ មិនឆ្លើយតបនឹងកំណើនសេដ្ឋកិច្ចជាតិបច្ចុប្បន្ន

04, Dec 2016 , 11:04 am

រូបភាព

ដោយ:

ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ព្រួយបារម្ភពីចំណូលរបស់កសិករ ដែលមិនទាន់ឆ្លើយតបនឹងការលូតលាស់ម៉ាក្រូសេដ្ឋកិច្ចសព្វថ្ងៃ។ លោកលើកឡើងថា ក្នុងរយៈពេល១០ឆ្នាំមុន កសិកររកចំណូលបានពីរបីរយដុល្លាពីដីស្រែ១ហិកតា ត្រូវចាត់ទុកថា អ្នកមាន ប៉ុន្តែបច្ចុប្បន្នកសិករនៅតែទទួលទិន្នផល និងចំណូលដដែល គឺត្រូវចាត់ទុកថាអ្នកក្រ ខណៈដែលសេដ្ឋកិច្ចកម្ពុជា មានកំណើន ៧ ភាគរយ និងចំណូលជាមធ្យមសម្រាប់មនុស្សម្នាក់ឡើងដល់ ១៣០០ដុល្លារក្នុងមួយឆ្នាំ (GDP Per Capita)។

ថ្លែងក្នុងកិច្ចប្រជុំដោះស្រាយបញ្ហាស្រូវអង្ករនៅទីស្ដីការក្រសួងកសិកម្ម នៅថ្ងៃទី ៣០ ខែវិច្ឆិកា លោក វេង សាខុន មានប្រសាសន៍ថា ក្នុងពេលបច្ចុប្បន្ន ទិន្នផលស្រូវរបស់កសិករត្រូវតែបង្កើនឲ្យដល់ ៥ ទៅ ៦តោនក្នុង១ហិកតា ហើយចំនួននេះត្រូវបង្កើនឲ្យដល់ ៨ តោន បើ GDP Per Capita កើនឡើងដល់ ២០០០ដុល្លារនៅពេលអនាគត។

សូមស្ដាប់ប្រសាសន៍ លោក វេង សាខុន ខាងក្រោមនេះ៖

ចំពោះដំណោះស្រាយលើបញ្ហាកសិកម្ម លោក វេង សាខុន បានផ្ដោតសំខាន់លើការធ្វើកិច្ចសន្យាកសិកម្ម (Farming Contract) ដែលមានបីភាគីចូលរួម រួមមាន ភាគីរដ្ឋ វិស័យឯកជន (ក្រុមហ៊ុនប្រមូលទិញកសិផល) និងសហគមន៍កសិកម្ម ដើម្បីធានាតម្លៃកសិផល និងទទួលកិច្ចសហការផ្សេងៗ ដូចជាលើផ្នែកពូជ បច្ចេកទេសជាដើម។ លោកថ្លែងដូច្នេះថា៖«កសិកម្មនេះមិនអាចធ្វើតែឯងបានទេ ព្រោះត្រូវការទីផ្សារ ដូច្នេះត្រូវប្រទាញប្រទង់គ្នា។ បើដៃគូសហការចូលមក បើមើលឃើញថាសហគមន៍មួយណឹងនៅខ្វះអ្វី ត្រូវជួយគ្នា ទើបយើងអាចជោគជ័យបាន»។

ក្រៅពីនេះ លោកបានជំរុញឲ្យស្ថាប័នពាក់ព័ន្ធផ្សេងទៀតមានវិធានការជាក់លាក់ ដើម្បីបញ្ចុះថ្លៃដើមទាក់ទងនឹងកសិកម្ម។ ដោយឡែកសម្រាប់បញ្ហាទឹក លោក សាខុន ឲ្យដឹងថា ក្រសួងនឹងស្នើទៅរដ្ឋាភិបាលលើការលើកកម្ពស់ប្រព័ន្ធធានាសាស្ត្រ ដែលក្រសួងធនធានទឹក និងឧតុនិយម ជាអ្នកមានសមត្ថកិច្ច។ រដ្ឋមន្ត្រីក្រសួងកសិកម្មរូបនេះ បានផ្ដួចផ្ដើមគំនិតកែលម្អប្រព័ន្ធធារាសាស្ត្រ ដើម្បីផ្ដល់ទឹកគ្រប់គ្រាន់ និងបង្ករភាពងាយស្រួលដល់កសិករ ដោយលោកលើកឡើងដូច្នេះថា៖«យើងរៀបចំប្រព័ន្ធស្រោចស្រព ធ្វើម៉េចឲ្យទឹកហូរចូលស្រែតែម្ដង ដើម្បីកាត់បន្ថយការចំណាយដើមទុនរបស់កសិករ»៕

បើតាមរបាយការណ៍ស្រាវជ្រាវរួមគ្នាមួយរបស់សហព័ន្ធស្រូវអង្ករកម្ពុជា និងធនាគារជាតិនៃកម្ពុជា ចេញផ្សាយនៅខែកញ្ញាឆ្នាំ២០១៦នេះ លទ្ធភាពបង្កបង្កើនផលស្រូវរបស់កម្ពុជានៅមានកម្រិតទាបបើធៀបនឹងប្រទេសជិតខាង។ កម្ពុជាទទួលផលស្រូវក្នុងមួយហិកតាគិតជាមធ្យម ៣,៣តោន, ថៃ ៣,៥តោន, ឡាវ ៤,១តោន, វៀតណាម ៦,២តោន និងប្រទេសឥណ្ឌូនេស៊ី ៥,៧តោន៕