អូបាម៉ា ប្រាប់ឲ្យសន្តិសុខប្រុងជើងការខ្ពស់ក្នុងថ្ងៃស្បថចូលកាន់តំណែងរបស់ ដូណាល់ ត្រាំ

អន្តរជាតិ

អូបាម៉ា ប្រាប់ឲ្យសន្តិសុខប្រុងជើងការខ្ពស់ក្នុងថ្ងៃស្បថចូលកាន់តំណែងរបស់ ដូណាល់ ត្រាំ

18, Jan 2017 , 7:59 pm

រូបភាព

ដោយ: ថ្មីៗ

នៅសល់២ថ្ងៃ ទៀតប៉ុណ្ណោះ ពិធីស្បថចូលកាន់តំណែងរបស់ប្រធានាធិបតីអាមេរិកទី ៤៥ លោក ដូណាល់ ត្រាំ មកដល់។ គេឃើញមានការរៀបចំតុបតែងយ៉ាងមមាញឹកបំផុតនៅវិមាន Capitol ដើម្បីត្រៀមស្វាគមន៍ពិធីជាប្រវត្តិសាស្ត្រនេះ។ លោក បារ៉ាក់ អូបាម៉ា បានប្រាប់ឲ្យបណ្តាក្រុមសន្តិសុខរក្សាការប្រុងប្រយ័ត្នខ្ពស់បំផុតក្នុងថ្ងៃស្បថចូលកាន់តំណែង របស់លោក ដូណាល់ ត្រាំនេះ។

ប្រធានាធិបតីទី ៤៥ អាមេរិកនឹងស្បថចូលកាន់តំណែងជាផ្លូវការនៅថ្ងៃសុក្រទី ២០មករានេះ។ គេឃើញមានការរៀបចំតុបតែងលម្អវិមាន Capitol និងមានការរៀបចំរឹតបន្តឹងសន្តិសុខត្រៀមស្វាគមន៍ពិធីស្បថចូលកាន់តំណែងនេះដែរ។

ក្នុងពេលជួបជាមួយក្រុមមន្ត្រីប្រឆាំងភេរវកម្មនិងមន្ត្រីការពារសន្តិសុខផ្ទៃក្នុងនាថ្ងៃអង្គារទី ១៧មករា ប្រធានាធិបតីចប់អាណត្តិលោក បារ៉ាក់ អូបាម៉ា បានបញ្ជានិងផ្តាំផ្ញើដល់ក្រុមសន្តិសុខ ទាំងនោះប្រុងជើងការឲ្យបានខ្ពស់ដើម្បីការពារសុវត្ថិភាពនិងសន្តិសុខនៅថ្ងៃ២០មករានេះ។

យោងតាមសេចក្តីប្រកាសព័ត៌មានរបស់សេតវិមានអាមេរិក មន្ត្រីសន្តិសុខបារម្ភថា ក្រុមភេរវជនជ្រុលនិយមនឹងឆ្លៀតឱកាសវាយប្រហារនិងបង្កបញ្ហានានានៅថ្ងៃ ២០មករា នោះ។

យោងតាមទីភ្នាក់ងារព័ត៌មាន Xinhua កងកម្លាំងសន្តិសុខប្រហែល ២៨០០០ នាក់នឹងត្រូវពង្រាយនៅក្រុងវ៉ាស៊ីនតោនដើម្បីការពារសន្តិសុខ និងសុវត្ថិភាពថ្ងៃស្បថចូលកាន់តំណែងនេះ។

ដោយឡែក បើតាមសេចក្តីប្រកាសព័ត៌មានដដែល លោក បារ៉ាក់ អូបាម៉ា បានឆ្លៀតឱកាសក្នុងជំនួបជាមួយមន្ត្រីសន្តិសុខរៀបរាប់ដោយសង្ខេបពីស្ថានភាពប្រតិបត្តិការប្រឆាំងភេរវកម្មនៅស៊ីរីនិងអ៊ីរ៉ាក់ដែរ។ លោកបានសង្កត់ធ្ងន់ថា ការដឹកនាំសម្ព័ន្ធអន្តរជាតិរបស់អាមេរិកប្រឆាំងភេរវកម្មកំពុងស្ថិតនៅលើផ្លូវត្រូវ និងឈានទៅរកជ័យជម្នះលើក្រុមភេរវជននេះនៅពេលអនាគតដ៏ខ្លីខាងមុខ។

ខាងក្រោមនេះជារូបភាពនៃការរៀបចំតុបតែងលម្អនៅ វិមាន Capitol មុនការមកដល់នៃពិធីស្បថចូលកាន់តំណែង៖