ដោយ ឈួន ឈីវអ៊ីង
ប្រធានាធិបតីអាហ្វ្រិកខាងត្បូងលោក Cyril Ramaphosa នៅថ្ងៃទី២៦ មករា បានស្នើឲ្យ ប្រទេសអ្នកមានបញ្ឈប់ការប្រមូលវ៉ាក់សាំងកូវីដ-១៩ ទៅស្តុកទុកលើសពីតម្រូវការ ខណៈប្រទេសជាច្រើនសុទ្ធតែត្រូវការវាដើម្បីប្រយុទ្ធប្រឆាំងនឹងការរីករាលដាលនៃកូវីដ-១៩នេះ។
បណ្តាប្រទេសមានធនធានជាច្រើនបន្តនាំគ្នាទិញវ៉ាក់សាំងការពារជំងឺកូវីដ-១៩ ខណៈដែលប្រទេសក្រីក្រជាច្រើនដែលទាន់មានលទ្ធភាពទិញនៅឡើយ ពិសេសប្រទេសនៅទ្វីបអាហ្វ្រិក។
ជាក់ស្តែង បណ្តាប្រជាជាតិទូទាំងទ្វីបអាហ្វ្រិក គឺកំពុងតែព្យាយាមទាំងលំបាកលំបិនដើម្បីធានាឱ្យមានវ៉ាក់សាំងគ្រប់គ្រាន់ ក្នុងការចាប់ផ្តើមយុទ្ធនាការចាក់វ៉ាក់សាំងជូនប្រជាពលរបស់គេប្រមាណ ១.៣ពាន់លាននាក់។
មូលហេតុនេះហើយ ប្រធានាធិបតីអាហ្វ្រិកខាងត្បូងលោក Cyril Ramaphosa បានចេញមុខអំពាវនាវឲ្យបណ្តាប្រទេសទាំងនោះពិចារណាប្តូរផ្លាស់ឥរិយាបថ ដើម្បីធានាថា វ៉ាក់សាំងទាំងនេះនឹងត្រូវបានចែកចាយទៅប្រទេសក្រីក្រដែលត្រូវការដែរនោះ។
«ពួកយើងត្រូវការឱ្យបណ្តាប្រទេសអ្នកមានដែលបានប្រមូលវ៉ាក់សាំងទៅស្តុកទុក បញ្ចេញវ៉ាក់សាំងមកវិញខ្លះដើម្បីឱ្យប្រទេសផ្សេងទៀតទទួលបានផង»។ នេះជាការលើកឡើងរបស់ប្រធានាធិបតីអាហ្វ្រិកខាងត្បូងក្នុងកិច្ចប្រជុំសេដ្ឋកិច្ចពិភពថ្ងៃ ២៦ ខែមករា។
មេដឹកនាំរូបនេះបានបន្ថែមទៀតថា បណ្តាប្រទេសអ្នកមានទទួលបានបញ្ជាទិញវ៉ាក់សាំងយ៉ាងច្រើនដូស ខណៈប្រទេសខ្លះនោះទទួលបានច្រើនជាង៤ដងនៃចំនួនប្រជាជនដែលត្រូវការទៅទៀត។ នេះបើយោងតាមទីភ្នាក់ងារព័ត៌មាន Reuters។
លោក Ramaphosa ដែលបច្ចុប្បន្នក៏ជាប្រធានសហភាពអាហ្វ្រិកដែរនោះ ចង់ឱ្យប្រទេសក្នុងទ្វីបអាហ្វ្រិក ទទួលបានវ៉ាក់សាំងលឿនដូចបណ្តាប្រទេសដទៃដែរ។
គិតមកត្រឹមថ្ងៃទី២៦ មករានេះ អាហ្វ្រិកខាងត្បូងមានករណីវិជ្ជមានសរុប ១,៤១៧,៥៣៧ ករណី និងមានអ្នកស្លាប់ ៤១,១១៧នាក់ ខណៈមានករណីជាសះស្បើយចំនួន ១,២៤១,៤២១ករណីមកហើយ៕