ស្ថានទូតជួយពលករខ្មែរ៦នាក់ និងទារិកាម្នាក់ នៅម៉ាឡេស៊ី ឲ្យត្រឡប់មកកម្ពុជាវិញ

ជាតិ

ស្ថានទូតជួយពលករខ្មែរ៦នាក់ និងទារិកាម្នាក់ នៅម៉ាឡេស៊ី ឲ្យត្រឡប់មកកម្ពុជាវិញ

27, Jan 2021 , 4:06 pm

រូបភាព

ពលករខ្មែរទាំង៦នាក់ ដែលត្រៀមត្រឡប់មកកម្ពុជា។ (រូបពី៖ ស្ថានទូតកម្ពុជាប្រចាំប្រទេសម៉ាឡេស៊ី)

ដោយ: ឡាយ សុភាវតី

ភ្នំពេញ៖ ពលករខ្មែរ៦នាក់ និងទារិកាម្នាក់ ដែលនៅម៉ាឡេស៊ី នឹងមកដល់កម្ពុជានៅល្ងាចថ្ងៃទី២៧ មករានេះ ក្រោមការសម្របសម្រួលពីស្ថានទូតកម្ពុជាប្រចាំប្រទេសម៉ាឡេស៊ី។ នេះបើតាមការបញ្ជាក់របស់លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ។

លោក កុយ គួង បានបញ្ជាក់ថា ពលករទាំង៦នាក់នេះ ត្រូវបានអាជ្ញាធរម៉ាឡេស៊ីឃាត់ខ្លួន ដោយសារឆ្លងដែនខុសច្បាប់។ ជាមួយគ្នាដែរ ស្ថានទូតកម្ពុជាប្រចាំម៉ាឡេស៊ីក៏បានជួយសម្របស្រួល ហើយបញ្ជូនត្រឡប់មកកម្ពុជាវិញ។

អ្នកនាំពាក្យក្រសួងការបរទេសរូបនេះ បានប្រាប់សារព័ត៌មានថ្មីៗតាមទូរស័ព្ទនៅថ្ងៃទី២៧មករាថា ៖«ពួកគាត់ត្រូវអាជ្ញាធរម៉ាឡេស៊ីពិនិត្យ ហើយស្ថានទូតយើងនៅទីនោះ ក៏ជួយរៀបចំឯកសាក ហើយក៏ជូនទៅធ្វើតេត្តកូវីដ-១៩ ហើយរៀបបញ្ជូនមកកម្ពុជាវិញ»។

លោកថា ពលករទាំង៦នាក់ និងទារិកា១នាក់ នឹងមកដល់អាកាសយានដ្ឋានអន្តរជាតិភ្នំពេញនៅល្ងាចថ្ងៃនេះ។

កាលពីសប្ដាហ៍មុន ក៏មានពលករខ្មែរនៅម៉ាឡេស៊ីខុសច្បាប់១៨នាក់ដែរ បានត្រឡប់ទៅផ្ទះវិញ ក្រោមការសម្របសម្រួលពីស្ថានទូតកម្ពុជាប្រចាំម៉ាឡេស៊ី៕