លោក ស សុខា ជំរុញឲ្យថ្នាក់ដឹកនាំកីឡាធ្វើការងារឲ្យចំទិសដៅ និងជៀសវាងរំលោភបំពានការងារ

កីឡាជាតិ

ជាតិ

លោក ស សុខា ជំរុញឲ្យថ្នាក់ដឹកនាំកីឡាធ្វើការងារឲ្យចំទិសដៅ និងជៀសវាងរំលោភបំពានការងារ

29, Jan 2021 , 5:59 pm

រូបភាព

លោក ស សុខា រដ្ឋលេខាធិការក្រសួងអប់រំ យុវជន និងកីឡា, រូបពីអគ្គនាយកដ្ឋានកីឡា

ដោយ:

លោក ស សុខា រដ្ឋលេខាធិការក្រសួងអប់រំ យុវជន និងកីឡា ដាស់តឿនមន្ត្រីក្រោមឱវាទ ឲ្យខិតខំធ្វើការងារ និងអនុវត្តតួនាទីឲ្យបានត្រឹមត្រូវ។ ជាពិសេស ត្រូវហ៊ានដាក់ពិន័យមន្ត្រីអសកម្មការងារ។ ការជំរុញនេះ ធ្វើឡើងក្នុងពិធីប្រកាសចូលកាន់ភារកិច្ចមន្ត្រីគ្រប់គ្រងអង្គភាពនានាក្រោមឱវាទអគ្គនាយកដ្ឋានកីឡា។

រដ្ឋលេខាធិការក្រសួងអប់រំយុវជននិងកីឡា លោក ស សុខា បានដាក់ចេញគោលការណ៍មួយចំនួន ដើម្បីដាស់ស្មារតីមន្ត្រីក្រោមឱវាទ ក៏ដូចជាបង្កើនប្រសិទ្ធភាពការងារនៅក្នុងអគ្គនាយកដ្ឋានកីឡា នាយកដ្ឋានកីឡា និងមជ្ឈមណ្ឌលកីឡា ដែលទើបបង្កើតថ្មី។ ជាពិសេសជំរុញឲ្យមន្ត្រីទាំងនោះអនុវត្តន៍ការងារឲ្យបានត្រឹមត្រូវ និងប្រកបដោយប្រសិទ្ធិភាព។

ទំព័រហ្វេសប៊ុករបស់អគ្គនាយកដ្ឋានកីឡាបានស្រង់ប្រសាសន៍របស់លោក ស សុខា មកសរសេរថា៖«ឯកឧត្តមរដ្ឋលេខាធិការ បានដាក់ចេញអនុសាសន៍៥ចំណុច ជាត្រីវិស័យដល់អង្គភាពថ្មីទាំងពីរ ក៏ដូចជាអគ្គភាពនានាក្រោមឱវាទអគ្គនាយកដ្ឋានកីឡា ត្រូវខិតខំគ្រប់គ្រងធនធានមនុស្សក្នុងអង្គភាពឲ្យមានប្រសិទ្ធិភាព ចំទិសដៅ ជៀសវាងរំលោភបំពានដែនសមត្ថកិច្ចការងារ»។

បន្ថែមលើនេះ លោក ទទូចឲ្យប្រធានអង្គភាពទាំងនោះ ត្រូវចេះលើកទឹកចិត្តមន្ត្រីក្រោមបង្គាប់ ដែលខិតខំ និងសកម្មនឹងការងារ និងហ៊ានដាក់ពិន័យមន្ត្រី ដែលអសកម្មការងារ។

លោក ដួង មាសចំរើន ត្រូវបានតែងតាំងឲ្យធ្វើជាអគ្គនាយករងនៃអគ្គនាយដ្ឋានកីឡា

ក្រសួងអប់រំ យុវជន និងកីឡាកាលពីថ្ងៃទី២៨ ខែមករា បានរៀបចំកម្មវិធីប្រកាសចូលកាន់តួនាទីរបស់មន្ត្រីអគ្គនាយកដ្ឋានកីឡា នាយកដ្ឋានកីឡា និងមជ្ឈមណ្ឌលកីឡាចម្រុះឲ្យអគ្គនាយកដ្ឋានកីឡា ដែលបានផ្លាស់ប្តូរតួនាទី និងទើបតែងតាំងថ្មី។ ក្នុងនោះលោក ដួង មាសចំរើន ត្រូវបានដំឡើងតួនាទីពីប្រធាននាយកដ្ឋានអប់រំកាយ និងកីឡាសិស្ស និស្សិត ទៅជាអគ្គនាយករងនៃអគ្គនាយកដ្ឋានកីឡា។

លោក បឹង គឹមតោ ត្រូវបានតែងតាំងឲ្យធ្វើប្រធាននាយកដ្ឋានអប់រំកាយ និងកីឡាសិស្ស និស្សិត ជំនួសលោក ដួង មាសចំរើន រីឯលោក ឯម តារា កាន់តួនាទីជាអនុប្រធាន។

រូបទី៣

ចំណែកលោក ហួត សេងទ្រី ត្រូវបានតែងតាំងឲ្យធ្វើជាប្រធាននាយកដ្ឋានរៀបចំនិងគ្រប់គ្រងព្រឹត្តិការណ៍កីឡា ដែលមានកញ្ញា កែវ មនោរម្យ, កញ្ញា គីន សំណាង និងលោក ប៊ូ វិរៈ ជាអនុប្រធាន។ រីឯលោក ហ៊ុន បូរី, លោក សាំង សុភ័គ និងលោក កៅ មករា ជាប្រធានការិយាល័យ។

លោក ហួត សេងទ្រី ត្រូវបានតែងតាំងជាប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡា

ដោយឡែកលោក វ៉ា វណ្ណៈ ត្រូវបានតែងតាំងឲ្យធ្វើជាប្រធានមជ្ឈមណ្ឌលជាតិព័ត៌មានវិទ្យា និងស្ថិតិកីឡា ដែលមានអនុប្រធានរូបរួមមានលោក ធិន វិចិត្រ, លោក សៅ សកុណា និងលោក អ៊ឹង វិរៈ។ ចំណែកលោក គង់ វត្ថា, លោក ជុំ សំអុល និងលោក ឈន់ អេងលី ជាប្រធានការិយាល័យ។

គួរបញ្ជាក់ថា នាយកដ្ឋានរៀបចំ និងគ្រប់គ្រងព្រឹត្តិការណ៍កីឡា និងមជ្ឈមណ្ឌលជាតិព័ត៌មានវិទ្យា និងស្ថិតិកីឡា ជាអង្គចំណុះឲ្យអគ្គនាយកដ្ឋានកីឡា ដែលក្រសួងអប់រំ យុវជន និងកីឡាទើបបង្កើតឡើងថ្មី ដើម្បីជួយសម្រួលការងារ។ លោក ស សុខា បានបញ្ជាក់ថា ការបង្កើតអង្គភាពថ្មីទាំងពីរនេះ គឺដើម្បីរួមចំណែកបង្កើនការអភិវឌ្ឍវិស័យកីឡានៅកម្ពុជាឲ្យកាន់តែរីកចម្រើន៕