ជាតិ
សេដ្ឋកិច្ច
EuroCham និង GIZ ជំរុញអ្នកធុរកិច្ចនៅកម្ពុជាឱ្យប្រកួតប្រជែងប្រកបដោយក្រមសីលធម៌
(ស្តាំ)លោក Frank Jattke ប្រធានក្រុមការងារអាស៊ាននៃGIZ, លោក ផាន អូន អគ្គនាយកនៃអគ្គនាយកដ្ឋានក.ប.ប និង លោក Denis St-Marie នាយកប្រតិបត្តិនៃEuroCham។
×![]()
ភ្នំពេញ៖ សភាពាណិជ្ជកម្មអឺរ៉ុបប្រចាំកម្ពុជា (EuroCham) រួមទាំងទីភ្នាក់ងារកិច្ចសហប្រតិបត្តិការអាល្លឺម៉ង (GIZ) បានជំរុញនិងលើកកម្ពស់ដល់ធុរជនទាំងឡាយ ដែលធ្វើធុរកិច្ចនៅកម្ពុជា ឱ្យមានភាពប្រកួតប្រជែងដោយក្រមសីលធម៌ ដើម្បីបញ្ជៀសផលប៉ះពាល់ចំពោះអ្នកប្រើប្រាស់។ 
ការដាក់ចេញនូវច្បាប់ស្តីពី «កិច្ចការពារអ្នកប្រើប្រាស់» របស់អគ្គនាយកការពារអ្នកប្រើប្រាស់ កិច្ចប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម គឺបានការពារសុខភាពអ្នកប្រើប្រាស់ និងធានានូវការអនុវត្តមិនល្អនានាចំពោះអតិថិជនពីសំណាក់ក្រុមហ៊ុននីមួយៗ។ បើតាមលោក Denis St-Marie នាយកប្រតិបត្តិនៃEuroCham នៅក្នុងវេទិកានៃកិច្ចពិភាក្សាជាមួយភាគីពាក់ព័ន្ធស្តីពី៖«កិច្ចការពារអ្នកប្រើប្រាស់ការជំរុញ និងលើកកម្ពស់ការធ្វើធុរកិច្ចប្រកបដោយក្រមសីលធម៌នៅកម្ពុជា ពិសេសការការពារអតិថិជនរបស់អ្នក» នាព្រឹកថ្ងៃ២៨មករា EuroCham គឺមានទិសដៅសំខាន់ក្នុងការជួយអភិវឌ្ឍកម្ពុជា ដោយមានការទឹកចិត្ត ជំរុញឱ្យមានដៃគូធុរកិច្ចល្អជាមួយកម្ពុជា។
EuroCham បានសហការយ៉ាងជិតសិទ្ធ ជាមួយវិស័យឯកជន ហើយក៏បានដើរតួនាទីយ៉ាងសំខាន់ ក្នុងការបង្កើតគណៈកម្មការការពារអ្នកប្រើប្រាស់។ លោក Denis St-Marie និយាយដូច្នេះ៖«យើងប្តេជ្ញាចិត្តការពារអតិថិជនរបស់យើង ហើយនឹងផ្តល់នូវតម្លាភាព និងយុទ្ធការដំណោះស្រោយបណ្តឹងផ្សេងៗ រវាងអ្នកប្រើប្រាស់ និងក្រុមហ៊ុន»។
ជាមួយគ្នានេះ លោក Frank Jattke ប្រធានក្រុមការងារអាស៊ាននៃទីភ្នាក់ងារកិច្ចសហប្រតិបត្តិការអាល្លឺម៉ង (GIZ) បានលើកឡើងថា អ្នកធុរកិច្ច ត្រូវយល់ឱ្យបានច្បាស់អំពីការប្រកួតប្រជែងប្រកបដោយក្រមសីលធម៌ចំពោះអ្នកប្រើប្រាស់។ លោកបានបន្ថែមថា ធុរកិច្ចទាំងឡាយដែលផ្តល់នូវសេវាកម្មដ៏ល្អ គឺមិនត្រឹមជួយអ្នកដល់ប្រើប្រាស់នោះទេ តែថែមទាំងបានពង្រីកទីផ្សារ ដោយផ្អែកលើកត្តាតម្រូវការជាក់លាក់របស់អតិថិជន។
ច្បាប់ស្តីពី«កិច្ចការពារអ្នកប្រើប្រាស់»របស់កម្ពុជា បានអនុម័តចុងក្រោយបង្អស់នៅក្នុងតំបន់អាស៊ាន។ លោក ផាន អូន អគ្គនាយកនៃអគ្គនាយកដ្ឋានក.ប.ប របស់ក្រសួងពាណិជ្ជកម្ម បានលើកឡើងថា ការបង្កើតច្បាប់នេះឡើង បានទាក់ទាញនូវការយកចិត្តទុកដាក់ក្នុងការសហប្រតិបត្តិការនៅកម្ពុជា ដែលទាក់ទងនឹងការលើកកម្ពស់ការយល់ដឹង, ការលើកកម្ពស់នូវការអនុវត្តច្បាប់, ការលើកកម្ពស់ក្នុងការការពារអ្នកប្រើប្រាស់របស់ក្រសួងពាណិជ្ជកម្មដែលមានអគ្គនាយកដ្ឋានក.ប.ប ជាអ្នកអនុវត្តផ្ទាល់។
ច្បាប់ស្តីពី«កិច្ចការពារអ្នកប្រើប្រាស់» នៅកម្ពុជា បានអនុម័តឱ្យប្រើប្រាស់កាលពីថ្ងៃទី២វិច្ឆិកា ឆ្នាំ២០១៩ ក្នុងគោលបំណងធានាការការពារអ្នកប្រើប្រាស់ ពីការប្រកួតប្រជែងរបស់ធុរជន។ លោក ផាន អូន បានបញ្ជាក់ថា តាមរយៈច្បាប់ស្តីពី«កិច្ចការពារអ្នកប្រើប្រាស់»នេះ គឺតម្រូវឱ្យធុរជនគោរពច្បាប់វិធានការរបស់ច្បាប់ ដើម្បីការពារសិទ្ធិ និងផលប្រយោជន៍អ្នកប្រើប្រាស់ ហើយថែមទាំងបង្កើនភាពជឿងជាក់សម្រាប់អ្នកប្រើប្រាស់ ចំពោះក្រុមហ៊ុន៕
Tag:
EuroCham
GIZ
ច្បាប់កិច្ចការពារអ្នកប្រើប្រាស់
© រក្សាសិទ្ធិដោយ thmeythmey.com
