COVID-19
ជាតិ
សុខភាព
អ្នកដំណើរពីអាមេរិក និងចិន ២នាក់ទៀត មានកូវីដ-១៩ ខណៈអ្នកជំងឺសះស្បើយ១នាក់
×![]()
ភ្នំពេញ៖ កម្ពុជាបន្តរកឃើញវិជ្ជមានកូវីដ-១៩(COVID-19)ចំនួន២ករណីទៀត នៅលើអ្នកដំណើរមកដែលទើបមកពីបរទេស។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល នាព្រឹកថ្ងៃទី៩កុម្ភៈ ដោយបញ្ជាក់ថា អ្នកដំណើរដែលបានឆ្លងកូវីដ-១៩នោះ មានម្នាក់មកពីប្រទេសចិន និងម្នាក់ទៀតមកពីសហរដ្ឋអាមេរិក។ 
ក្រសួងសុខាភិបាលបានរៀបរាប់ថា ក្នុងចំណោមអ្នកដំណើរទាំងពីរនាក់ខាងលើដែលបានឆ្លងកូវីដ-១៩នោះ មានស្ត្រីជនជាតិខ្មែរវ័យ១៩ឆ្នាំម្នាក់ មានអាសយដ្ឋានស្នាក់នៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ស្ត្រីរូបនេះ បានធ្វើដំណើរមកពីសហរដ្ឋអាមេរិក បន្តជើងហោះហើរនៅប្រទេសកូរ៉េខាងត្បូង ហើយមកដល់កម្ពុជានៅថ្ងៃទី៧កុម្ភៈ។ ក្នុងថ្ងៃជាមួយគ្នានេះ កម្ពុជាក៏បានរកឃើញវិជ្ជមានកូវីដ-១៩លើស្ត្រីជនជាតិចិន អាយុ២៦ឆ្នាំ ដែលបានធ្វើដំណើរមកពីប្រទេសចិន បន្តជើងហោះហើរនៅប្រទេសកូរ៉េខាងត្បូង ផងដែរ។
ដោយឡែក មនុស្សទាំង៩២នាក់ទៀត ដែលបានធ្វើដំណើរជាមួយអ្នកឆ្លងកូវីដ-១៩ទាំងពីរនាក់នោះ គឺកំពុងធ្វើចត្កាឡីស័ក១៤ថ្ងៃ នៅសណ្ឋាគារនានា និងនៅស្ថានទូតអាមេរិក ក្រោយលទ្ធផលតេស្តអវិជ្ជមាននៃជំងឺនេះ។
ជាមួយគ្នានេះ ក្រសួងសុខាភិបាលក៏ប្រកាសពីដំណឹងល្អ ចំពោះបុរសជនជាតិឥណ្ឌូណេស៊ីអាយុ២៤ឆ្នាំ ដែលបានជាសះស្បើយពីកូវីដ-១៩ ផងដែរ។ បុរសដែលសះស្បើយពីកូវីដ-១៩នេះ មានអាសយដ្ឋានស្នាក់នៅ ខេត្តព្រះសីហនុ ជាអ្នកដំណើរមក ពីប្រទេសឥណ្ឌូណេស៊ី បន្តជើងហោះហើរនៅប្រទេសសិង្ហបុរី មកដល់កម្ពុជា កាលពីថ្ងៃទី១២មករា ឆ្នាំ២០២១។
គិតត្រឹមថ្ងៃទី៩កុម្ភៈនេះ កម្ពុជារកឃើញអ្នកឆ្លងកូវីដ១៩ សរុប៤៧៦នាក់។ ក្នុងនោះ អ្នកជាសះស្បើយមាន៤៥៧នាក់ និងអ្នកជំងឺ១៩នាក់ កំពុងសម្រាកព្យាបាលនៅមន្ទីរពេទ្យ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
