បេសកកម្មរបស់ក្រុមអ្នកជំនាញអង្គការសុខភាពពិភពលោក (WHO) នៅថ្ងៃទី៩ ខែកុម្ភៈ បានធ្វើសន្និសីទសារព័ត៌មានដើម្បីបង្ហាញលទ្ធផលស្រាវជ្រាវរកប្រភពជំងឺកូវីដ-១៩ នៅចិន។ ក្រុមការងារបានស្នាក់នៅចិនអស់រយៈពេល៤សប្តាហ៍ ដោយចំណាយពេល២សប្តាហ៍ធ្វើចត្តាឡីស័កផង។ ក្រុមការងារនេះ ដឹកនាំដោយលោកវេជ្ជបណ្ឌិត Peter Ben Embarek អ្នកជំនាញសុខភាពស្បៀង និងជំងឺសត្វរបស់ WHO ។
ក្នុងសន្និសីទព័ត៌មាននៅរសៀលថ្ងៃទី៩ ខែកុម្ភៈពីទីក្រុងវូហាន លោក Liang Wannian ដែលដឹកនាំក្រុមការងារអ្នកវិទ្យាសាស្ត្រចិនក្នុងបេសកកម្មរួមជាមួយ WHO និយាយថា ក្រុមអ្នកជំនាញមិនទាន់រកឃើញសត្វដែលផ្ទុកជំងឺកូវីដ-១៩ មុនចម្លងទៅមនុស្សឡើយ។ តាំងពីដើមមក អ្នកវិទ្យាសាស្ត្រជឿថា វីរុស SARS-Cov-2 ដែលបង្កទៅជាជំងឺកូវីដ-១៩ ទៅមនុស្សតាមរយៈសត្វ។
ប៉ុន្តែអ្វីដែលគួរឲ្យកត់សម្គាល់ លោក Liang អះអាងថា ការសិក្សាក៏បង្ហាញដែរថា មេរោគអាចស្ថិតក្នុងរបស់ត្រជាក់ដែលនាំចូលពីទីឆ្ងាយ។ ការលើកឡើងបែបនេះមិនមែនជារឿងថ្មីឡើយ ខណៈរដ្ឋមន្ត្រីការបរទេសចិន ក៏ដូចជាកាសែតក្នុងស្រុកចិនបានលើកឡើងពីលទ្ធភាពនេះជាច្រើនខែមកហើយ។
បន្ថែមពីនេះ លោក Liang ក៏បញ្ជាក់ថា ពុំមានអ្វីបង្ហាញថា មានជំងឺឆ្លងសាយភាយក្នុងក្រុងវូហាន មុនខែធ្នូ ឆ្នាំ២០១៩ឡើយ។ ការលើកឡែងបែបនេះ ផ្ទុយពីការលើកឡើងរបស់ប្រទេសឯទៀតដែលថាចិនបានលាក់បាំងពីការផ្ទុះនៃជំងឺនេះ។ ការបញ្ជាក់របស់លោក Liang ត្រូវបានគាំទ្រដោយលោក Ben Embarak ដែលជាប្រធានក្រុមបេសកកម្ម។ អ្នកជំនាញ WHO រូបនេះប្រាប់អ្នកសារព័ត៌មានថា ពុំមានភស្តុតាងអ្វីដែលបង្ហាញថា មានការឆ្លងទ្រង់ទ្រាយធំនៅវូហាន មុនខែធ្នូឡើយ។ នេះបើយោងតាមទីភ្នាក់ងារព័ត៌មាន AFP ។
អំឡុងពេលស្នាក់នៅទីក្រុងវូហាន ក្រុមអ្នកជំនាញបានទៅពិនិត្យផ្សារលក់សត្វព្រៃ Huanan ដែលស្ថិតក្នុងការសង្ស័យជាកន្លែងផ្ទុះជំងឺដំបូង មន្ទីរពេទ្យដែលទទួលព្យាបាលអ្នកជំងឺនៅពេលមានករណីផ្ទុះដំបូង វិទ្យាស្ថានវីរុសសាស្ត្រវូហានដែលជាកន្លែងធ្វើតេស្តមេរោគ និងមជ្ឈមណ្ឌលគ្រប់គ្រងជំងឺឆ្លងនៅខេត្តហ៊ូប៉ី។
នាសន្និសីទដដែល លោក Embarak ក៏និយាយថា ការធ្លាយវីរុសពីកន្លែងពិសោធនៅវូហាន ក៏មិនអាចកើតឡើងដែរ។ ដូចនេះ បើតាមលោក Embarak ដែលធ្លាប់បម្រើការនៅការិយាល័យ WHO ប្រចាំប៉េកាំង អ្នកជំនាញមិនពិចារណាលើសម្មតិកម្មនេះឡើយ។ អតីតប្រធានាធិបតីអាមេរិក ដូណាល់ ត្រាំ ជាអ្នកលេចមុខលេចមាត់ខ្លាំងលើការចោទប្រកាន់ករណីឆ្លងធ្លាយវីរុសនេះ។
ចិនបានរាយការណ៍ពីករណីឆ្លងជំងឺកូវីដ-១៩ ដំបូងទៅ WHO នៅថ្ងៃទី៣១ ធ្នូ ឆ្នាំ២០១៩។
បេសកកម្មរបស់ WHO នេះ ក្លាយជារឿងរសើបសម្រាប់ចិន ក៏ដូចជាការឆ្លើយឆ្លងពាក្យសម្តីរវាងចិន និងអាមេរិក។ អាមេរិក កាលពីពាក់កណ្តាលខែមករាទាមទារឲ្យការស៊ើបអង្កេតនេះមានភាពច្បាស់លាស់ និងតម្លាភាព។ ចិន វិញតបទៅអាមេរិកថា ខ្លួនប្រឆាំងដាច់ខាតការយកបេសកកម្មនេះធ្វើជារឿងនយោបាយ និងសង្កត់ធ្ងន់ថា បេសកកម្មនេះជារឿងវិទ្យាសាស្ត្រទាំងស្រុង។
មិនអត់ឡើយការសង្ស័យជុំវិញការស៊ើបអង្កេតស្វែងរកប្រភពនៃជំងឺនេះ។ ជាក់ស្តែងក្រុមការងារចំណាយពេលតែ១ម៉ោងប៉ុណ្ណោះដើម្បីពិនិត្យផ្សារលក់សត្វនៅក្រុងវូហាន។ បន្ថែមពីនេះក្រុមការងារ ក៏ចំណាយពេលជាច្រើនថ្ងៃក្នុងសណ្ឋាគារដើម្បីជួបមន្ត្រីចិន និងពុំបានចេញទៅទស្សនកិច្ចទីណាឡើយ។
គិតត្រឹមថ្ងៃទី៩ កុម្ភៈ ពិភពលោកមានករណីឆ្លងចំនួន១០៦លានករណី ជាសះស្បើយចំនួន៥៩,៤លានករណី និងស្លាប់ចំនួន២,៣៣ លាននាក់៕