នាយករដ្ឋមន្ត្រីនេប៉ាល់ ប្រាប់កម្ពុជាថា «នឹងចងចាំជានិច្ច» ចំពោះការផ្តល់ជំនួយវេជ្ជសាស្ត្រប្រឆាំងកូវីដ-១៩

COVID-19

ជាតិ

នាយករដ្ឋមន្ត្រីនេប៉ាល់ ប្រាប់កម្ពុជាថា «នឹងចងចាំជានិច្ច» ចំពោះការផ្តល់ជំនួយវេជ្ជសាស្ត្រប្រឆាំងកូវីដ-១៩

10, Feb 2021 , 7:29 pm

រូបភាព

ជំនួបរវាងសម្តេចនាយករដ្ឋមន្រ្តី ហ៊ុន សែន និងនាយករដ្ឋមន្រ្តីនេប៉ាល់ លោក សាម៉ា អូលី ក្នុងវិមានសន្តិភាព កាលអំឡុងខែឧសភា ឆ្នាំ២០១៩ (រូបពីអង្គភាពប្រតិកម្មរហ័សនៃទីស្តីការគណៈរដ្ឋមន្រ្តី)

ដោយ: សារព័ត៌មានថ្មីៗ

លោក សាម៉ា អូលី នាយករដ្ឋមន្ត្រីនេប៉ាល់ បានផ្ញើលិខិតជូនសម្តេចនាយករដ្ឋមន្ត្រី ហ៊ុន សែន ដើម្បីថ្លែងអំណរគុណមករដ្ឋាភិបាលនិងប្រជាជនកម្ពុជា ដែលបានឧបត្ថម្ភបរិក្ខារវេជ្ជសាស្ត្រទប់ស្កាត់នឹងជំងឺកូវីដ-១៩ ដល់នេប៉ាល់។ លិខិតរបស់លោក ធ្វើឡើងតាំងពីថ្ងៃទី១១ ខែមករា ឆ្នាំ២០២១ តែទើបនឹងត្រូវបានផ្សាយដោយក្រសួងការបរទេសកម្ពុជា។

លោក សាម៉ា អូលី មើលឃើញថា កម្ពុជា បានឈរនៅជាមួយនេប៉ាល់ ក្នុងការចូលរួមប្រឆាំងនឹងជំងឺកូវីដ-១៩។ លោក ចាត់ទុកការផ្តល់ជំនួយរបស់កម្ពុជា ថាជាសក្ខីភាព ដែលបញ្ជាក់អំពីមិត្តភាពនិងសាមគ្គីភាពរវាងកម្ពុជានិងនេប៉ាល់។ លោក មានប្រសាសន៍ទៅកាន់សម្តេច ហ៊ុន សែន ថា៖«យើង នឹងចងចាំជានិច្ចនូវការគាំទ្រនិងសុឆន្ទៈនេះ»។

បន្ថែមពីនេះ លោក វាយតម្លៃថា កម្ពុជានិងនេប៉ាល់ កំពុងរីករាយនឹងទំនាក់ទំនងល្អជាមួយគ្នា ដែលមិនធ្លាប់មានពីមុនមក ចាប់តាំងទំនាក់ទំនងការទូតនៃប្រទេសទាំងពីរ ត្រូវបានបង្កើតឡើង។ លោក ជឿជាក់ថា ទំនាក់ទំនងនៃប្រទេសទាំងពីរ នឹងត្រូវបានពង្រឹងបន្ថែមទៀត។ នៅឆ្នាំ២០២១ គឺជាខួបលើកទី៤៥ឆ្នាំ នៃចំណងការទូតកម្ពុជានិងនេប៉ាល់។

កាលពីដើមខែមករា ឆ្នាំ២០២១នេះ កម្ពុជា បានដឹកម៉ាស់ជិត២លាន និងបរិក្ខារវេជ្ជសាស្ត្រផ្សេងទៀត សម្រាប់ប្រឆាំងនឹងជំងឺកូវីដ-១៩ ទៅជូនរដ្ឋាភិបាលនេប៉ាល់។ ក្រៅពីនេប៉ាល់ នៅមានប្រទេស៣ទៀត គឺឡាវ មីយ៉ាន់ម៉ា និង ទីម័រខាងកើត ក៏ទទួលបានជំនួយនេះពីកម្ពុជាដែរ។ ម៉ាស់និងជំនួយផ្នែកវេជ្ជសាស្ត្រ ដែលប្រទេសទាំង៣នេះ ទទួលបានពីកម្ពុជា គឺមានចំនួនប្រហាក់ប្រហែលនឹងនេប៉ាល់៕