COVID-19
អន្តរជាតិ
ជនបរទេសនៅម៉ាឡេស៊ី នឹងទទួលបានការចាក់វ៉ាក់សាំងកូវីដ-១៩ ដោយឥតគិតថ្លៃ
×
ដោយ ឈួន ឈីវអ៊ីង
ជនបរទេសទាំងអស់ដែលរស់នៅម៉ាឡេស៊ី នឹងទទួលបានវ៉ាក់សាំងកូវីដ-១៩ ដោយឥតគិតថ្លៃ។ នេះបើតាមការបញ្ជាក់របស់រដ្ឋាភិបាលប្រទេសនេះនៅថ្ងៃទី១១ ខែកុម្ភៈ។ ក្នុងសេចក្ដីប្រកាសមួយ ម៉ាឡេស៊ីបញ្ជាក់ថា ការផ្ដល់វ៉ាក់សាំងឥតគិតថ្លៃនេះ ក៏ដោយសារម៉ាឡេស៊ីមានវ៉ាក់សាំងច្រើន និងជាការទទួលស្គាល់ការរួមចំណែករបស់ជនបរទេស ពិសេសពលករបរទេសក្នុងការជំរុញសេដ្ឋកិច្ច។
ម៉ាឡេស៊ី នឹងចាប់ផ្ដើមយុទ្ធនាការចាក់វ៉ាក់សាំងកូវីដ-១៩ នៅចុងខែកុម្ភៈ ដោយប្រជាជនម៉ាឡេស៊ីនឹងទទួលបានអាទិភាព។ ប៉ុន្តែជនបរទេសរស់នៅប្រទេសនេះ ក៏មិនត្រូវបានផាត់ចោលដែរ។ ក្នុងសេចក្តីថ្លែងការណ៍ចេញថ្ងៃទី១១ ខែកុម្ភៈ គណៈកម្មាធិការធានាការផ្គត់ផ្គង់វ៉ាក់សាំងការពារជំងឺកូវីដ-១៩ បានសង្កត់ធ្ងន់ថា ជនបរទេសដែលរស់នៅម៉ាឡេស៊ី នឹងទទួលបានការចាក់វ៉ាក់សាំងកដោយឥតគិតថ្លៃ នៅពេលម៉ាឡេស៊ីចាប់ផ្តើមបើកកម្មវិធីចាក់វ៉ាក់សាំងរបស់ខ្លួន។
កាលពីខែវិច្ឆិកា ឆ្នាំ២០២០ នាយករដ្ឋមន្ត្រីម៉ាឡេស៊ី លោក មូហ៊ីឌីន យ៉ាស៊ីន Muhyiddin Yassin បានប្រកាសថា រដ្ឋាភិបាលម៉ាឡេស៊ី ក៏មិនបង្ខំឱ្យប្រជាជនត្រូវតែចាក់វ៉ាក់សាំងឡើយ។
ទាក់ទងការផ្ដល់វ៉ាក់សាំងឱ្យជនបរទេសនេះ រដ្ឋាភិបាលម៉ាឡេស៊ីបានពិចារណាលើកត្តាជាច្រើន។ ករណីឆ្លងច្រើនក្នុងចំណោមកម្មករបរទេស ជាក្ដីបារម្ភចម្បងមួយរបស់ម៉ាឡេស៊ី ខណៈជនបរទេសជាកម្លាំងដ៏សំខាន់ក្នុងវិស័យកសិកម្ម សំណង់ និងឧស្សាហកម្ម។ បើតាមទូរទស្សន៍ CNA គណៈកម្មាធិការខាងលើបន្តថា ការសម្រេចចិត្តផ្តល់វ៉ាក់សាំង ក៏ត្រូវធ្វើឡើងពីព្រោះចំនួន វ៉ាក់សាំងដែលរដ្ឋាភិបាលម៉ាឡេស៊ីទទួលបាន គឺលើសពីចំនួនប្រជាជនម៉ាឡេស៊ីផងដែរ។
«វាក៏ស្របគ្នានឹងជំហររបស់រដ្ឋាភិបាលក្នុងការផ្តល់វ៉ាក់សាំងដល់ប្រជាជនម៉ាឡេស៊ីឱ្យបានច្រើនបំផុតតាមដែលអាចធ្វើទៅបាន ដើម្បីទទួលបាននូវភាពស៊ាំសហគមន៍»។ នេះជាការអះអាងរបស់គណៈកម្មាធិការដដែល។
កាលពីខែវិច្ឆិកា ឆ្នាំ២០២០ ប្រទេសម៉ាឡេស៊ី បានយល់ព្រមទិញវ៉ាក់សាំងចំនួន ១២,៨លានដូសរបស់ក្រុមហ៊ុន Pfizer និងដៃគូអាល្លឺម៉ង់ BioNTech ។ ក្រោយមក នៅខែមករា ម៉ាឡេស៊ីក៏បានចុះហត្ថលេខាលើកិច្ចព្រមព្រៀងទី២ ជាមួយ Pfizer ដើម្បីទទួលបានវ៉ាក់សាំង ១២,២លានដូសបន្ថែមទៀត។ រដ្ឋអាស៊ីអាគ្នេយ៍មួយនេះ ក៏បានចុះហត្ថលេខាទិញវ៉ាក់សាំងកូវីដ-១៩ ចំនួន១៨,៤លានដូស ដែលផលិតដោយវិទ្យាស្ថានស្រាវជ្រាវ Gamaleya របស់រុស្ស៊ី និង Sinovac ប្រទេសចិនផងដែរ៕
Tag:
ម៉ាឡេស៊ី
កូវីដ-១៩
© រក្សាសិទ្ធិដោយ thmeythmey.com