COVID-19
អន្តរជាតិ
លោកស្រីNgozi Okonjo-Iweala អគ្គនាយកអង្គការពាណិជ្ជកម្មពិភពលោក។ រូបភាព៖AFP
×![]()
លោកស្រី Ngozi Okonjo-Iweala អតីតរដ្ឋមន្ត្រីហិរញ្ញវត្ថុនីហ្សេរីយ៉ា និងជាសេដ្ឋវិទូ ត្រូវបានរដ្ឋសមាជិកនៃអង្គការពាណិជ្ជកម្មពិភពលោក (WTO) ជ្រើសតាំងជាអគ្គនាយិកានៅថ្ងៃទី១៥ ខែកុម្ភៈ។ លោកស្រីគឺជាស្ត្រីដំបូង និងជាជនជាតិអាហ្វ្រិកទីមួយដែលគ្រប់គ្រងស្ថាប័នពាណិជ្ជកម្មអន្តរជាតិមួយនេះ។ លោកស្រីសង្កត់ធ្ងន់ថា WTO ដែលរឹងមាំ នឹងមាននាទីយ៉ាងសំខាន់ក្នុងការស្រោចស្រង់ពិភពលោក ដែលរងគ្រោះដោយជំងឺឆ្លងកូវីដ-១៩។
ជាអតីតរដ្ឋមន្ត្រីហិរញ្ញវត្ថុ និងធ្លាប់ធ្វើការច្រើនឆ្នាំក្នុងធនាគារពិភពលោក លោកស្រី Ngozi Okonjo-Iweala ត្រូវបានរដ្ឋសមាជិកផ្តល់តំណែងជាអគ្គនាយិកា WTO ក្នុងកិច្ចប្រជុំពិសេសជាមួយសំឡេងគាំទ្រឯកច្ឆន្ទ។ បេក្ខភាពរបស់លោកស្រី Okonjo-Iweala ទទួលបានការគាំទ្រយ៉ាងពេញទំហឹងពីលោកប្រធានាធិបតីអាមេរិក ចូ បៃឌិន ក្រោយការដកខ្លួនរបស់បេក្ខភាពជាស្ត្រីម្នាក់ទៀតដែលជារដ្ឋមន្ត្រីពាណិជ្ជកម្មកូរ៉េខាងត្បូងបោះបង់ចោលការប្រកួត។
«WTO ដែលរឹងមាំ ពិតជាមានសារសំខាន់ បើយើងចង់ស្រោចស្រង់សេដ្ឋកិច្ចទាំងស្រុង និងឆាប់រហ័សចេញពីជំងឺឆ្លងកូវីដ-១៩»។ នេះជាសំណេរក្នុងសេចក្តីថ្លែងការណ៍របស់លោកស្រីនៅថ្ងៃទី១៥ ខែកុម្ភៈ។ លោកស្រីអះអាងថា រដ្ឋសមាជិកត្រូវតែធ្វើការរួមគ្នាក្នុងការកែប្រែគោលនយោបាយពាណិជ្ជកម្ម និងដាក់ចេញនូវគោលនយោបាយដើម្បីស្រោចស្រង់សេដ្ឋកិច្ចឡើងវិញ។
អគ្គនាយិការូបនេះ រំឭករដ្ឋសមាជិកពីឧបសគ្គដែលស្ថាប័នកំពុងជួបប្រទះ និងអំពាវនាវថា មានតែធ្វើការរួមគ្នាប៉ុណ្ណោះទើបអាចដោះស្រាយបញ្ហាបាន និងធ្វើឱ្យ WTO រឹងមាំ ធន់ ហើយសម្របទៅនឹងតថភាពជាក់ស្តែងបាន។
ដើម្បី WTO រឹងមាំ លោកស្រី Okonjo-Iweala ប្តេជ្ញាកំណែទម្រង់ស្ថាប័នមួយនេះ ខណៈកន្លងមកនៅមានបញ្ហាប្រឈមជាច្រើន។ WTO ពុំអាចសម្រេចបានកិច្ចព្រមព្រៀងពាណិជ្ជកម្មចម្បងណាមួយឡើយ។ បន្ថែមពីនេះ WTO ពុំអាចសម្រេចបានកាលវិភាគក្នុងការបញ្ចប់ការឧបត្ថម្ភធន់ក្នុងវិស័យនេសាទ។ ដូចគ្នានេះដែរ មុខងារមួយចំនួនរបស់ WTO ជាប់គាំងមិនអាចធ្វើការបានដោយសារអតីតប្រធានាបតីអាមេរិក ដូណាល់ ត្រាំ ជំទាស់ការតែងតាំងចៅក្រម ដែលធ្វើឲ្យ WTO មិនអាចកាត់ក្តីជម្លោះពាណិជ្ជកម្មបាន។
សេដ្ឋវិទូនីហ្សេរីយ៉ារូបនេះ ត្រូវទទួលការងារធំៗជាច្រើនដូចជាសម្រេចឱ្យបានកិច្ចព្រមព្រៀងពាណិជ្ជកម្មថ្មី កំណែទម្រង់ច្បាប់ពាណិជ្ជកម្មឱ្យស្មើភាព ជួយប្រទេសកំពុងអភិវឌ្ឍដែលរងគ្រោះសេដ្ឋកិច្ច និងប្រយុទ្ធទៅនឹងគោលនយោបាយការពារនិយមដែលមានលក្ខណៈកាន់តែធ្ងន់ធ្ងរឡើងដោយសារជំងឺកូវីដ-១៩។ ក្នុងសុន្ទរកថាទទួលយកតំណែង លោកស្រីនិយាយថា ការសម្រេចឱ្យបានកិច្ចព្រមព្រៀងពាណិជ្ជកម្មជាអាទិភាព និងទាមទារប្រទេសទាំងអស់ច្រានចោលគំនិតជាតិនិយមវ៉ាក់សាំង។
គំនិតជាតិនិយម និងគោលនយោបាយពាណិជ្ជកម្មការពារនិយម ត្រូវតែបង្ក្រាប បើសិនជាពិភពលោកទាំងមូលចង់ឱ្យសេដ្ឋកិច្ចមានសភាពល្អដូចមុន ជាអ្វីដែលោកស្រីចង់បាន បន្ថែមពីការដោះស្រាយវិសមភាពវ៉ាក់សាំង និងបញ្ហាប្រឈមដែលប្រទេសនានាជួបប្រទះ។ លោកស្រីផ្តល់យោបល់ថា ប្រទេសអភិវឌ្ឍគប្បីលុបឧបសគ្គមួយចំនួនដែលមានក្នុងច្បាប់កម្មសិទ្ធិបញ្ញា និងផ្ទេរបច្ចេកវិទ្យា ដើម្បីធ្វើឱ្យមានភាពងាយស្រួលក្នុងការផលិតវ៉ាក់សាំងនៅទូទាំងពិភពលោក។
លោកស្រី Okonjo-Iweala ធ្លាប់និយាយចំៗថា WTO ត្រូវដើរតួនាទីយ៉ាងសំខាន់ក្នុងការជួយប្រទេសកំពុងអភិវឌ្ឍក្នុងការទទួលបានឱសថ ក៏ដូចជាវ៉ាក់សាំងបង្ការជំងឺកូវីដ-១៩។ បញ្ហាខាងលើ សុទ្ធសឹងតែជាអ្វីដែលសមាជិកទាំង១៦៤ពុំអាចស្វែងរកចំណុចរួមបាន៕
Tag:
WTO
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
