COVID-19
អន្តរជាតិ
អ្នកឆ្លងកូវីដ-១៩ ឡើងដល់ជាង១១០លាននាក់ ក្នុងនោះស្លាប់ជិត២,៤៣លាន
× តួលេខអ្នកឆ្លងកូវីដ-១៩ ទូទាំងពិភពលោក ឡើងដល់ជាង១១០លាននាក់ហើយ ដោយគិតត្រឹមថ្ងៃទី១៧ ខែកុម្ភៈ ឆ្នាំ២០២១ នេះ ដែលក្នុងនោះ អ្នកស្លាប់មានជិត២,៤៣លាននាក់ និងសះស្បើយជាង៨៤,៨៣លាននាក់។ ២១ប្រទេស មានករណីឆ្លងលើសពី១លាន ដែលក្នុងនោះសហរដ្ឋអាមេរិក មានទាំងករណីឆ្លង និងអ្នកស្លាប់ច្រើនជាងគេបំផុត។
អ្នកឆ្លងកូវីដ-១៩ នៅសហរដ្ឋអាមេរិក មានជាង២៨,៣៨លាននាក់ ដែលតាមពីក្រោយដោយឥណ្ឌា ជាង១០,៩៣លាននាក់ ប្រេស៊ីល ជាង៩,៩២លាននាក់ រុស្ស៊ី ជាង៤,០៩លាននាក់ ចក្រភពអង់គ្លេស ជាង៤,០៥លាននាក់ បារាំង ជាង៣,៤៨លាននាក់ និងអេស្ប៉ាញ ជាង៣,០៩លាននាក់។
ប្រទេសដែលមានករណីឆ្លងលើសពីលាន រួមមាន អ៊ីតាលី តួកគី អាល្លឺម៉ង់ កូឡុំប៊ី និងអាហ្សង់ទីន។ ម៉ិកស៊ិកមានជិត២លានករណី ខណៈ ប៉ូឡូញ អ៊ីរ៉ង់ អាហ្វ្រិកខាងត្បូង អ៊ុយក្រែន ប៉េរូ ឥណ្ឌូណេស៊ី ឆេក និងហូឡង់ សុទ្ធតែឈានដល់ជាង១លានករណីរៀងៗខ្លួន។
កាណាដាស្ថិតក្នុងខ្ទង់ជាង៨០ម៉ឺនករណី ព័រទុយហ្គាល់ ស៊ីលី រូម៉ានី បែលហ្ស៊ិក និងអ៊ីស្រាអែល មានជាង៧០ម៉ឺនករណីដូចគ្នា។ បណ្តាប្រទេសផ្សេងទៀតដែលមានករណីឆ្លងលើសកន្លះលានរួមមាន អ៊ីរ៉ាក់ ស៊ុយអែត ប៉ាគីស្ថាន ហ្វីលីពីន ស្វីស និងបង់ក្លាដែស។
ក្នុងចំណោមអ្នកស្លាប់ជិត២,៤៣លាននាក់ សហរដ្ឋអាមេរិក មានជិត៥០ម៉ឺននាក់ ប្រេស៊ីលជាង២៤ម៉ឺន ម៉ិកស៊ិកជាង១៧ម៉ឺន ឥណ្ឌាជាង១៥,៥ម៉ឺន ចក្រភពអង់គ្លេសជាង១១ម៉ឺន អ៊ីតាលីជាង៩ម៉ឺន បារាំង និងរុស្ស៊ីជាង៨ម៉ឺន អាល្លឺម៉ង់ និងអេស្ប៉ាញជាង៦ម៉ឺននាក់៕
© រក្សាសិទ្ធិដោយ thmeythmey.com