COVID-19
អន្តរជាតិ
×![]()
អង់គ្លេសដែលជាប្រធានឆ្លាស់វេនប្រទេសជឿនលឿនទាំង៧ (G7) នឹងដាក់គោលដៅពន្លឿនការអភិវឌ្ឍវ៉ាក់សាំងប្រឆាំងនឹងជំងឺឆ្លងនាពេលអនាគតក្នុងរយៈពេលត្រឹមតែ១០០ថ្ងៃ។ ការពន្លឿនសមត្ថភាពអភិវឌ្ឍវ៉ាក់សាំងនេះ នឹងក្លាយជាការឆ្លើយតបដ៏មានប្រសិទ្ធភាពមួយទៅនឹងការផ្ទុះជំងឺឆ្លងណាមួយ ខណៈការអភិវឌ្ឍវ៉ាក់សាំងនៅពេលបច្ចុប្បន្ន ត្រូវចំណាយពេលច្រើន។ 
កិច្ចប្រជុំក្រុមមេដឹកនាំប្រទេស G7 នឹងធ្វើឡើងនៅថ្ងៃទី១៩ ខែកុម្ភៈ ហើយលោក បូរីស ចនសុន នាយករដ្ឋមន្ត្រីអង់គ្លេស ដែលជាប្រធានឆ្លាស់វេន ចង់ឱ្យប្រទេសជាសមាជិកប្រើប្រាស់ការជួបជុំនេះដើម្បីស្វែងរកវិធីសាស្ត្រទប់ទល់ទៅនឹងជំងឺឆ្លងនាពេលអនាគត រួមមានការបង្កើតសន្ធិសញ្ញាអន្តរជាតិស្តីពីជំងឺឆ្លងសាកល។
«ដោយប្រមូលនូវភាពវាងវៃ យើងអាចធានាពីការទទួលបានវ៉ាក់សាំង និងឧបរណ៍ធ្វើតេស្តនាពេលអនាគត និងត្រៀមជាស្រេចសម្រាប់ការព្យាបាលជំងឺ ខណៈពេលដែលយើងប្រយុទ្ធនឹងជំងឺកូវីដ-១៩ និងកសាងអ្វីៗឱ្យប្រសើរឡើងវិញ»។ នេះជាការលើកឡើងរបស់លោក ចនសុន ក្នុងសេចក្តីថ្លែងការណ៍នៅថ្ងៃទី១៩ ខែកុម្ភៈ ចេញផ្សាយមុនកិច្ចប្រជុំ G៧ ។
លោក ចនសុន ក៏លើកឡើងដែរពីវ៉ាក់សាំង AstraZeneca/Oxford ដែលចំណាយត្រឹមតែ៣១៤ថ្ងៃប៉ុណ្ណោះក្នុងការលេចជារូបរាង រាប់ចាប់តាំងពីមេរោគត្រូវបានរកឃើញនៅចិននាចុងខែធ្នូ ឆ្នាំ២០១៩ ។ ទោះចាត់ទុកការបង្កើតវ៉ាក់សាំងជាសមិទ្ធផលដ៏ធំធេង លោក ចនសុន ចង់ឱ្យវ៉ាក់សាំងនៅថ្ងៃខាងមុខ អាចត្រូវអភិវឌ្ឍបានត្រឹមតែរយៈពេល១០០ថ្ងៃប៉ុណ្ណោះ។
កិច្ចប្រជុំG7 លើកនេះ ក៏ជាជំនួបពហុភាគីដំបូងបង្អស់របស់លោកប្រធានាធិបតី ចូ បៃឌិន ផងដែរ។ ក្នុងការឧបត្ថម្ភដល់យន្តការវ៉ាក់សាំង COVAX អាមេរិកនឹងបញ្ចេញទឹកប្រាក់ចំនួន២ពាន់ជាបន្ទាន់ និងបន្ថែម២ពាន់លានដុល្លារទៀតក្នុងរយៈពេល២ឆ្នាំដើម្បីជួយផ្នែកវ៉ាក់សាំង។ នេះយោងតាមការបង្ហើបរបស់មន្ត្រីសេតវិមានអាមេរិក នៅថ្ងៃទី១៨ ខែកុម្ភៈ។ ទឹកប្រាក់សម្រាប់ផ្តល់ឱ្យ COVAX ក៏ត្រូវបានអនុម័តដោយសភាអាមេរិករួចហើយដែរ។
មន្ត្រីសេតវិមាន ក៏បញ្ជាក់ផងដែរថា ការផ្តល់ប្រាក់ដល់យន្តការ COVAX ពុំប៉ះពាល់ដល់ផែនការផ្តល់វ៉ាក់សាំងដល់ពលរដ្ឋអាមេរិកឡើយ។ អាមេរិកមានផែនការផ្តល់វ៉ាក់សាំងដល់ប្រជាជនខ្លួនទាំងអស់ត្រឹមខែកក្កដា។ លើសពីនេះ អាមេរិក ក៏នឹងផ្តល់វ៉ាក់សាំងដែលលើសទៅប្រទេសផ្សេងដែរ នៅពេលជឿជាក់ថា ខ្លួនមានការផ្គត់ផ្គង់វ៉ាក់សាំងគ្រប់គ្រាន់។
ក្នុងសេចក្ដីថ្លែងការណ៍ខាងលើ នាយករដ្ឋមន្ត្រីអង់គ្លេស ក៏សន្យានឹងចែកចាយវ៉ាក់សាំងរបស់អង់គ្លេសមួយភាគធំនាពេលអនាគត ទៅយន្តការវCOVAXវ។ អង់គ្លេសប្រទេសដែលមានប្រជាជនត្រឹមតែ៦៧លាននាក់ បានចុះកិច្ចព្រមព្រៀងទិញវ៉ាក់សាំងដល់ទៅ៤០០លានដូសឯណោះ។
យន្តការ COVAX មានបំណងចែកចាយវ៉ាក់សាំងឱ្យបាន២ពាន់លានដូសនៅចុងឆ្នាំ២០២១ ពោលគឺចែកចាយវ៉ាក់សាំងឱ្យបាន២០ភាគរយនៃចំនួនប្រជាជនដែលងាយរងគ្រោះនៅប្រទេសកំពុងអភិវឌ្ឍ និងអភិវឌ្ឍតិចតួច។ យន្តការនេះប្រឈមនឹងបរាជ័យ ដោយសារតែគ្មានទឹកប្រាក់គ្រប់គ្រាន់៕
Tag:
អាមេរិក
អង់គ្លេស
កូវីដ-១៩
© រក្សាសិទ្ធិដោយ thmeythmey.com
