កីឡាអន្តរជាតិ
អន្តរជាតិ
×![]()
ដោយ: សារព័ត៌មានថ្មីៗ
ដោយ៖ជា យូគៀង
Son Heung-min កីឡាករខ្សែប្រយុទ្ធឆ្នើមក្លិបមាន់ខ្នាយមាស Tottenham Hotspur បានសរសើរសមាជិករួមក្លិប Gareth Bale ដែលលេងស៊ីចង្វាក់គ្នាយ៉ាងល្អនាជំនួបទល់នឹងក្លិប Wolfsberger AC ដែល Spurs យកឈ្នះដោយលទ្ធផល ៤-១ ។ Son អះអាងថា ខ្លួនរីករាយដែលលេងជាមួយកីឡាករខ្ចីជើងមកពី Real Madrid រូបនេះ។ 
នាការប្រកួតទៀបភ្លឺថ្ងៃទី១៩ ខែកុម្ភៈក្នុងក្របខណ្ឌ Europa League កីឡាករសញ្ជាតិវែលស៍ Bale បានបង្កការភ្ញាក់ផ្អើលយ៉ាងខ្លាំងដោយការបង្ហាញទម្រង់លេងបានយ៉ាងល្អ។ ដោយរូបគេ អាចរកបាន១គ្រាប់ និងបញ្ជូនបាល់ឱ្យ Son Heung-min ស៊ុតបានមួយគ្រាប់ដែរ។
ក្រោយចប់ការប្រកួត Son បាននិយាយពី Bale ថា រូបគេមានទំនាក់ទំនងល្អហើយជិតស្និទ្ធជាមួយសមាជិករួមក្លិប ហើយពិតជាមានអារម្មណ៍សប្បាយចិត្តពេលឃើញ Bale ចូលលេងពេញ និងអាចរកបានគ្រាប់បាល់ផង ព្រមទាំងបានបញ្ជូនបាល់មួយគ្រាប់ផង។ Son និយាយច្បាស់ថា ពិតជាចូលចិត្តលេងជាមួយ Bale ណាស់។
«ពួកយើងបានព្យាយាមរកគ្រាប់បាល់តាមដែលយើងអាចធ្វើទៅបានដោយទំនុកចិត្តបំផុត។ ជាក់ស្តែងយើងធ្វើមិនបានល្អក្នុងរយៈប៉ុន្មានប្រកួតចុងក្រោយនេះ ហើយជ័យជម្នះនេះ នឹងធ្វើឱ្យយើងបង្កើនទំនុកចិត្តរបស់ក្រុមយើងមកវិញ។» កីឡាករជម្រើសជាតិកូរ៉េខាងត្បូងវ័យ២៨ឆ្នាំប្រាប់វេបសាយ Goal បែបនេះ។
ដោយសារខ្សែប្រយុទ្ធ Harry Kane បន្តជួបបញ្ហារបួស ព្រមគ្នានឹងការកើនឡើងទម្រង់លេងបែបនេះ Bale ទំនងជាអាចរកកៅអី១១នាក់បន្តទៀតក្នុងក្រុមរបស់លោក Jose Mourinho ។ បច្ចុប្បន្ន Spurs ឈរនៅចំណាត់ថ្នាក់ទី៩ មាន៣៦ពិន្ទុពីការប្រកួត២៣លើក៕
© រក្សាសិទ្ធិដោយ thmeythmey.com
