COVID-19
ជាតិ
COVID-19៖ ៣២ករណីចុងក្រោយ មានចិន២៩នាក់ ខ្មែរ១នាក់ វៀតណាម១នាក់ និងស៊ីលី១នាក់
ទីតាំងស្ពានកោះពេជ្រត្រូវបានបិទចរាចរណ៍ ក្រោយអាជ្ញាធរសុខាភិបាលរកឃើញអ្នកកើតកូវីដ១៩ ចំនួន៣២ករណី។ រូបថត AFP
×![]()
ដោយ: រួបរួម
ក្រសួងសុខាភិបាលនារសៀលថ្ងៃសៅរ៍ បានចេញរបាយការណ៍ពីករណីវិជ្ជមានកូវីដ-១៩ ចំនួន៣២ករណីបន្ថែមទៀត ដែលធ្វើឲ្យចំនួនសរុបនៅកម្ពុជាឡើងដល់៥១៦ករណី។ តាមការពន្យល់ក្នុងសេចក្តីជូនព័ត៌មាន អ្នកជំងឺភាគច្រើនពាក់ព័ន្ធព្រឹត្តិការណ៍២០កុម្ភៈ ប៉ុន្តែមិនមែនទាំងអស់នោះឡើយ។
ក្នុងចំណោមករណីទាំង៣២ មានស្ត្រីខ្មែរអាយុ២៤ឆ្នាំម្នាក់ អាសយដ្ឋាននៅស្រុកក្រូចឆ្មារ ខេត្តត្បូងឃ្មុំ ដែលធ្វើដំណើរមកពីម៉ាឡេស៊ី បន្តជើងហោះហើរនៅសិង្ហបុរី និងមកដល់កម្ពុជានៅថ្ងៃទី១៨ ខែកុម្ភៈ។ គាត់មានតេស្តវិជ្ជមានកូវីដ-១៩ រីឯអ្នកដំណើរ៧៧នាក់ទៀតបន្តធ្វើចត្តាឡីស័ក។
ស្ត្រីជនជនចិនអាយុ២២ឆ្នាំ អាសយដ្ឋាននៅបឹងកក់២ ខណ្ឌទួលគោក មកដល់កម្ពុជានៅថ្ងៃទី៦ ខែកុម្ភៈ ដោយតេស្តលើកទី២ឃើញវិជ្ជមាន រីឯស្ត្រីជនជាតិចិនអាយុ៣០ឆ្នាំ អាសយដ្ឋាននៅខណ្ឌចម្ការមន ធ្វើដំណើរពីអារ៉ាប់ប៊ីសាអូឌីត បន្តជើងហោះហើរនៅកូរ៉េខាងត្បូង ហើយមកដល់កម្ពុជានៅថ្ងៃទី៧ ខែកុម្ភៈ ដោយវត្ថុសំណាកលើកទី៣ មានវិជ្ជមានកូវីដ-១៩។ អ្នកដែលរួមដំណើរជាមួយពួកគាត់បន្តធ្វើចត្តាឡីស័ក។
រីឯករណីស្ត្រីជនជាតិអាយុ២៧ឆ្នាំ អាសយដ្ឋាននៅសណ្ឋាគារមួយក្នុងរាជធានីភ្នំពេញ ជាករណីដែលវែករកឃើញការឆ្លងសហគមន៍ដែលសម្តេច ហ៊ុន សែន ប្រសិទ្ធនាមថា «ព្រឹត្តិការណ៍សហគមន៍២០កុម្ភៈ»។ ស្ត្រីរូបនេះ មានបំណងធ្វើដំណើរទៅចិនវិញ ហើយបានទៅសុំវិញ្ញាបនបត្របញ្ជាក់សុខភាពកាលពីថ្ងៃទី១៨ ខែកុម្ភៈ។ វត្ថុសំណាកបង្ហាញថា គាត់វិជ្ជមានកូវីដ-១៩។
ក្រោយករណីនេះ ក្រុមការងារឆ្លើយតបបន្ទាន់របស់ក្រសួងសុខាភិបាល បានស្រាវជ្រាវរកអ្នកប៉ះពាល់ជាមួយស្ត្រីខាងលើ ហើយរកឃើញអ្នកជំងឺ២៤នាក់បន្ថែម ដែលមួយចំនួនជាអ្នកធ្វើការនៅក្លិបកម្សាន្តមួយកន្លែងក្នុងរាជធានីភ្នំពេញ។ បើតាមការបញ្ជាក់យ៉ាងច្បាស់ពីសម្តេចនាយករដ្ឋមន្ត្រី ហ៊ុន សែន ក្លិបនោះ មានឈ្មោះថា ក្លិប N8 ក្បែរពហុកីឡដ្ឋានជាតិអូឡាំពិក។
អ្នកជំងឺទាំង២៤នាក់នោះ មានចិនចំនួន២៣នាក់ ដោយភាគច្រើនជាបុរស និងស្ត្រីជនជាតិវៀតណាមម្នាក់។ អ្នកទាំងនោះ នៅរប៉ាត់រប៉ាយ មិននៅជុំគ្នានោះឡើយ។ បើតាមក្រសួងសុខាភិបាល ក្រុមការងារកំពុងតែសម្រួលប្រមូលយកអ្នកជំងឺទាំងនោះទៅដាក់នៅមន្ទីរពេទ្យដែលក្រសួងគ្រោងទុក។
តាមរបាយការណ៍ ជនជាតិចិន៣នាក់ទៀត (ស្រី២នាក់) ក៏បានតេស្តវិជ្ជមានផងដែរ បន្ទាប់ពីពួកគាត់បានទៅសុំវិញ្ញាបនបត្របញ្ជាក់សុខភាពកាលពីថ្ងៃទី១៩ ខែកុម្ភៈ ក្នុងគោលបំណងធ្វើដំណើរទៅកាន់ប្រទេសចិនវិញ។
ដូចគ្នាផងដែរ ស្ត្រីជនជាតិស៊ីលី វ័យ៣០ឆ្នាំម្នាក់ មានគោលបំណងធ្វើដំណើរទៅប្រទេសឡាវ។ គាត់បានសុំវិញ្ញាបនបត្របញ្ជាក់សុខភាពកាលពីថ្ងៃទី១៩ ខែកុម្ភៈ ដូចគ្នា ហើយក៏បានតេស្តឃើញវិជ្ជមានកូវីដ-១៩។
មកដល់ពេលនេះ ក្រសួងសុខាភិបាល មិនបានបញ្ជាក់ច្បាស់នោះឡើយទាក់ទងនឹងចំនួនករណីដែលពាក់ព័ន្ធនឹងព្រឹត្តិការណ៍២០កុម្ភៈ ប៉ុន្តែអ្នកស្រី ឱ វណ្ណឌីន អ្នកនាំពាក្យក្រសួងសុខាភិបាល បានបញ្ជាក់ប្រាប់សារព័ត៌មានថ្មីៗ យ៉ាងខ្លីថា ក្រសួងកំពុងរៀបចំព័ត៌មានលម្អិត។
គិតត្រឹមរបាយការណ៍នៅថ្ងៃសៅរ៍នេះ អ្នកឆ្លងកូវីដ-១៩នៅកម្ពុជាឡើងដល់៥១៦នាក់ ក្នុងនោះ ៤៧០នាក់បានជាសះស្បើយ រីឯ៤៦នាក់ទៀតបន្តសម្រាកព្យាបាល។ ពលករមកពីថៃនៅសល់តែ២នាក់ទៀតប៉ុណ្ណោះក្នុងចំណោម៨៩ករណី។ រីឯអ្នកជំងឺដែលតេស្តឃើញនៅភ្នំពេញ ត្រូវបានដាក់ឲ្យសម្រាកព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន មន្ទីរពេទ្យមិត្តភាពខ្មែរសូវៀត និងមណ្ឌលសុខភាពចាក់អង្រែ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
