COVID-19
ជាតិ
សម្តេច ហ៊ុន សែន មិនអនុញ្ញាតឲ្យពលរដ្ឋធ្វើដំណើរទៅថៃ វៀតណាម ឡាវ ឡើយក្នុងបរិបទកូវីដ-១៩
× ភ្នំពេញ៖ សម្ដេច ហ៊ុន សែន ក្នុងពិធីថ្លែងការណ៍ពិសេសទាក់ទងនឹង ព្រឹត្តិការណ៍២០កុម្ភៈ បានបញ្ជាមិនឱ្យ ប្រជាពលរដ្ឋខ្មែរ ធ្វើដំណើរពីកម្ពុជា ទៅកាន់ ប្រទេសថៃ វៀតណាម ឡាវ ទោះបីជាការធ្វើដំណើរនោះស្របច្បាប់ក្ដី។ កងកម្លាំងនៅតាមព្រំដែន ទាំងអស់ត្រូវ បិទច្រកចេញ មិនត្រូវអនុញ្ញាតឱ្យមានការឆ្លងដែនពីកម្ពុជាទៅប្រទេសទាំងបីនេះទេ។
ថ្លែងចេញពីគេហដ្ឋាននៅទីក្រុងតាខ្មៅ ខេត្តកណ្តាល នាព្រឹកថ្ងៃទី២០ខែកុម្ភៈ សម្តេចហ៊ុន សែន បានបញ្ជាឱ្យ បិទការឆ្លងដែនពីកម្ពុជា ទៅប្រទេស ថៃ ឡាវ និងវៀតណាម ប៉ុន្តែករណីមានប្រជាពលរដ្ឋខ្មែរ ឆ្លងដែនពីប្រទេសទាំង៣ នេះមកកម្ពុជា គឺអនុញ្ញាតឱ្យចូលក្នុងប្រទេស ប៉ុន្តែត្រូវឆ្លងកាត់ការធ្វើចត្តាឡីស័ក។
ច្រកអន្តរជាតិខ្មែរថៃ នៅប៉ោយប៉ែត។ រូបថត AFP
សម្ដេច នាយករដ្ឋមន្ត្រី បានសង្កត់ធ្ងន់យ៉ាងដូច្នេះថា៖ « ឥឡូវហាមអត់ឱ្យចូលទៅក្នុងប្រទេសថៃទេ ខ្ញុំបានបញ្ជាក់ពីដើម ស្របច្បាប់ក៏ដោយ មិនស្របច្បាប់ក៏ដោយ គឺអត់ឱ្យទៅទេ ព្រោះខាងថៃគេកំពុងតែគ្រប់គ្រង នៅតាមព្រំដែនកុំឱ្យមានអ្នកចូលក្នុងប្រទេសថៃ។ ឯចំពោះអ្នកត្រឡប់មកវិញ យើងមិនទទួលពលរដ្ឋយើងមិនបាន ព្រោះពលរដ្ឋយើងធ្វើដំណើរត្រឡប់មកវិញហើយ យើងត្រូវតែទទួល តែយើងត្រូវធ្វើចត្តាឡីស័ក ប៉ុន្តែអ្នកដែលចង់ឆ្លងដែនពីកម្ពុជា ទៅថៃ, ពីកម្ពុជាទៅ វៀតណាម, ពី កម្ពុជា ទៅឡាវ យើងមិនអនុញ្ញាតឱ្យទៅទេ។ អ៊ីចឹងកងកម្លាំង ការពារព្រំដែនទាំងអស់ត្រូវ បិទអត់មានឱ្យចេញទេ»។
សូមជម្រាបផងដែរថា នៅថ្ងៃនេះ ក្រសួងសុខាភិបាលបានប្រកាសពីករណីថ្មីចំនួន៣២ករណី ដោយភាគច្រើនជាប់ពាក់ព័ន្ធព្រឹត្តិការណ៍២០កុម្ភៈ ដែលនាំឱ្យករណីឆ្លងជំងឺកូវីដ-១៩ ក្នុងប្រទេសកម្ពុជា កើនដល់ ៥១៦នាក់ និងមានអ្នកជាសះស្បើយចំនួន ៤៧០នាក់៕
© រក្សាសិទ្ធិដោយ thmeythmey.com