អភិបាលរង និងជាអ្នកនាំពាក្យនៃរដ្ឋបាលខេត្តសៀមរាប លោក លី សំរិទ្ធ បានឱ្យដឹងថា អាជ្ញាធរនិងក្រុមការងារស្ថាបនាផ្លូវទាំង៣៨ខ្សែ បាននិងកំពុងសហការធ្វើយ៉ាងណាកាត់បន្ថយការកកស្ទះចរាចរណ៍ ក៏ដូចជាដីហុយ ពិសេសគឺពន្លឿនការងារ ក្នុងន័យបញ្ជៀសផលប៉ះពាល់ដល់ប្រជាពលរដ្ឋ។  លោកអភិបាលរងទទួលស្គាល់ចំពោះបញ្ហាខាងលើ និងសុំការយោគយល់ពីប្រជាពលរដ្ឋ ក៏ដូចជាភ្ញៀវទេសចរ អំឡុងពេលកំពុងស្ថាបនាផ្លូវខ្វាត់ខ្វែងក្នុងក្រុងទេសចរណ៍មួយនេះ។

 

យ៉ាងណា លោក លី សំរិទ្ធ ពន្យល់ថា៖«...ការងារដីនេះជិតបញ្ចប់ហើយដែរ នៅសល់តិចតួចទេ...ហេតុអ៊ីថាពិបាក ដោយសារការដ្ឋានបើកទាំងអស់តែម្ដង មានម្ដងមួយឯណា អ៊ីចឹងគ្រប់ខ្សែផ្លូវគឺការដ្ឋានទៅព្រមៗគ្នា»។ អ្នកនាំពាក្យរូបនេះ ក៏សុំឱ្យប្រជាពលរដ្ឋមានការអត់ធ្មត់ ព្រោះថាមិនយូរនោះទេ ក្រុងសៀមរាបនឹងប្រែមុខមាត់ថ្មី ហើយវាជាសមិទ្ធផលថ្មីសម្រាប់ពលរដ្ឋក្នុងក្រុងសៀមរាប និងជាមុខមាត់ថ្មីមួយបន្ថែមទៀតសម្រាប់កម្ពុជាទាំងមូល។

 

យោងតាមក្រសួងសាធារណការ និងដឹកជញ្ជូន គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាបចំនួន ៣៨ខ្សែ មានប្រវែង ១០៨,៧៥ គីឡូម៉ែត្រ ប្រើប្រាស់ថវិកាជាតិសរុបជាង ១៤០ លានដុល្លារ និងថវិកាជាង ៩លានដុល្លារទៀត សម្រាប់ការងារចាំបាច់ក្នុងការស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ដែលស្ថិតក្នុងក្រៅគម្រោងផ្លូវ៣៨ខ្សែ។ តាមផែនការ គម្រោងផ្លូវ៣៨ខ្សែ នឹងប្រើពេលសាងសង់ ១៣ខែ ដែលគម្រោងនឹងបញ្ចប់នៅចុងឆ្នាំ២០២១។ ការដ្ឋានការងារនេះអនុវត្តដោយអង្គភាពសាងសង់ចំនួន៨ ត្រូវបានបើកសម្ពោធនៅថ្ងៃទី៣០ ខែវិច្ឆិកា ក្រោមអធិបតីភាពសម្ដេចនាយករដ្ឋមន្រ្តី ហ៊ុន សែន នៅសួនច្បារព្រះរាជដំណាក់៕