បន្ទាប់ពីរដ្ឋប្រហារយោធានៅថ្ងៃទី១ ខែកុម្ភៈ របបសឹក បានរងសម្ពាធពីគ្រប់ទិសទី ទាំងនៅក្នុងប្រទេស និងសហគមន៍អន្តរជាតិ។ សូម្បីតែប្រេសិតមីយ៉ាន់ម៉ា ដែលធ្វើបេសកកម្មរបស់ខ្លួននៅក្រៅប្រទេស ក៏បានដាក់សម្ពាធលើរដ្ឋាភិបាលយោធាដែរ។ បាតុកម្មបានប្រព្រឹត្តទៅជាង ១ខែ ដោយមានអ្នកស្លាប់ច្រើនជាង ៦០នាក់ និងមនុស្សប្រមាណ ១៩០០នាក់ ត្រូវបានចាប់ខ្លួន។ 

 

ដើម្បីដោះស្រាយស្ថានការណ៍ក្រោយរដ្ឋប្រហារ រដ្ឋាភិបាលយោធា សម្រេចចិត្តជួលលោក Ari Ben-Menashe ជនជាតិកាណាដាកាត់អ៊ីស្រាអែល និងក្រុមហ៊ុនបញ្ចុះបញ្ចូល Dickens & Madson Canada ដើម្បីធ្វើជាតំណាងឱ្យរដ្ឋាភិបាលយោធានៅអាមេរិក និងដើរពន្យល់ទៅបណ្តាប្រទេសមួយចំនួន ជាពិសេសអាមេរិក និងអង្គការអន្តរជាតិ ពីអ្វីដែលកើតឡើងក្នុងស្រុក។។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

 

ក្នុងកិច្ចព្រមព្រៀង ដែលបានដាក់ទៅក្រសួងយុត្តិធម៌អាមេរិកក្នុងថ្ងៃទី៨ ខែមីនា ក្រុមហ៊ុន Dickens & Madson Canada នឹងតំណាងឱ្យរដ្ឋាភិបាលមីយ៉ាន់ម៉ា នៅក្នុងក្រុងវ៉ាស៊ីនតោន និងជួយបញ្ចុះបញ្ចូលអារ៉ាប៊ីសាអូឌីត, អេមីរ៉ាតអារ៉ាប់រួម, អ៊ីស្រាអែល និងរុស្ស៊ីជាដើម។ ទន្ទឹមនេះ ក្រុមហ៊ុន នឹងជួយរដ្ឋាភិបាលយោធាក្នុងការបង្កើត និងប្រតិបត្តិគោលនយោបាយ ដើម្បីជាប្រយោជន៍សម្រាប់ការអភិវឌ្ឍរបស់មីយ៉ាន់ម៉ាផងដែរ ជាពិសេសគឺពន្យល់ស្ថានការណ៍មីយ៉ាន់ម៉ា ក្រោយរដ្ឋប្រហារយោធាទៅបរទេស។ 

 

នៅក្នុងឯកសារដោយឡែកមួយទៀត កិច្ចព្រមព្រៀងនេះ រដ្ឋមន្រ្តីការពារជាតិមីយ៉ាន់ម៉ា Mya Tun Oo ជាអ្នកចរចាកិច្ចព្រមព្រៀងនេះជាមួយទំហំទឹកប្រាក់២លានដុល្លារ។ លោក Ben-Menashe ប្រាប់ទីភ្នាក់ងារព័ត៌មាន Reuters ថា លោកត្រូវបានរដ្ឋាភិបាលមីយ៉ាន់ម៉ាប្រគល់កិច្ចការឱ្យបញ្ចុះបញ្ចូលអាមេរិក ជុំវិញការពង្រឹងទំនាក់ទំនងជាមួយប្រទេសលោកខាងលិច និងនៅឱ្យឆ្ងាយពីចិន។ ជាមួយគ្នានេះ របបសឹកមីយ៉ាន់ម៉ា ក៏មានចង់ដោះស្រាយវិបត្តិជនជាតិភាគតិចរ៉ូហ៊ីងយ៉ាផងដែរ។ 

 

យ៉ាងណាមិញ ក្រុមហ៊ុន Dickens & Madson Canada ត្រូវមានលិខិតអនុញ្ញាតពីការិយាល័យគ្រប់គ្រងទ្រព្យសម្បត្តិបរទេស នៃក្រសួងហិរញ្ញវត្ថុអាមេរិក និងរដ្ឋាភិបាលកាណាដាជាមុនសិន ដើម្បីប្រាកដថា ការតំណាងឱ្យរដ្ឋាភិបាលយោធាមីយ៉ាន់ម៉ា នឹងមិនខុសច្បាប់។

 

សូមបញ្ជាក់ថា កន្លងមក អាមេរិក កាណាដា រួមទាំងអង់គ្លេស បានដាក់ទណ្ឌកម្មលើមេដឹកនាំយោធាមីយ៉ាន់ម៉ាជាច្រើនរូប ក្នុងទណ្ឌកម្មទាំងនោះរួមមាន ការបង្កកទ្រព្យសម្បត្តិ និងហាមឃាត់ប្រជាជនខ្លួនរកស៊ីជាមួយរបបសឹកមីយ៉ាន់ម៉ាជាដើម៕