ដោយ៖ ជី ចំរ៉ុង
 

 

ដើម្បីជ្រាបច្បាស់សូមអញ្ជើញលោក-អ្នកនាងទស្សនាបទសម្ភាសរវាង លោក ចន សុខន អ្នកចិញ្ចឹមបង្កងអូស្រ្តាលីនៅខេត្តត្បូងឃ្មុំ ជាមួយលោក ជី ចំរ៉ុង អ្នកសារព័ត៌មាននៃសារព័ត៌មានថ្មីៗ២៥ ដូចតទៅ៖ 

 

«ដំបូងខ្ញុំសុំទិញមេពូជគេ១ និងកូន១០០ យកមកចិញ្ចឹមកម្សាន្តលេងហ្នឹង មិនថាយកជាអាជីពអ៊ីចឹងទេ។ តែពេលចិញ្ចឹមបានកាក់កបទៅចេះតែពង្រីកថែមទៅ» ។ នេះជាការបញ្ជាក់របស់ កសិករ សុខន ដោយលោកបានបន្ថែមថា សព្វថ្ងៃកសិដ្ឋានរបស់លោក មានមេពូជប្រមាណ៥ពាន់ក្បាល និងស្រះចំនួន៣០។ 

 

កសិដ្ឋានចិញ្ចឹមបង្កងរបស់លោក សុខន មានផ្ទៃដីជិត ៣ហិកតា ដែលលោកទើបតែបានចាប់ផ្ដើមចិញ្ចឹមអស់រយៈពេលត្រឹមតែ៨ខែប៉ុណ្ណោះ។  លោក សុខន បានបញ្ជាក់ថា៖ « [ខ្ញុំ] លក់បាន២ដងហើយ ដោយលក់បានមេដា២០០ក្បាល និងកូន២ម៉ឺនក្បាល។  តម្លៃកូនបង្កង១គូ ២ពាន់រៀល ហើយតម្លៃមេប៉ា ១គូ ១០ដុល្លារ»។ 
 

លោក សុខន ទិញស្រូវមកត្រាំទឹកទុករយៈ២យប់ និងហាល២យប់ មុននឹងដាក់ឲ្យបង្កង។ ជាមួយគ្នានេះ លោក សុខន ក៏ប្រើចំណីបង្កងដែលមានលក់លើទីផ្សារធម្មតាដែរ។ នាថ្ងៃអនាគត លោក សុខន ចង់បន្ថែមដើបដូង នៅលើដីកសិដ្ឋានរបស់លោក ដើម្បីបានចំណូលបន្ថែម និងមិនចង់ទុកដីទំនេរចោល៕