COVID-19
ជាតិ
ស្រីអុិត តារាកំប្លែង ឆ្លងកូវីដ-១៩
× អ្នកស្រី សេន ចិន្តា ឬស្រីអ៊ិត ដែលជាតារាកំប្លែងប្រចាំទូរទស្សន៍ ស៊ីធីអិន បានបញ្ជាក់ប្រាប់សារព័ត៌មានថ្មីៗថា ខ្លួនពិតជាបានឆ្លងកូវីដ-១៩ មែន។ បច្ចុប្បន្ន តារាកំប្លែងរូបនេះ កំពុងទទួលបានការព្យាបាលនៅសណ្ឋគារ Great Duke។ ស្រីអ៊ិត បានបញ្ជាក់ដូច្នេះ៖«ជាការពិត! ខ្ញុំឆ្លងមែន។ ខ្ញុំដឹងលទ្ធផលនៅថ្ងៃទី១២ មីនា»។
អ្នកស្រី ស្រីអ៊ិត បញ្ជាក់ប្រាប់សារព័ត៌មានថ្មីៗទៀតថា សមាជិកគ្រួសាររបស់ខ្លួន ៣នាក់ទៀត កំពុងរង់ចាំលទ្ធផលតេស្ត ដែលក្រុមគ្រូពេទ្យបានយកសំណាកក្រោយលទ្ធផលវិជ្ជមានកូវីដ-១៩របស់ខ្លួន ខណៈតារាកំប្លែងរូបនេះ អះអាងថាខ្លួនបានបញ្ជូនកូន ទៅស្រុកកំណើតនៅស្រុកគងពិសី ខេត្តកំពង់ស្ពឺ តាំងពីថ្ងៃទី៣ មីនាមកម្ល៉េះ។ ដ្បិតបានឆ្លងកូវីដ-១៩ មែន ប៉ុន្តែតារាកំប្លែងរូបនេះ អះអាងថា សុខភាពរបស់ខ្លួនរឹងមាំល្អ មិនមានទ្រុឌទ្រោមអ្វីនោះឡើយ។
គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុប ១២៦៤នាក់។ ករណីសហគមន៍២០កុម្ភៈ មានដល់ទៅ៧៥១នាក់ ដែលស្ថិតក្នុងរាជធានីភ្នំពេញ កណ្តាល ព្រះសីហនុ ព្រៃវែង ស្វាយរៀង កោះកុង កំពង់ធំ កំពង់ចាម សៀមរាប និងបាត់ដំបង។ តារាចម្រៀង លោក ណុប បាយ៉ារិទ្ធ, អ្នកនាង សុគន្ធ និសា, កញ្ញា វី ដាណែត ,ពិធីការិនី កែវ ចាន់និមល ក៏ស្ថិតក្នុងចំណោមអ្នកឆ្លងក្នុងសហគមន៍នេះដែរ។
បច្ចុប្បន្ន នៅមានអ្នកជំងឺចំនួន ៦៣៩នាក់ទៀតកំពុងបន្តសម្រាកព្យាបាល ខណៈមានបុរសខ្មែរម្នាក់ បានបាត់បង់ជីវិត កាលពីថ្ងៃទី១១ខែមីនា៕
© រក្សាសិទ្ធិដោយ thmeythmey.com