COVID-19
ជាតិ
បិទឃុំចំនួន៤ នៅខេត្តព្រៃវែង ដោយសារជំងឺកូវីដ-១៩ រាតត្បាតខ្លាំង រដ្ឋបាលស្រុកពាមរក៍ បានយកសម្ភារ ជូនបងប្អូនប្រជាពលរដ្ឋធ្វើចត្តាឡីស័កនៅឃុំអ្នកលឿង និងឃុំព្រែខ្សាយ(ខ) កាលពីពេលកន្លងទៅ។ រូបភាពពីហ្វេសប៊ុក Von Mony Viney
× រដ្ឋបាលខេត្តព្រៃវែង បានសម្រេចបិទការចេញ-ចូល ឃុំព្រែកខ្សាយ ក, ឃុំព្រែកខ្សាយ ខ ,ឃុំអ្នកលឿង និងឃុំពាមរក៍ នៃស្រុកពាមរក៍ ខេត្តព្រៃវែង ជាបណ្តោះអាសន្ន ដោយសារតែជំងឺកូវីដ-១៩ នៅតែបន្តរាលដាលខ្លាំង នៅក្នុងឃុំខាងលើ។ តាមលិខិតរបស់រដ្ឋបាលខេត្ត ការបិទឃុំទាំង៤ ជាបណ្តោះអាសន្ននេះ ចាប់ផ្តើមពីពាក់កណ្តាលយប់ថ្ងៃទី១៣ ឈានចូលថ្ងៃទី១៤មីនានេះ។
តាមលិខិតដដែល គិតត្រឹមថ្ងៃទី ១៣មីនា មានពលរដ្ឋក្នុងខេត្តព្រៃចំនួន ៤៤ នាក់ បានឆ្លងកូវីដ-១៩ ក្នុងនោះមាន៣៩នាក់ ជាអ្នករស់នៅស្រុកពាមរក៍។
គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុប ១២៦៤នាក់។ ករណីសហគមន៍២០កុម្ភៈ មានដល់ទៅ៧៥១នាក់ ដែលស្ថិតក្នុងរាជធានីភ្នំពេញ កណ្តាល ព្រះសីហនុ ព្រៃវែង ស្វាយរៀង កោះកុង កំពង់ធំ កំពង់ចាម សៀមរាប និងបាត់ដំបង។ អ្នកជំងឺចំនួន ៦៣៩នាក់ទៀតកំពុងបន្តសម្រាកព្យាបាល រីឯម្នាក់ បានស្លាប់កាលពីថ្ងៃទី១១ខែមីនា៕
© រក្សាសិទ្ធិដោយ thmeythmey.com