បើតាមតួលេខក្រសួងសុខាភិបាល ពលរដ្ឋទូទៅ១៧០,៦៥៩នាក់ ដែលស្ថិតនៅក្រុមអាទិភាព បានចាក់វ៉ាក់សាំងទាំង២ប្រភេទខាងលើ ដោយក្នុងនោះមានស្រី្តជាង៥,៧ម៉ឺននាក់ ខណៈខាងក្រសួងការពារជាតិ មានស្ត្រីជាកងទ័ព ជាង៩ពាន់នាក់បានចាក់វ៉ាក់សាំងការពារជំងឺកូវីដ-១៩ ផងដែរ។ ជាមួយគ្នានេះ ក៏មានពលរដ្ឋជាង១,៨ម៉ឺននាក់ ត្រូវបានគ្រូពេទ្យមិនអនុញ្ញាតឱ្យចាក់វ៉ាក់សាំងទាំងនេះ ព្រោះតែមានបញ្ហាសុខភាពដែលខុសលក្ខខណ្ឌកំណត់។ 

 

ចំពោះវ៉ាក់សាំងSinopharm អាចចាក់លើមនុស្សអាយុចាប់ពី១៨ឆ្នាំ ដល់៥៩ឆ្នាំ ប៉ុណ្ណោះ។  រីឯ វ៉ាក់សាំង AstraZeneca សម្រាប់ចាក់លើមន្ត្រី និងពលរដ្ឋអាទិភាព ដែលមានអាយុចាប់ពី៦០ឆ្នាំឡើង។ សម្រាប់អ្នកដែលមានបញ្ហាសុខភាពនិងប្រតិកម្មនានា គឺមិនអាចចាក់វ៉ាក់សាំងការពារកូវីដ-១៩ ទាំងនេះ បានឡើយ។ 

 

ត្រឹមរយៈពេល២៣ថ្ងៃនៃការផ្ទុះឡើងនូវព្រឹត្តិការណ៍២០កុម្ភៈ កម្ពុជាមានមនុស្សរហូតដល់៨១០នាក់ ដែលបានឆ្លងជំងឺកូវីដ-១៩ ដោយក្នុងនោះ មានបុរសម្នាក់បានស្លាប់ដោយសារតែជំងឺនេះ។ ចំនួនអ្នកឆ្លងនេះ គឺ ស្មើជាង៦០ ភាគរយនៃអ្នកឆ្លងកូវីដ-១៩នៅកម្ពុជា សរុប១,៣២៥នាក់។ ក្នុងចំណោម អ្នកឆ្លងកូវីដ-១៩ សរុបនេះ មាន៧៣០នាក់ បានជាសះស្បើយពីជំងឺនេះផងដែរ៕