លោក យាន រក្សា ប្រធានក្រុមប្រឹក្សានៃសមាគមស្រី្តដើម្បីសង្គម ថ្លែងប្រាប់សារព័ត៌មានថ្មីៗនៅថ្ងៃទី២៥មីនាថា ប្រធានសមាគមខ្លួន គឺកញ្ញា កែវ ទិត្យលីដា និងសមាជិកចំនួន៥នាក់ទៀត ត្រូវសមត្ថកិច្ចឃាត់ឃ្លាត់ខ្លួន កាលពីថ្ងៃទី២៤មីនា ក្នុងសង្កាត់ស្ទឹងមានជ័យ១ ដោយសារចុះប្រមូលស្នាមមេដៃពលរដ្ឋ ដោយគ្មានការអញ្ញាតពីក្រសួងមហាផ្ទៃ។ ក្រុមរបស់លោកក៏ព្រមទទួលស្គាល់កំហុស និងធ្វើកិច្ចសន្យាឈប់ប្រមូលស្នាមមេដៃបន្តទៀតដែរ។ 

 

«ក្រុមខ្ញុំទទួលស្គាល់ថាការប្រមូលស្នាមមេដៃនេះ ធ្វើឡើងដោយគ្មានការអនុញ្ញាត ដោយពុំដឹងថាសកម្មភាពនេះត្រូវសុំការអនុញ្ញាតពីក្រសួង។ ហើយនៅព្រឹកនេះ ខាងសមត្ថកិច្ចបានឲ្យក្រុមខ្ញុំធ្វើកិច្ចសន្យាឈប់ធ្វើសកម្មភាពប្រមូលស្នាមមេដៃ រួមហើយក៏បានដោះលែងក្រុមខ្ញុំវិញ។ សមត្ថកិច្ចបញ្ជាក់ថាការប្រមូលស្នាមមេដៃនេះ ប្រសិនបើចង់ធ្វើគឺត្រូវឲ្យសុំការអនុញ្ញាតពីក្រសួងមហាផ្ទៃឬសាលាក្រុងជាមុខសិន »។ នេះបើតាមការលើកឡើងរបស់លោក យាន រក្សា ។ 

 

ជុំវិញការស្នើសុំដង្ហែញត្តិទៅឧុទ្ទកាល័យសម្ដេច ហ៊ុន សែន លោក រក្សា ថា ខាងរដ្ឋបាលសាលារាជធានីភ្នំពេញ មិនអនុញ្ញាតឲ្យដង្ហែនោះទេ ដោយអនុញ្ញាតឲ្យបុគ្គលណាម្នាក់ជាតំណាងយកទៅដាក់តែប៉ុណ្ណោះ។ ការធ្វើបែបនេះ គឺដើម្បីបង្ការការរីករាលដាលនៃកូវីដ-១៩។ ជាមួយគ្នាដែរ ប្រធានក្រុមប្រឹក្សានៃសមាគមស្រី្តដើម្បីរូបនេះថា គម្រោងដាក់ញត្តិនៅថ្ងៃទី២៦ មីនា ក្រុមលោកមិនច្បាស់ថា អាចដំណើរការដាក់ញត្តិតាមគម្រោង ឬយ៉ាងនោះទេ គឺត្រូវរង់ចាំពិភាក្សាគ្នាបន្តទៀតសិន។  

 

កន្លងមកក្រុមប្រឹក្សានៃសមាគមស្រី្តបានប្រមូលស្នាមមេដៃពីពលរដ្ឋ បានប្រមាណ៣០០នាក់ហើយ ដើម្បីចូលរួមដាក់ញត្តិសុំសម្ដេច ហ៊ុន សែន ជួយលើកលែងថ្លៃទឹក ភ្លើង និងបញ្ចុះតម្លៃផ្ទះជាដើម។ ការស្នើសុំការលើកលែងនេះ គឺសម្រាប់តែអ្នកខ្វះខាត ពិសេសសិស្សនិស្សិត និងកម្មកររោងចក្រតែប៉ុណ្ណោះ។