សេចក្តីជូនព័ត៌មានរបស់ក្រសួងសុខាភិបាលនាព្រឹកថ្ងៃទី២៥ ខែមីនា បានបង្ហាញថា កម្ពុជា មាន ករណីវិជ្ជមានថ្មីចំនួន៥៥ទៀតដែលក្នុងនោះ២៤នាក់ស្ថិតក្នុងមូលដ្ឋានខណ្ឌឫស្សីកែវ រាជធានីភ្នំពេញ។ ការគណនាដោយផ្អែកតាមទិន្នន័យប្រចាំថ្ងៃរបស់ក្រសួងសុខាភិបាល បង្ហាញខណ្ឌឫស្សី មានប្រមាណ៨០ករណីហើយដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈ។

 

លោកអភិបាលខណ្ឌ ដែលតែងតែប្រើឧគ្ឃោសនសព្ទស្រែកណែនាំពលរដ្ឋ ជាពិសេស អ្នកធ្វើចត្តា ឡីស័ក ឲ្យគោរពតាមវិធានការក្រសួងសុខាភិបាលនោះ បានបញ្ជាក់ថា នារយៈពេលចុងក្រោយនេះ អាជ្ញាធរមូលដ្ឋាន ជាពិសេសលោកផ្ទាល់តែងតែរង់ចាំលទ្ធផលសំណាក ដោយពេលខ្លះ ដល់ម៉ោង១ យប់ ហើយក្នុងករណីមានអ្នកវិជ្ជមាន អាជ្ញាធរត្រូវរៀបចំចាត់ចែងដឹកអ្នកជំងឺទៅមន្ទីរពេទ្យ ហើយបន្តយកសំណាកអ្នកពាក់ព័ន្ធឱ្យបានទាន់ពេលវេលា។

 

ក្នុងបទសម្ភាសតាមទូរសព្ទជាមួយសារព័ត៌មានថ្មីៗ កាលពីថ្ងៃទី២៣ ខែមីនា លោក ជា ពិសី បានបញ្ជាក់ថា ពលរដ្ឋនៅមូលដ្ឋានខណ្ឌឫស្សី ប្រមាណ៥០០នាក់ពាក់ព័ន្ធនឹងព្រឹត្តិការណ៍២០កុម្ភៈ កំពុងធ្វើចត្តាឡីស័ក នៅជាង២០ទីតាំងផ្សេងៗគ្នា។ 

 

លោកបានបញ្ជាក់ថា អាជ្ញាធរមូលដ្ឋានតែងតែយកចិត្តទុកដាក់ចំពោះពលរដ្ឋដែលជួបទុក្ខលំបាក ដោយនាំយកអំណាយជូនអ្នកចត្តាឡីស័កនិងបានចុះផ្សព្វផ្សាយដោយផ្ទាល់ជាប្រចាំពីវិធានការការពាជំងឹកូវីដ-១៩ ដល់ពលរដ្ឋនៅតាមមូលដ្ឋាន។

លោក ជា ពិសី បានលើកឡើងថា ទន្ទឹមមានការប្រឹងប្រែងពីគ្រូពេទ្យ និងអាជ្ញាធរ ការចូលរួមពីពលរដ្ឋ ជាកត្តាដ៏សំខាន់មួយ ដើម្បីទប់ស្កាត់ជំងឺរាតត្បាតសកលនេះ។  លើសពីនេះ លោកតែងលើកទឹកចិត្ត និងផ្តល់កម្លាំងចិត្តដល់ពលរដ្ឋកើតជំងឺកូវីដ-១៩ កុំឲ្យមានការព្រួយបារម្ភ នៅពេលដែល ក្រុមគ្រូពេទ្យ យកពួកគេទៅព្យាបាល។

 

« យើងត្រូវខិតខំធ្វើឱ្យសកម្ម ព្រោះយើងជាអាជ្ញាធរជាម៉ែឪ ជាអាណាព្យាបាល ជាអ្នកបម្រើ របស់ ពលរដ្ឋ យើងអត់គិតការនឿយហត់នោះឡើយ ពោលគឺដើរតួនាទីកាន់តែច្រើន លើសពី អាណា ព្យាបាលទៅទៀត»។ នេះជាការបញ្ជាក់របស់អភិបាលខណ្ឌឫស្សីកែវ ដោយបានប្ដេជ្ញា ប្រឹងប្រែង ទប់ស្កាត់ការរីករាលដាលនៃជំងឺកូវីដ-១៩ ដើម្បីឆាប់បិទបញ្ចប់ព្រឹត្តិការណ៍២០ កុម្ភៈ។

 

តាមរបាយការណ៍ជាតិស្តីពីលទ្ធផលជំរឿនឆ្នាំ២០១៩ ខណ្ឌឫស្សីកែវ ដែលជាខណ្ឌដ៏ធំមួយក្នុងចំណោម១៤ខណ្ឌក្នុងរាជធានីភ្នំពេញ។ ខណ្ឌនេះមាន៧សង្កាត់ ដោយមានពលរដ្ឋជិត៦៣០០០គ្រួសារ ឬជាង២៧ម៉ឺននាក់៕