ដើម្បីរក្សាសន្តិសុខ សុវត្ថិភាព សណ្ដាប់ធ្នាប់ និងរបៀរៀបរយតាមបណ្ដាគោលដៅចត្តាឡីស័ក រដ្ឋបាលរាជធានីភ្នំពេញ បានកំណត់ដាក់ទីតាំងចត្តាឡីស័កទាំងអស់រួមមាន លំនៅដ្ឋានឯកជន អគារស្នាក់នៅរួម-ខុនដូ ក្លឹបកម្សាន្ត និងទីតាំងអាជីវកម្ម ដែលជាប់ពាក់ព័ន្ធព្រឹត្តិការណ៍សហគមន៍២០កុម្ភៈ ឲ្យនៅក្រោមការគ្រប់គ្រងរបស់គណៈបញ្ជាការឯកភាព រដ្ឋបាលរាជធានីភ្នំពេញ។ បន្ទាប់មកគណៈបញ្ជាការឯកភាពរដ្ឋបាលរាជធានីភ្នំពេញ ត្រូវប្រគល់ភារកិច្ចការពារសន្តិសុខ សណ្ដាប់ធ្នាប់ ទៅដល់រដ្ឋបាលខណ្ឌទាំង១៤ ដោយបង្កើតក្រុមការងារគ្រប់គ្រងទីតាំងចត្តាឡីស័ក ដើម្បីប្រចាំការ២៤ម៉ោង។ 
 

លោក ឃួង ស្រេង បានសង្កត់ធ្ងន់ថា៖ «កត់ត្រាអត្តសញ្ញាណ(ឈ្មោះ លេខទូរស័ព្ទ និងអាសយដ្ឋាន) រាល់បុគ្គលដែលបានយកកញ្ចប់អាហារឬ សម្ភារៈផ្សេងៗ ជូនដល់អ្នកដែលកំពុងធ្វើចត្តាឡីស័ក ក្នុងនោះក្រុមការងារត្រូវបាញ់អាល់កុលសម្លាប់មេរោគ និងត្រួតពិនិត្យរាល់កញ្ចប់អាហារ និងសម្ភារៈទាំងនោះ ឲ្យបានច្បាស់លាស់ មុននឹងប្រគល់ជូនផ្នែកខាងក្នុង»។ 
 

ជាមួយគ្នាដែរ ប្រសិនបើមានករណីសង្ស័យ ត្រូវឃាត់ខ្លួនបុគ្គលនោះ(អ្នកផ្ញើអីវ៉ាន់ឲ្យអ្នកចត្តាឡីស័ក) ហើយរាយការណ៍ទៅរដ្ឋបាលខណ្ឌ។ លើសពីនេះ ត្រូវរៀបចំផែនការសន្តិសុខត្រៀមបង្ការទុកជាមុន សម្រាប់ទប់ទល់ព្រឹត្តិការណ៍ឬការបង្កចលាចលនានា ដែលកើតឡើងជាយថាហេតុ នៅតាមគោលដៅចត្តាឡីស័ក៕