COVID-19
ជាតិ
មនុស្សចំនួន ៦៣នាក់ទៀត វិជ្ជមានកូវីដ-១៩ ខណៈអ្នកសះស្បើយមាន១៥នាក់
× មនុស្សចំនួន ៦៣នាក់ ទៀតមានវិជ្ជមានជំងឺកូវីដ-១៩ ក្នុងនោះខេត្តព្រះសីហនុរកឃើញច្រើនជាងគេ បន្ទាប់មកគឺនៅរាជធានីភ្នំពេញ។ មនុស្សចំនួន ១៥នាក់បន្ថែមទៀត ក៏បានជាសះស្បើយដែរ។ នេះបើតាមក្រសួងសុខាភិបាលនៅថ្ងៃទី ៣១ មីនានេះ។ គិតមកទល់ពេលនេះ កម្ពុជាមានអ្នកវិជ្ជមានកូវីដ-១៩ សរុប ២៤៤០នាក់ ក្នុងនោះព្រឹត្តិការណ៍សហគមន៍ ១៩១៤នាក់។ អ្នកសះស្បើយមានចំនួន ១១៩១នាក់ ខណៈអ្នកស្លាប់មាន១១នាក់ ដោយសារជំងឺកូវីដ-១៩។
ក្នុងចំណោមអ្នកវិជ្ជមានថ្មីទាំងនេះ មាននៅខេត្តព្រះសីហនុច្រើនជាងគេ គឺមានចំនួន ៣៤ នាក់ដែលសុទ្ធតែជាពលរដ្ឋខ្មែរ ក្នុងនោះមានក្មេង ៨នាក់ផង។ ក្នុងចំណោមអ្នកវិជ្ជមានទាំងនេះ មាន២០នាក់ ជាអ្នករស់នៅសង្កាត់ទំនប់រលក , ៥នាក់ រស់នៅសង្កាត់លេខ៤, មនុស្សចំនួន ៦នាក់ រស់នៅសង្កាត់លេខ ៣ , និង៣នាក់រស់នៅសង្កាត់លេខ១ ក្រុងព្រះសីហនុ។
នៅរាជធានីភ្នំពេញ មាន២៣នាក់ ដែលជាអ្នករស់នៅខណ្ឌច្បារអំពៅ, ខណ្ឌជ្រោយចង្វារ ,ខណ្ឌទួលគោក, ខណ្ឌដូនពេញ,ខណ្ឌពោធិ៍សែនជ័យ, ខណ្ឌសែនសុខ,ខណ្ឌ៧មករា និងខណ្ឌឫស្សីកែវ។
ខេត្តត្បូងឃ្មុំចំនួន ៤នាក់ ក្នុងនោះមានកុមារអាយុ៥ឆ្នាំម្នាក់ ដែលរស់នៅឃុំមេមត់ ស្រុកមេមត់ និង៣នាក់ទៀតជាអ្នករស់នៅឃុំត្រមូង ស្រុកមេមត់។ ខេត្តកណ្តាល មាន១នាក់ មានអាសយដ្ឋាននៅឃុំជ្រៃលាស់ ស្រុកពញាឮ , និង១នាក់ ជាអ្នកខេត្តស្វាយរៀង រស់នៅសង្កាត់ចុងព្រែក ក្រុងស្វាយរៀង។
ទន្ទឹមនឹងនេះក្រសួងក៏បញ្ជាក់ដែរមាន មនុស្ស១៥នាក់ ទៀតជាសះស្បើយផងដែរ ដោយ៥នាក់ ត្រូវបានអនុញ្ញាតឲ្យចេញពីពីមជ្ឈមណ្ឌលជាតិកំចាត់រោគរបេង និងហង់សិន , ៦នាក់ត្រូវបានអនុញ្ញាតឱ្យចេញពីមន្ទីរពេទ្យខេត្តព្រះសីហនុ និង៤នាក់ទៀត ត្រូវបានអនុញ្ញាតឱ្យចេញពីមណ្ឌលសុខភាពចាក់អង្រែ។
គិតមកដល់ពេលនេះ អ្នកកើតកូវីដ-១៩សរុបនៅកម្ពុជាឡើងដល់ ២ ៤៤០នាក់ ដែលក្នុងនោះ ១ ៩១៤ នាក់ ស្ថិតក្នុងករណីសហគមន៍២០កុម្ភៈ ដែលរាលដាលក្នុងរាជធានីភ្នំពេញ ខេត្តកណ្តាល ព្រះសីហនុ សៀមរាប ព្រៃវែង ស្វាយរៀង កោះកុង កំពង់ចាម កំពង់ធំ ត្បូងឃ្មុំ កែប តាកែវ កំពត និងបាត់ដំបង។ អ្នកសះស្បើយសរុបមាន ១ ១៩១នាក់ អ្នកស្លាប់មាន១១នាក់ រីឯ៤នាក់ទៀត ស្លាប់ដោយសារជំងឺផ្សេងៗ នាអំឡុងពេលព្យាបាលកូវីដ-១៩។ មនុស្សចំនួន ១ ២៣៤នាក់ ទៀតកំពុងបន្តសម្រាកព្យាបាល៕
© រក្សាសិទ្ធិដោយ thmeythmey.com