COVID-19
ជាតិ
ស្ត្រីខ្មែរអាយុ ២៨ឆ្នាំម្នាក់ទៀតស្លាប់ដោយសារកូវីដ-១៩ ជាករណីទី ១៣ នៅកម្ពុជា
× ស្ត្រីខ្មែរ ម្នាក់ទៀត អាយុ ២៨ឆ្នាំ បានស្លាប់ដោយសារជំងឺកូវីដ-១៩ ដែលជាករណីទី១៣ នៅកម្ពុជា។ បើតាមក្រសួងសុខាភិបាល ស្ត្រីរូបនេះ បាត់បង់ជីវិតដោយសារវិបត្តិផ្លូវដង្ហើមធ្ងន់ធ្ងរ រលាកសួតសងខាងដោយសារកូវីដ-១៩ ខណៈដែលអ្នកជំងឺ ជាអ្នកទឹកនោមផ្អែម ប្រភេទ ១ និងជំងឺខ្សោយតម្រង់នោមធ្ងន់ធ្ងរ។
អ្នកជំងឺរូបនេះ បានចូលសម្រាកនៅមន្ទីរពេទ្យមិត្តភាពខ្មែរ-សូវៀត នៅថ្ងៃទី៣០ មីនាម្សិលមិញ និងមានសភាពធ្ងន់ធ្ងររួចទៅហើយ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល ដែលបញ្ជាក់ទៀតថា៖« អ្នកជំងឺ មានជំងឺប្រចាំកាយដូចជា ជំងឺទឹកនោមផ្អែមប្រភេទ ១ ជំងឺខ្សោយតម្រង់នោមធ្ងន់ធ្ងរដំណាក់ចុងក្រោយ អាចជាមូលហេតុបណ្តាលឱ្យអ្នកជំងឺ ធ្លាក់ក្នុងស្ថានភាពធ្ងន់ធ្ងរ»។
ក្រសួងសុខាភិបាល បន្តទៀតថា បើទោះជាក្រុមគ្រូពេទ្យ បានខិតខំយកចិត្តទុកដាក់ ជួយសង្គ្រោះព្យាបាលតាមបច្ចេកទេស ដោយរួមផ្សំការប្រើប្រាស់ម៉ាស៊ីនជំនួយផ្លូវដង្ហើមផងនោះ នៅតែមិនអាចសង្គ្រោះបាន ហើយអ្នកជំងឺបានបាត់បង់ជីវិតនៅម៉ោង ២ និង៤០នាទីរសៀល ថ្ងៃទី៣១ មីនានេះ។ អ្នកជំងឺជាអ្នករស់នៅភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
អ្នកស្លាប់ដោយសារកូវីដ-១៩ ចំនួន ១២នាក់កន្លងមកនៅកម្ពុជាមាន បុរសអាយុ៥០ឆ្នាំ, ស្ត្រីអាយុ៦២ឆ្នាំ (ភរិយាតារាចម្រៀង ហួរ ឡាវី), បុរសអាយុ៤៦ឆ្នាំ, បុរសអាយុ៧៥ឆ្នាំ (វេជ្ជបណ្ឌិត ស្តើង ជា) និងស្ត្រីអាយុ៦២ឆ្នាំ (ម្តាយតារាកំប្លែងស្រីពីន), បុរសចិនអាយុ៤៣ឆ្នាំ និងបុរសខ្មែរអាយុ៣៨ឆ្នាំ (DJ Boom), បុរសអាយុ៥៥ឆ្នាំ, ស្ត្រីអាយុ៧២ឆ្នាំ, ស្ត្រីអាយុ៧៦ឆ្នាំ, បុរសអាយុ៧៨ឆ្នាំ (ស្លាប់នៅផ្ទះ) និងស្ត្រី អាយុ៥៦ឆ្នាំ ស្លាប់នៅមន្ទីរពេទ្យមិត្តភាពខ្មែរ-សូវៀត នៅព្រឹកថ្ងៃទី ៣១មីនានេះដែរ។
គិតមកដល់ពេលនេះ អ្នកកើតកូវីដ-១៩សរុបនៅកម្ពុជាឡើងដល់ ២ ៤៤០នាក់ ដែលក្នុងនោះ ១ ៩១៤ នាក់ ស្ថិតក្នុងករណីសហគមន៍២០កុម្ភៈ ដែលរាលដាលក្នុងរាជធានីភ្នំពេញ ខេត្តកណ្តាល ព្រះសីហនុ សៀមរាប ព្រៃវែង ស្វាយរៀង កោះកុង កំពង់ចាម កំពង់ធំ ត្បូងឃ្មុំ កែប តាកែវ កំពត និងបាត់ដំបង។ អ្នកសះស្បើយសរុបមាន ១ ១៩១នាក់ អ្នកស្លាប់មាន១៣ នាក់ រីឯ៤នាក់ទៀត ស្លាប់ដោយសារជំងឺផ្សេងៗ នាអំឡុងពេលព្យាបាលកូវីដ-១៩៕
© រក្សាសិទ្ធិដោយ thmeythmey.com