COVID-19
ជាតិ
វ៉ាក់សាំងចិន ៧០ម៉ឺនដូសទៀត បានមកដល់កម្ពុជាហើយ វ៉ាក់សាំងស៊ីណូហ្វាម ៧០ម៉ឺនដូស ដែលជាជំនួយរបស់ប្រទេសចិន បានដឹកមកដល់អាកាសយានដ្ឋានអន្តរជាតិភ្នំពេញ តាមជើងហោះហើររបស់កងទ័ពជើងអាកាសចិន នាយប់ថ្ងៃទី ៣១ ខែមីនា ២០២១
× ភ្នំពេញ៖ វ៉ាក់សាំងស៊ីណូហ្វាម ៧០ម៉ឺនដូស ដែលជាជំនួយរបស់ប្រទេសចិន បានមកដល់កម្ពុជាហើយ នាយប់ថ្ងៃទី ៣១ ខែមីនានេះ។ វ៉ាក់សាំងនេះ បានដឹកមកដល់អាកាសយានដ្ឋានអន្តរជាតិភ្នំពេញ តាមជើងហោះហើររបស់កងទ័ពជើងអាកាសចិន។
ពិធីទទួលវ៉ាក់សាំង ស៊ីណូហ្វាមនេះ បានធ្វើឡើងក្រោមវត្តមានរបស់ សម្ដេច ទៀ បាញ់ រដ្ឋមន្ត្រីក្រសួងការពារជាតិ ជាមួយ លោក វ៉ាង វិនធាន ឯកអគ្គរដ្ឋទូតចិន ប្រចាំកម្ពុជា។
ក្នុងចំណោមវ៉ាក់សាំង ៧០ម៉ឺនដូសមកដល់នេះ ៤០ម៉ឺនដូស ជាវ៉ាក់សាំងដែលចិនសន្យាឱ្យលើកទីមួយ រីឯ ៣០ម៉ឺនដូសទៀត ជាជំនួយលើកទីពីរ។ សរុបវ៉ាក់សាំងស៊ីណូហ្វាម ដែលចិនឱ្យកម្ពុជាមានចំនួន ១លាន ៣សែនដូស។
ចំពោះវ៉ាក់សាំង របស់ក្រុមហ៊ុន Sinopharm នេះ នឹងប្រគល់ជូនក្រសួងការពារជាតិ ដើម្បីដាក់ចូលក្នុងឃ្លាំង នឹងបន្តចាក់ជូនកងទ័ព និងគ្រួសារកងទ័ព។
កន្លងមក កម្ពុជាបានទទួលវ៉ាក់សាំង ជាង២លានដូស ដោយក្នុងនោះ មានវ៉ាក់សាំងSinopharm ចំនួន៦០ម៉ឺនដូស ជាជំនួយជំហានទីមួយរបស់រដ្ឋាភិបាលចិន , វ៉ាក់សាំង COVISHIELD ជាង៣២ម៉ឺនដូស ដែលកម្ពុជាបានតាមរយៈយន្តការ COVAX និងវ៉ាក់សាំងរបស់ក្រុមហ៊ុនSinovac ប្រមាណ១,៥លានដូស ។ វ៉ាក់សាំង Sinovac ១,៥លានដូសនេះ គឺចិនលក់ឱ្យកម្ពុជា ក្នុងតម្លៃ១៥លានដុល្លារ ។បានន័យថា ១ដូស តម្លៃ១០ដុល្លារ។
គិតត្រឹមថ្ងៃទី ៣១ ខែមីនា កម្ពុជាមានពលរដ្ឋជាង ៤០ម៉ឺននាក់ហើយ បានចាក់វ៉ាក់សាំងការពារជំងឺកូវីដ-១៩ ដោយក្នុងនោះ មាន ១៤ម៉ឺននាក់ ជាកងកម្លាំងយោធា និង ២៦,២ម៉ឺននាក់ ជាក្រុមពលរដ្ឋអទិភាព៕
© រក្សាសិទ្ធិដោយ thmeythmey.com