ប្រព័ន្ធសេវាការងារ និងព័ត៌មានទីផ្សារការងារតាមអ៊ីនធឺណិត ដែលដាក់ឲ្យដំណើរការនេះ គឺជាសមិទ្ធផលថ្មីមួយទៀត ក្នុងវិស័យការងារកម្ពុជា ដែលនឹងផ្តល់ដល់អ្នកប្រើប្រាស់ ភាគីពាក់ព័ន្ធទាំងអស់ និងសាធារណជន នូវគេហទំព័រការងារជំនាន់ថ្មី សម្រាប់ដាក់ពាក្យស្វែងរកការងារ, ប្រកាសជ្រើសរើសកម្លាំងពលកម្ម, ធ្វើសម្ភាសការងារតាមអនឡាញ, ប្រឹក្សាយោបល់អាជីព, និងស្វែងរកព័ត៌មាន ពាក់ព័ន្ធស្ថិតិទីផ្សារការងារជាច្រើនទៀត កាន់តែងាយស្រួល ឆាប់រហ័ស ចំណេញពេលវេលា បំប្រួញគម្លាត បំបែករបាំងខកខានការងារ ព្រមទាំងអាចប្រើប្រាស់សេវានេះ ពីគ្រប់ទីកន្លែងក្នុងព្រះរាជាណាចក្រកម្ពុជា។ 

 

ថ្លែងក្នុងពិធីដាក់ឲ្យដំណើរជាផ្លូវការ គេហទំព័រថ្មីនៃសេវាការងារថ្មីនេះ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បញ្ជាក់ថាសម្រាប់អ្នកប្រើប្រាស់សេវា និងសាធារណជនទាំងអស់ ក៏អាចប្រើប្រាស់ប្រព័ន្ធសេវាការងារថ្មីនេះ ដើម្បីចូលរួមពិព័រណ៍ការងារថ្នាក់ជាតិ ថ្នាក់មូលដ្ឋាន និងវេទិកាការងារ ការប្រឹក្សាយោបល់អាជីព និងការងារ សំដៅពង្រីកវិសាលភាព នៃតម្រូវការតាមលក្ខខណ្ឌរបស់ខ្លួន និងទាញយកអត្ថប្រយោជន៍ ជាអតិបរមា ពីការផ្តល់សេវាតាមបច្ចេកវិទ្យាជំនាន់ថ្មី។ តាមរយៈ យន្តការផ្តល់សេវានេះ រហូតដល់ឆ្នាំ២០២៣ ខាងមុខ NEA បានដាក់ចេញនូវផែនការ ដើម្បីសម្រេចគោលដៅសំខាន់ៗដូចជា ៖ គ្រោងប្រមូលព័ត៌មានជ្រើសរើសកម្លាំងពលកម្ម ៥៤ម៉ឺន ៩ពាន់កន្លែង, ចុះឈ្មោះអ្នកស្វែងរកការងារ ១១ម៉ឺន នាក់, អ្នកទទួលបានការងារផ្ទាល់ ៤ម៉ឺន ១ពាន់នាក់, និងបង្កើនចំនួនអ្នក ចូលប្រើប្រាស់គេហទំព័រថ្មី ឲ្យដល់ចំនួន ២លាន ៦សែន។ 

 

លោករដ្ឋមន្ត្រី បញ្ជាក់បន្ថែមថា ការដាក់ឲ្យដំណើរការ «ប្រព័ន្ធសេវាការងារ និងព័ត៌មានទីផ្សារការងារនៅកម្ពុជា តាមអ៊ីនធឺណិត-វើកណិត» នាពេលនេះ គឺចំពេលដែលស្ថានភាពរីករាលដាលនៃជំងឺកូវីដ-១៩ កំពុងបង្កហានិភ័យ និងគំរាមកំហែងដល់សុខភាព អាយុជីវិត សេដ្ឋកិច្ចសង្គម និងទីផ្សារការងារកម្ពុជា។ កត្តានេះ បានបង្កការរំខាន ដល់ដំណើរការផ្តល់សេវាការងារ តាមលំនាំដែលធ្លាប់អនុវត្តពីមុនមក គឺការជួបមុខផ្ទាល់, ការចូលរួមព្រឹត្តិការណ៍ការងារ និងការប្រាស្រ័យជួបជុំជាក្រុមធំ រវាងនិយោជក និងអ្នកស្វែងរកការងារ ហើយបានតម្រូវ ឲ្យការចាប់យកនូវវិធីសាស្ត្រថ្មី ដែលអាចរក្សាគម្លាតសុវត្ថិភាព រក្សាអនាម័យ បង្ការការឆ្លងជំងឺ និងបន្តរក្សាលំនឹងទីផ្សារការងារ ក្នុងគ្រាមានវិបត្តិ តាមយៈការប្រើប្រាស់ប្រព័ន្ធបច្ចេកវិទ្យាព័ត៌មាន ក្នុងការផ្តល់សេវាការងារជាជំនួសវិញ។

 

ប្រព័ន្ធផ្តល់សេវាការងារនេះ នឹងដើរតួជាអន្តរការីដ៏សំខាន់បំផុត ដែលជាស្ពានផ្សារភ្ជាប់ រវាងឱកាសការងារ និងកម្លាំងពលកម្ម ដែលមានសក្តានុពល ដោយប្រើប្រាស់បច្ចេកវិទ្យាអ៊ីនធឺណិត និងឌីជីថលទំនើប ស្របតាមបរិការណ៍ នៃការវិវត្តរីកចម្រើនផ្នែកបច្ចេកវិទ្យាព័ត៌មានវិទ្យា។ សមិទ្ធផល នៃប្រព័ន្ធសេវាការងារ និងព័ត៌មានទីផ្សារការងារតាមអ៊ីនធឺណិតនេះ នឹងជួយពង្រឹងមុខងារ និងដំណើរ ការផ្តល់សេវាការងារដែលមានស្រាប់ របស់ NEA ឲ្យកាន់តែឆ្លើយតបបានល្អ ប្រសើរ ទាន់ពេលវេលា និងបំពេញតាមតម្រូវការ របស់អ្នកប្រើប្រាស់សេវាកាន់តែពេញចិត្ត សំដៅជំរុញឲ្យទទួលបានជោគជ័យកាន់តែខ្ពស់ ក្នុងការដាក់ពាក្យស្វែងរកការងារ ផ្គូផ្គងការងារ និងជ្រើសរើសកម្លាំងពលកម្ម។ NEA មានក្តីរំពឹង យ៉ាងមុតមាំថា ៖

 

-អ្នកស្វែងរកការងារ អាចចូលមើល ស្វែងរក និងទទួលបានព័ត៌មានជ្រើសរើសកម្លាំងពលកម្ម និងឱកាសកម្មសិក្សាការងារ ស្របតាមតម្រូវការ និងជំនាញរបស់ខ្លួន ព្រមទាំងអាចទទួលការប្រឹក្សាយោបល់អាជីព និងការងារ តាមប្រព័ន្ធអនឡាញ ក៏ដូចជាការត្រៀមខ្លួនចូលទីផ្សារការងារផងដែរ ។

 

-និយោជក អាចផ្សព្វផ្សាយព័ត៌មាន ពីតម្រូវការកម្លាំងពលកម្មកាន់តែទូលំទូលាយ ដើម្បីជ្រើសរើសបេក្ខជន ដែលស្របតាមតម្រូវការ និងលក្ខខណ្ឌការងារ ដោយអាចសម្ភាសជ្រើសរើសតាមអនឡាញ និងចូលរួមក្នុងព្រឹត្តិការណ៍ការងារជាច្រើនទៀត។

 

-អ្នកផ្តល់ការអប់រំបណ្តុះបណ្តាល អាចទទួលបានព័ត៌មាន ទីផ្សារការងារ ដើម្បីរៀបចំកម្មវិធីសិក្សា និងផែនការបណ្តុះបណ្តាលជំនាញឱ្យស្របតាមតម្រូវការរបស់ទីផ្សារការងារ ព្រមទាំងអាចផ្សព្វផ្សាយព័ត៌មាន អំពីវគ្គបណ្តុះបណ្តាលរបស់គ្រឹះស្ថាន និងកម្មវិធីអាហារូបករណ៍ផងដែរ៕