ដោយ ឈួ ស៊ាវយីងជាវ 

អាជីវកម្មរាប់រយរាប់ពាន់នៅអង់គ្លេស ត្រូវបានបិទទ្វារ ចាប់តាំងរដ្ឋាភិបាលប្រកាសបិទប្រទេសជាលើកទី៣កាលពីដើមខែមករាដើម្បីទប់ស្កាត់ចម្លងជំងឺកូវីដ-១៩ ដែលបង្កដោយវីវុរសបំប្លែងថ្មី។ ទន្ទឹមគ្នានេះ រដ្ឋាភិបាលអង់គ្លេស ក៏សម្រុកចាក់វ៉ាក់សាំងឱ្យប្រជាជនដើម្បីដោះស្រាយវិបត្តិនេះផងដែរ។
 

បច្ចុប្បន្ននេះ វ៉ាក់សាំងដូសទីមួយ ត្រូវបានចាក់ឱ្យប្រជាជន៣២,១២លាននាក់ និង៧,៤៧លាននាក់ទៀត ទទួលបានវ៉ាក់សាំងដូសទី២រួចរាល់។ វ៉ាក់សាំងរួមចំណែកយ៉ាងធំក្នុងការជួយឱ្យអង់គ្លេសឆ្លងរលកកូវីដ-១៩ ។ ករណីឆ្លងប្រចាំថ្ងៃ បានធ្លាក់ចុះបន្តបន្ទាប់មកត្រឹមខ្ទង់មួយពាន់នាក់ ខណៈការស្លាប់ក៏ថយចុះច្រើនផងដែរ ធៀបនឹងខែមករាដែលករណីឆ្លងហក់ឡើងខ្លាំង។
 

ជាមួយស្ថានភាពធូរស្រាលនេះ នាយករដ្ឋមន្រ្តីអង់គ្លេស បូរីស ចនសុនុ ប្រកាសផែនការបន្ធូរបន្ថយការរឹតត្បិតដែលអនុវត្តកន្លងមក។ ហាងលក់ទំនិញ ហាងកាត់សក់ កន្លែងហាត់ប្រាណ និងភោជនីយដ្ឋានមួយចំនួន ត្រូវបានអនុញ្ញាតឱ្យរកស៊ីឡើងវិញ។ ហាងស្រា និងភោជនីយដ្ឋាន នឹងត្រូវអនុញ្ញាតឱ្យផ្ដល់សេវាកម្មនៅតែទីធ្លាខាងក្រៅប៉ុណ្ណោះ ទោះបីបម្រាមគោចរត្រូវបានឈប់អនុវត្តក្ដី។ សេវាកម្មក្នុងហាង បន្តបិទរហូតដល់ថ្ងៃទី១៧ ខែឧសភា។
 

លោក ចនសុន ជឿថា ការបន្ធូរបន្ថយនេះ នឹងជួយបន្ថយទុក្ខលំបាកមួយភាគធំសម្រាប់ម្ចាស់អាជីវកម្មដែលបានបិទទ្វារអស់ពេលយូរមក និងជាឱកាសសម្រាប់មនុស្សទាំងអស់ត្រលប់ទៅធ្វើអ្វីដែលពួកគេស្រលាញ់ និងបានបាត់បង់ឱកាសក្នុងការធ្វើវាកន្លងមក។ លោកស្នើឱ្យប្រជាជនទាំងអស់បន្តរក្សាការទទួលខុសត្រូវ រក្សាគម្លាត អនុវត្តវិធានការសុខភិបាលឱ្យបានត្រឹមត្រូវដើម្បីទប់ស្កាត់ជំងឺកូវីដ-១៩ ស្របពេលអង់គ្លេស កំពុងអនុវត្តកម្មវិធីចាក់វ៉ាក់សាំងយ៉ាងសស្រាក់សស្រាំ។
 

ចក្រភពអង់គ្លេសជាប់ចំណាត់ថ្នាក់ទី៥ ជាប្រទេសមានចំនួនអ្នកស្លាប់ច្រើនជាងគេរហូតដល់ជាង១២៧០០០នាក់។ អ្នកលក់ដូរហាងទំនិញតូចៗ រងការខាតបង់ប្រមាណ២៧ពាន់លានអឺរូ(៣៧ពាន់លានដុល្លារ)អំឡុងពេលបិទប្រទេស។ ដូចនេះ ការបើកអាជីវកម្មមួយចំនួនឡើងវិញនេះ ទំនងជួយដល់សេដ្ឋកិច្ចបានច្រើនតាមរយៈការចាយវាយច្រើនជាងមុន៕