កញ្ញា សាន្ត កុសុមៈ ជាម្ចាស់ជ័យលាភីលេខ១ពីកម្មវិធី«ធីតាឯកសង្រ្កាន្ត» ឆ្នាំ២០២១ របស់ក្រុមហ៊ុន FUN Entertainment  ដែលមានការចូលរួមសហការ និងគាំទ្រពីក្រសួងវប្បធម៌និងវិចិត្រសិល្បៈ  និងក្រសួងព័ត៌មាន ក្នុងការជ្រើសរើសជាអ្នកតំណាងឱ្យទេពធីតា«មណ្ឌាទេវី»។ 

ក្នុងនាមជាកញ្ញាឯកតំណាងឱ្យទេពធីតា«មណ្ឌាទេវី» ដែលយាងចុះមកគ្រប់គ្រងជម្ពូរទ្វីប នាឆ្នាំឆ្លូវនេះ  កញ្ញា សាន្ត កុសុមៈ  រួមទាំងបេក្ខភាព៦នាក់ទៀត ដែលស្ថិតនៅក្នុងនាមជាបុត្រីទាំង៧អង្គរបស់កបិលមហាព្រហ្ម មានភារកិច្ចចូលរួមចំណែក ចែករំលែកនូវសកម្មភាពផ្សេងៗនៅក្នុងសង្គម ដើម្បីបង្ហាញនូវក្តីស្រលាញ់ដ៏បរិសុទ្ធរបស់ទេពធីតាទាំង៧អង្គ ដែលតែងតែចាំជួយស្រោចស្រង់ដល់មនុស្សលោក ដូចជាកិច្ចការសប្បុរធម៌ ជាដើម។ កញ្ញា កុសុមៈ បាននិយាយដូច្នេះ៖«ក្រុមការងាររបស់ខ្ញុំ បានបង្កើតនូវមូលនិធិធីតាឯកសង្រ្កាន្ត ដើម្បីរៃអង្គាសថវិកា សម្រាប់ចូលរួមសកម្មភាពទប់ស្កាត់ការរីករាលនៃជំងឺកូវីដ-១៩នៅកម្ពុជា»។ 

 

នេះជាឆ្នាំទី២ហើយ ចាប់ពីឆ្នាំ២០២០ ដែលកម្ពុជាសម្រេចមិនប្រារព្ធពិធីបុណ្យឆ្នាំថ្មីប្រពៃណីជាតិ ព្រោះតែការរាតត្បាតនៃជំងឺកូវីដ-១៩ ។   ប៉ុន្តែប្រជាពលរដ្ឋ គឺ អាចរៀបចំគ្រឿងរណ្តាប់ឬគ្រឿងដង្វាយនានា សម្រាប់ទទួលទេវតាឆ្នាំថ្មី នៅតាមគេហដ្ឋានរៀងៗខ្លួនៗ។ កញ្ញា សាន្ត កុសុមៈ ដែលជាអ្នកតំណាងឱ្យទេពធីតា«មណ្ឌាទេវី» ជាបុត្រីទី៤របស់កបិលមហាព្រហ្ម បានរៀបរាប់ថា៖«ដោយសារខ្ញុំជាអ្នកតំណាងឱ្យទេពធីតា! ខ្ញុំដឹងថាពួកយើងកំពុងស្ថិតនៅក្នុងស្ថានភាពលំបាកមួយពីការរាតត្បាតនៃជំងឺកូវីដ-១៩។ ខ្ញុំសូមបួងសួងដល់ទេវតានិងវត្ថុស័ក្កសិទ្ធទាំងអស់ឱ្យជួយថែរក្សាកម្ពុជា ជាពិសេសប្រជាជនយើង គឺសូមឱ្យពួកគាត់មានតែសេចក្តីសុខ ចៀសឆ្ងាយពីគ្រោះទុក និងជំងឺទាំងឡាយ»។
 

សូមជម្រាបថា កញ្ញា សាន្ត កុសុមៈ គឺជាតារាសម្តែងតួឯកនៅក្នុងរឿង «នគរមាស» ដែលចាក់បញ្ចាំងនៅស្ថានីយ៍ទូរទស្សន៍CTN។ កញ្ញា ទទួលបានមក្កុដពីកម្មវិធី«ធីតាឯកសង្រ្កាន្ត»ប្រចាំឆ្នាំ២០២១ ត្រូវបានក្លាយជាអ្នកតំណាងឱ្យទេពធីតា«មណ្ឌាទេវី» បុត្រីទី៤របស់កបិលមហាព្រហ្ម យាងចុះនៅវេលា៤តៀមភ្លឺ នាថ្ងៃទី១៤មេសា នៃពិធីបុណ្យចូលឆ្នាំថ្មីខ្មែរ ដោយមានសត្វលា ជាយានជំនិៈ៕