លោក ខៀវ កាញរីទ្ធ សរសេរលើបណ្តាញសង្គមហ្វេសប៊ុក នាព្រឹកថ្ងៃទី២៥មេសា ឆ្នាំ២០២១ថា ក្រសួងពាណិជ្ជកម្មចាត់ចែងបើកស្តង់លក់ទំនិញ ពេលបិទខ្ទប់នេះ ជាគំនិតផ្តួចផ្តើមល្អមួយ ប៉ុន្តែក្រសួងពាណិជ្ជកម្ម អាចលក់បង់រំលស់ជូនអ្នកដែលមិនមានលុយគ្រប់គ្រាន់ ហើយអនុញ្ញាតឲ្យអ្នកលក់ដូរធម្មតានៅជិតនោះ សម្រាប់អ្នកមានលុយគ្រប់គ្រាន់។

 

រដ្ឋមន្ត្រីក្រសួងព័ត៌មានរូបនេះ លើកជាយោបល់ថា៖«ការធ្វើយ៉ាងនេះ យើងជួយអ្នកមានជីវភាពខ្វះខាតផង អនុញ្ញាតឱ្យប្រជាពលរដ្ឋ [អ្នកចាក់វ៉ាក់សាំងបាន ២លើកហើយ] មានប្រភពចំណូលវិញផង ឬ បើមិនចង់ស្មុគស្មាញលក់រំលស់ទេ ក្រសួងមិនបាច់លក់ ទុកឱ្យឯកជន [លក់] ទាំងអស់ក៏បាន ដោយក្រសួងត្រួតពិនិត្យតម្លៃ។ ធ្វើបែបនេះ គឺមន្ត្រី រាជការមិនលំបាកនឹងមកលក់ដូរផងដែរ»។

 

លោក យ៉ង សាំងកុមារ ជាបណ្ឌិតកសិកម្ម ក៏យល់ឃើញមិនខុសពីលោកខៀវ កាញរីទ្ធ ប៉ុន្មានដែរ។ លោក យ៉ង សាំងកុមារ មិនប្រឆាំងនឹងការលក់ស្បៀងរបស់ក្រសួងពាណិជ្ជកម្ម ជូនពលរដ្ឋក្នុងអំឡុងពេលបិទខ្ទប់រាជធានីភ្នំពេញ និងតំបន់ក្រហមទេ ប៉ុន្តែលោកស្នើឱ្យក្រសួងពាណិជ្ជកម្ម ផ្តោតលើការគាំទ្រដល់អាជីវកររាប់ពាន់នាក់ដែលត្រូវការកន្លែងលក់ដូរ ដើម្បីទទួលបានចំណូលសម្រាប់ទ្រទ្រង់ដល់ជីវភាពរស់នៅ។ 

 

អ្នកជំនាញកសិកម្មរូបនេះ បង្ហាញការយល់ឃើញដូច្នេះថា៖«[ក្រសួង[ពាណិជ្ជកម្ម] គួរផ្តោតលើការជួយគាំទ្រដល់អាជីវករ ដើម្បីដំណើរការអាជីវកម្មគាត់បានល្អ ដោយមានទីតាំងសមស្របទទួលបានផ្គត់ផ្គង់កសិផលពីប្រភពផ្សេងៗបានដោយរលូន និងដំណើរការលក់ដូរដោយគោរពតាកគោរណ៍សុខាភិបាល បានល្អ»។  លោក បន្ថែមថា៖«ការចែកគ្នាទទួលខុសត្រូវ និងការជួយគ្នាទៅវិញទៅមក រវាងរដ្ឋនិងពលរដ្ឋ នាំឲ្យយើងទប់ទល់ជាមួយជំងឺកូវីដ-១៩ បានដោយជោគជ័យ»។ 

 

បច្ចុប្បន្នក្រសួងពាណិជ្ជកម្មតាមរយៈក្រុមហ៊ុន ហ្គ្រីន ត្រេដ បានបញ្ចេញរថយន្តចល័ត និងបង្កើតស្តង់ជាង២០ ដើម្បីលក់គ្រឿងបរិភោគ ដូចជា អង្ករ មី ត្រីខកំប៉ុង និង ទឹកត្រី ជាដើម នៅតំបន់ក្រហម ក្នុងតម្លៃក្រោមទីផ្សារ ខណៈក្រុមហ៊ុន វីរៈ ប៊ុនថាំ អេចប្រេស ក៏បានសហការជាមួយរដ្ឋបាលរាជធានីភ្នំពេញ បានបញ្ចេញរថយន្តចល័តចំនួន ៦៤គ្រឿង ដើម្បីលក់គ្រឿងបរិភោគ ជុំវិញរាជធានីភ្នំពេញផងដែរ៕