COVID-19
ជាតិ
×![]()
ភ្នំពេញ៖ កម្មការិនីរោងចក្រម្នាក់មានផ្ទៃពោះ៧ខែ ដែលមានរស់នៅខេត្តកំពង់ស្ពឺ បានស្លាប់ដោយសារជំងឺកូវីដ-១៩កាលពីយប់ថ្ងៃទី ៧ ឧសភា។ នេះបើតាមលោក វ៉ី សំណាង អភិបាលខេត្តកំពង់ស្ពឺប្រាប់សារព័ត៌មានថ្មីៗ នៅថ្ងៃទី៨ ឧសភា។ 
ស្រ្តីវ័យ៣០ឆ្នាំម្នាក់ មានទីលំនៅក្នុងភូមិគោកដង្កោឃុំពេជ្រមុនី ស្រុកគងពិសី ខេត្តកំពង់ស្ពឺជាកម្មការិនីរោងចក្រនៅស្រុកអង្គស្នួល ខេត្តកណ្ដាលបានស្លាប់ដោយសារជំងឺកូវីដ-១៩។ លោក វ៉ី សំណាង អភិបាលខេត្តកំពង់ស្ពឺ បញ្ជាក់ថា៖ «កម្មការិនីរោងចក្រម្នាក់បានស្លាប់ដោយសារជំងឺកូវីដ-១៩ កាលពីយប់ថ្ងៃទី៧ ឧសភាបន្ទាប់ពីចូលមន្ទីរពេទ្យបាន ៣០នាទី។ គាត់មានអាការដង្ហក់ខ្លាំងនិងមានសភាពធ្ងន់ធ្ងរ»។
បើតាមអភិបាលខេត្តកំពង់ស្ពឺនៅពេលមានអាការសង្ស័យដំបូង ស្រ្តីជាកម្មការិនីខាងលើមិនបានទៅមន្ទីរពេទ្យឬយកសំណាកនោះទេ ប៉ុន្តែក្រោយមានអាការធ្ងន់ធ្ងរទើបក្រុមគ្រួសារបញ្ជូនមកមន្ទីរពេទ្យខេត្តកំពង់ស្ពឺ។
ស្រ្តីជាកម្មការិនីរោងចក្ររូបនេះត្រូវបានក្រុមគ្រូពេទ្យរកឃើញមានវិជ្ជមានកូវីដ-១៩ និងវិនិច្ឆ័យថាស្លាប់ដោយសារជំងឺកូវីដ-១៩ ។
លោក វ៉ី សំណាង បន្តថាអ្នកពាក់ព័ន្ធនឹងស្រ្តីខាងលើជាក្រុមគ្រួសាររបស់សព ដោយត្រូវធ្វើចត្តាឡីស័កនិងយកសំណាក។
អភិបាលខេត្តកំពង់ស្ពឺ អំពាវនាវដល់កម្មការិនីរោងចក្រ និងពលរដ្ឋទាំងអស់ត្រូវផ្ដល់ព័ត៌មានពិតជូនក្រុមគ្រូពេទ្យ និងអាជ្ញាធរដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ-១៩។ សូមបញ្ជាក់ថាគិតត្រឹមថ្ងៃទី ៨ឧសភានេះ ខេត្តកំពង់ស្ពឺ មានអ្នកស្លាប់ដោយសារជំងឺកូវីដ-១៩ចំនួន ៤នាក់។
ដ្បិតតែអភិបាលខេត្តកំពង់ស្ពឺបានអះអាងថា ខេត្តខ្លួនមានអ្នកស្លាប់ដោយសារជំងឺកូវី-១៩ ម្នាក់មែន នៅយប់ថ្ងៃទី៧ ឧសភា ប៉ុន្តែរបាយការណ៍ប្រចាំថ្ងៃទី៨ ឧសភានេះ របស់ក្រសួងសុខាភិបាល បញ្ជាក់ថាគ្មានអ្នកស្លាប់ថ្មី ដោយសារកូវីដ-១៩ នោះទេ។
សូមបញ្ជាក់តាមក្រសួងសុខាភិបាល គិតមកដល់ពេលនេះកម្ពុជា មានអ្នកកើតកូវីដ-១៩ សរុបចំនួន ១៨៧១៧នាក់ ដែលក្នុងនោះសះស្បើយចំនួន ៧៣៤០នាក់ និងស្លាប់មាន១១៤នាក់។ នេះជាថ្ងៃទី២ហើយ ដែលកម្ពុជាមិនមានករណីស្លាប់ថ្មី ក្នុងរយៈពេលជិតខែមកនេះ ពោលគឺចាប់តាំងពីថ្ងៃទី៨ ខែមេសាមក៕
Tag:
កម្មការិនីរោងចក្រ
កំពង់ស្ពឺ
COVID-19
© រក្សាសិទ្ធិដោយ thmeythmey.com
