«សហរដ្ឋអាមេរិកគឺជាដៃគូរឹងមាំជាប់លាប់មួយរបស់ប្រទេសកម្ពុជា នៅក្នុងអំឡុងពេលនៃការរាតត្បាតជាសាកលនៃមេរោគកូវីដ-១៩»។ នេះជាការបញ្ជាក់របស់លោក W. Patrick Murphy ដោយលើកឡើងពីការផ្តល់ថវិកាដោយផ្ទាល់ជាង១១លានដុល្លារអាមេរិក ពាក់ព័ន្ធនឹងជំនួយបច្ចេកទេសសំខាន់ៗ បន្ថែមលើកម្មវិធីសហការដែលមានស្រាប់ក្នុងផ្នែកសុខាភិបាល។

 

លោកឯកអគ្គរដ្ឋទូតអាមេរិក ក៏បានរំលឹកថា សហរដ្ឋអាមេរិក បានផ្តល់ថវិកាជាង៤ពាន់លានដុល្លារអាមេរិកដែលច្រើនជាងគេក្នុងបណ្តាប្រទេសនានាលើពិភពលោក ដល់យន្តការ COVAX របស់អង្គការសុខភាពពិភពលោក ដើម្បីចែកចាយវ៉ាក់សាំងដល់ប្រទេសចំណូលទាប និងចំណូលមធ្យមកម្រិតទាប ក្នុងនោះក៏មានកម្ពុជាផងដែរ។

 

តាមរយៈយន្តការកូវ៉ាក់ កម្ពុជាទទួលបានវ៉ាក់សាំង Covishield (AstraZeneca) ជាង៣សែនដូសរួចមកហើយ ក្នុងចំណោមប្រមាណ៦លាន៤សែនដូស។ «កម្ពុជានឹងទទួលបានវ៉ាក់សាំងចំនួន ១ លាន ១ សែនដូស នៅត្រឹមដំណាច់ខែឧសភានេះ ហើយនឹងមានមកថែមទៀត»។ នេះជាការគូសបញ្ជាក់របស់លោក Murphy។

 

គិតត្រឹមថ្ងៃទី១៧ ខែឧសភា មនុស្សជាង២,១លាននាក់បានចាក់វ៉ាក់សាំងកូវីដ-១៩ ដែលក្នុងនោះជាង១,២លាននាក់បានចាក់ដូសទី២។ ក្រៅពី Covishield ដែលកម្ពុជាទទួលបានតាមរយៈយន្តការកូវ៉ាក់ កម្ពុជាប្រើប្រាស់វ៉ាក់សាំងពីរប្រភេទទៀត គឺ Sinopharm-Beijing (ជំនួយរដ្ឋាភិបាលចិន) និង Sinovac (ការបញ្ជាទិញពីចិន)។

 

នាជំនួបជាមួយលោក ប្រាក់ សុខុន ឯកអគ្គរដ្ឋទូតអាមេរិក ក៏បានសម្តែងការសោកស្តាយចំពោះករណីស្លាប់ដោយសារកូវីដ-១៩នៅកម្ពុជាផងដែរ ដោយគិតត្រឹមថ្ងៃទី១៨ ខែឧសភា នេះ កម្ពុជាមានអ្នកកើតកូវីដ-១៩ ចំនួន ២២៨៨៩នាក់ សះស្បើយមាន១៤៣៤៣នាក់ និងស្លាប់កើនដល់ ១៥៦នាក់។

 

ក្រៅពីបញ្ហាកូវីដ-១៩ ភាគីទាំងពីរក៏បានពិភាក្សាគ្នាទាក់ទងនឹងការជំរុញដំណើរការ និងស្ថាប័ននៃលទ្ធិប្រជាធិបតេយ្យ ហើយនិងនីតិរដ្ឋ នៅក្នុងតំបន់ ដោយរួមទាំងនៅប្រទេសមីយ៉ាន់ម៉ាផងដែរ។ «យើងសូមលើកទឹកចិត្តឲ្យសមាគមអាស៊ានចូលរួមជាមួយស្ថាប័នពាក់ព័ន្ធទាំងអស់ នៅប្រទេសភូមា ក្នុងការស្វែងរកដំណោះស្រាយដើម្បីបញ្ចប់វិបត្តិនេះ»។ នេះបើយោងតាមផ្សាយរបស់ស្ថានទូតអាមេរិក៕