ច្បាប់ / សិទិ្ធមនុស្ស / តុលាការ
ជាតិ
ចៅក្រមបដិសេធសំណើនៅក្រៅឃុំ របស់សកម្មជនសិទ្ធិមនុស្ស និងបរិស្ថានទាំង៧នាក់
សកម្មជនសិទ្ធិមនុស្សនិងបរិស្ថានទាំង៧។ (រូបភាពពី CYN)
×![]()
ដោយ: ឡាយ សុភាវតី
ភ្នំពេញ៖ ចៅក្រមជំនុំជម្រះ នៃសាលាដំបូងរាជធានីភ្នំពេញ សម្រចបដិសេធសំណើសុំនៅក្រៅឃុំរបស់ក្រុមយុវជនខ្មែរថាវរៈនិងសមាគមនិស្សិតបញ្ញវ័ន្តខ្មែរទាំង៧នាក់ ដោយសំអាងថាការស្នើសុំនេះពុំមានហេតុផលច្បាស់លាស់និងរក្សាជនជាប់ចោទដើម្បបន្តនីតិវិធីសវនាការជាបន្តបន្ទាប់។ ករណីនេះ អ្នកតស៊ូមតិរបស់CYN បង្ហាញការព្រួយបារម្ភពីការបាត់បង់សេរីភាពនិងការរកយុត្តិធម៌សកម្មជនទាំងនោះ។ 
នៅថ្ងៃទី១៨ឧសភានេះ ចៅក្រមសាលាដំបូងរាជធានីភ្នំពេញ សម្រេចបដិសេធលើសំណើសុំក្រៅឃុំបណ្តោះអាសន្ន និងបន្តឃុំខ្លួន រង់ចាំបើកសវនាការបន្តទៀត ដោយពុំបានបញ្ជាក់ថាពេលវេលានោះទេ។ ការបដិសេធរបស់ចៅក្រ មធ្វើឡើងក្រោមហេតុផលពីរ គឺសំណើសុំរបស់មេធាវី មិនមានហេតុផលច្បាស់លាស់ និងរក្សាជនជាប់ចោទ ទុកជូនតុលាការសម្រាប់បន្តសវនាការ។ នេះបើតាមលោក ហេង គឹមហុង ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា(CYN) ដែលបានចូលរួមស្តាប់សវនាការ។
លោក គីមហុង យល់ថាការសម្រេចនេះ ធ្វើឲ្យប៉ះពាល់សិទ្ធិសេរីភាពនិងការរកយុត្តិធម៌របស់សកម្មជនទាំង៧នាក់។ ការរងផលប៉ះពាល់នេះ ដោយសារពួកគេរងការចោទ ពីបទញុះញង់បង្កភាពវឹកវរធ្ងន់ធ្ងរដល់សន្តិសុខសង្គម គឺប្រឈមនឹងជាប់ពន្ធនាគារ ពី៦ខែ ទៅ២ឆ្នាំ ខណៈដែលដំណើរការស៊ើបសួរ បានអូសបន្លាយប្រមាណព៩ខែទៅហើយ។
«អប្បបរមានៃបទចោទនេះ ៦ខែក្នុងការជាប់ពន្ធនាគារ គឺប៉ះពាល់សិទ្ធិសេរីភាព និងការទទួលបានយុត្តិធម៌ របស់ជនជាប់ចោទ។ ដំណើរការសំណុំរឿងនេះ ៩ខែទៅហើយ ចៅក្រមនៅតែមិនទាន់ឃើញមានពេលច្បាស់លាស់ ហើយនឹងអាចបន្តប៉ះពាល់យ៉ាងធ្ងន់ធ្ងរ ដល់សិទ្ធិសេរីភាព របស់ជនជាប់ចោទ ដែលគ្រាន់តែចូលរួមសកម្មភាពអហិង្សា និងបង្ហាញសេរីភាពបញ្ចេញរបស់មតិរបស់ខ្លួន»។ នេះបើតាមការេលើកឡើងរបស់លោក គីមហុង។
ប្រធានផ្នែកកម្មវិធីស្រាវជ្រាវ និងតស៊ូមតិរូបនេះសង្កត់ធ្ងន់ថា តុលាការ គួរតែពន្លឿននីតិវិធីលើសំណុំរឿងនេះ តាមគោលការណ៍យុត្តិធម៌ ដើម្បីឲ្យក្រុមសកម្មជនទាំង៧នាក់ ដឹងច្បាស់ថាខ្លួនជាប់ចោទ ប្រព្រឹត្តខុស ឬត្រូវ។
សូមជម្រាប់ថា សកម្មជនសិទ្ធិមនុស្ស និងបរិស្ថានទាំង៧នាក់នេះមាន លោក កើត សារ៉ាយ, លោក ហ៊ុន វណ្ណៈ, កញ្ញា ឈឿន ដារ៉ាវី, កញ្ញា អេង ម៉ាឡៃ ហៅ សូ មេត្តា, លោក ថា ឡាវី, លោក មាន ព្រហ្មមុនី និងលោក មួង សុភ័ក្ត្រ។ ចំណោមអ្នកទាំង៧នាក់នេះមាន យុវជនខ្មែរថាវរៈ៥នាក់ ដែលត្រូវឃាត់ខ្លួននៅអំឡុងខែសីហា ដល់ខែកញ្ញា ឆ្នាំ២០២០ ពាក់ព័ន្ធនឹងការចូលរួមតវ៉ា ទាមទាឱ្យដោះលែងលោក រ៉ុង ឈុន។ រីឯ សមាជិកទាំងពីររូប នៃសមាគមនិស្សិតបញ្ញវន្តខ្មែរ ត្រូវបានចាប់ខ្លួនពាក់ព័ន្ធនឹងការរៀបចំការជួបជុំដោយសន្តិវិធី នៅទីលានប្រជាធិបតេយ្យ៕
© រក្សាសិទ្ធិដោយ thmeythmey.com
